1 Vivinei i sa baṉara Devita sari doduru nana koimata pu kopu koari na pukuna keke tina, meke koarini pa pukuna keke gogoto pude avosi dia binalabala. 2 Beto asa si tozi vura nia sa koari doduru tinoni Izireli, “Be va egoa gamu sa ginarunu hie, meke be asa sa Nana hiniva e Zihova sa nada Tamasa, si mada garuni sari na tie paleke inavoso la koari doduru turaṉada, meke gua tugo koari na hiama meke na tie Livaeti pu koa turaṉi, meke tozi ni pude varigara mae koa gita tani, 3 pude mada la paleke mae nia sa Bokese Vinariva Egoi te Tamasa, sina lopu hata tinokae si gita koari na totoso te Saula.” 4 Qetu nia rina tinoni sa hiniva asa, meke va egoa rini sina toṉoto si asa pa dinoṉo tadirini.

5 Ke varigara ni Devita sari doduru tinoni pa Izireli, podalae pa volosona sa popoa Izipi kamo pa karovoana pa toqere sapu ta pozae Hamati, pude va rizua sa Bokese Vinariva Egoi pa Kiriati Zearimi, la pa Zerusalema.* 1 Samuela 7:1-2 6 Meke sage la pa vasileana Ba'ala pa popoa Ziuda, sapu ta pozae Kiriati Zearimi, se Devita meke sari na tinoni pude paleke vagia sa Bokese Vinariva Egoi te Zihova, pu habotu pa uluna sage koa rina mateana Serubimi vasina sapu koa sa pozana se Zihova.* Ekd 25:22 7 Paleke vagia rini si asa koasa vetu te Abinadabi, meke suraṉia rini koa keke totopili vaqurana. Ari Uza e Ahio si turaṉana sa totopili. 8 Meke se Devita meke sari doduru tie Izireli si vala i rini sari doduru dia ṉiniraṉira pa peka na kera pa qinetuqetu, pude va lavatia sa Tamasa gua. Kera meke mikei rini sari na hapu, na laera, lopi i rini sari na daramu, buki, meke na sibolo.

9 Sipu mae kamo si arini koasa vasina varipaqaha ni kiko huiti koari na qaqalotodi te Kidoni, si ta tubarae sa bulumakao, ke qaqama la se Uza pude tuqea sa Bokese Vinariva Egoi te Zihova. 10 Meke pa totoso tugo asa si bugoro nia e Zihova se Uza, meke seke va matea Sa, sina lopu pamaṉa nia sa sapu hopena sa bokese. Mate vasina se Uza pa kenuna Tamasa sina qaqama la meke tuqea sa sa Bokese Vinariva Egoi. 11 Ta ṉaziri se Devita sina va kilasia Zihova se Uza pa binugoro. Ke ta pozae Perezi Uza sa vasina asa kamoa kamahire, sapu sa ginuana sa “Tava kilasa se Uza.”

12 Meke koasa ranena asa si matagutu nia Devita sa Tamasa meke zama, “Vegua meke kaqu boka paleke mae nia rau sa Bokese Vinariva Egoi kamahire?” 13 Ke lopu paleke la nia sa pa Zerusalema si asa, ba kekere mokue mo pa siraṉa, meke la vekoa sa pa vetu te Opeti Edomu. Keke tie pa vasileana Qati si asa. 14 Koa mo vasina si asa ka ṉeta sidara, meke mana nia Zihova se Opeti Edomu, sa nana puku tatamana, meke doduru sapu tagoi sa.* 1 Koron 26:4-5