1 Meke zama la koe Mosese se Zihova, 2 “Tozini sari na tie Izireli pude va mae i koa Rau sari na vinariponi. Vagia gua sapu boka poni nia sa tie pa nana hiniva soti. 3 Gua hire sari na vinariponi saripu kaqu ta vagi: qolo, siliva, boronizi; 4 poko lineni memelesina; meke vulu bulu, pepolo, meke ziṉara; poko sapu ta tavetae kalu qoti; 5 kapuna keke sipi kokoreo sapu tava ziṉara; kapu rumu tava popana; huda akesia; 6 oela tana zuke; oto huda humaṉa lea tana vina uququ, sari na votiki oto huda oela na pauda humaṉa lea tana oela olive tana va madi tie; 7 sari na patu ṉedala na vinasari doṉo lea, saripu soto koasa poko hiama hopena meke sa poko raqaraqa tanisa hiama kenukenue.

8 Ego, kaqu tavete poni Au ri na tinoni si keke Ipi Hopena, pude kaqu somana koa koa rini si Rau. 9 Meke sa tinavetena, meke sari doduru likakalae pa korapana, si kaqu gua puta tugo saripu va dogoro nigo Rau.

10 Mi tavete nia huda akesia gamu sa Bokese Vinariva Egoi, keke gogoto manege puta sentimita sa ginelena, ka onomo ṉavulu onomo sentimita labena, onomo ṉavulu onomo sentimita ululuna.* Ka made ṉavulu lima inisi sa ginelena, ka hiokona zuapa inisi sa labena, meke ka hiokona zuapa inisi sa ululuna. 11 Mamu poko nia qolo pa korapana meke mudina, meke gua tugo doduru vari likohaena. 12 Taveti ka made riṉi qolo palepalekeana; mamu va soto lani koari ka made nenena; karua riṉi koari karua kalina. 13 Mamu tavete nia palepalekeana huda akesia; mamu va pokoni qolo si arini, 14 mamu va lopoto lani koari na riṉi, pa karua kalina sa bokese sari na huda. 15 Meke lopu kaqu ta unusu vagi pule sari na huda palepalekeana koari na riṉi. 16 Mamu tiqe vekoi pa korapa bokese hopena sari karua patu labelabe vasina ta kubere sari na tinarae, saripu kote vatui Rau.

17 Mamu tavetia pa qolo viana si keke tukutuku, sapu keke gogoto manege puta sentimita gelena, meke onomo ṉavulu onomo sentimita labena.* 45 Inisi gelena, meke 27 inisi labena. * Hib 9:5 18-19 Mamu sekeseke va vurai karua serubimi koasa tukutuku qolo keke pa hopeke kalina.* Serubimi si keke mateana hopena te Tamasa pa Maṉauru koai tatapurudi. Mamu sekesekei pude kaqu ta evaṉae keke tini sari karua mateana meke sa tukutukuna sa bokese. 20 Sari karua serubimi si kaqu vari doṉo totoi meke sari na tatapurudi si kaqu nobia sa tukutuku. 21 Mamu voi i pa korapa bokese sari karua patu labelabe, mamu tukua. 22 Beto meke kaqu tutuvu gamu Rau panauluna sa tukutuku bokese hopena, pa varikorapadi ri karua mateana serubimi; meke kaqu zama vatuni Rau koa gamu na tie Izireli sari doduru Qua tinarae.

23 Mamu tavete nia huda akesia si keke tevolo, vesu ṉavulu vesu sentimita gelena, made ṉavulu made sentimita labena, meke onomo ṉavulu onomo sentimita ululuna.* Ka 36 inisi gelena, ka 18 inisi labena, meke 27 inisi ululuna. 24 Mamu tavetia keke poko sekesekeana sapu ta tavetae qolo viana, meke pa hukihukirina si ta napitae qolo. 25 Mamu tavetia keke tokatoka sage pa hukihukirina sa tevolo. Sa ululuna si kaqu zuapa ṉavulu lima milimita ululuna meke sa hukihukirina panaulu si kaqu ta pokoe qolo. 26 Mamu taveti ka made qolo riṉi palepalekeana, mamu hopeke va sotoi koari ka made iiona sa tevolo, vasina koa sari hopeke nenena. 27 Sari na riṉi si kaqu ta soto kapae koasa tokatoka sage pude tuqei sari na huda palepalekeana tanisa tevolo. 28 Mamu tavete nia karua palepalekeana huda akesia, mamu pokoni qolo. 29 Mamu taveti sari na peleta, kapa, zagi, na besini, pude tana naponapoana vaeni; kaqu na qolo viana tavete betoni sari doduru hire. 30 Kaqu ta veko pa kenuna sa Bokese Vinariva Egoi, sa tevolo, meke doduru totoso sa bereti madina sapu koa koasa tevolo, si kaqu ta poni mae koa Rau.* Liv 24:5-8

31 Mamu tavete nia qolo viana si keke tuturuana zuke: sekeseke hitehite vura nia koasa sa hubina meke dedegerena; mamu tavete vurani kaiqa kineha kapa havohavoro, guana vina sari, sari na havoro lopu ele pelaradi, meke na elodi. Kote keke tini doduruna si arini. 32 Kaqu ka onomo limana sa tuturuana zuke; ka ṉeta pa karua kalina. 33 Hopeke koari ka onomo limana hire, si koadia sari ka ṉeta vinasari havoro, sapu doṉo gua kineha havoro olomodi, sapu koai elodi na havoro lopu ele pelaradi. 34 Meke koasa dedegerena sa tuturuana zuke, si kaqu koadia sari ka made kapa, sapu doṉo guari na havoro huda olomodi kinehadi, sapu koai na havoro lopu ele pelaradi, meke na elodi. 35 Kaqu koa nana si keke havoro lopu pelarana, panapeka koari ka ṉeta hopeke limadia. 36 Sari na limana, meke sari na havoro lopu ele pelaradi, meke sa tuturuana zuke si kaqu ta sekeseke meke ta tavete vura pa qolo viana. 37 Beto mamu taveti ka zuapa zuke oela hitekedi, mamu vekoi koasa tuturuana zuke, pude va kalalasia sa kenuna, sa vasina sapu koa sa tuturuana zuke. 38 Mamu taveteni qolo sari na nepihina meke sari na vovoina. 39 Kaqu tavetia gamu sa tuturuana zuke meke sari na tiṉitoṉa tanisa koari ka toloṉavulu lima kilo qolo viana.* Ka zuapa ṉavulu lima paoni qolo mamatana. 40 Mi tavete valeani, gua puta tugo sa kineha sapu va dogoroni gamu Rau pa toqere.* TTA 7:44; Hib 8:5