10
Hataholi Farisi la sangga dalak fo ala ika Yesus lenik dedeꞌa sasao-namaketuk
(Mateos 19:1-12; Lukas 16:18)
1 Basa boe ma, Yesus asa leni propinsi Yudea leu, ma nggolo-nggolo feꞌek kala malai lee Yarden selik dulu leu. Nai sudi bee hataholi noꞌu kala mai lakahohombu lala Ndia. Yesus nanoli sala, sama leo natetemen.
2 Hambu hataholi Farisi mana maik hida, fo ala sangga tao latuda Ndia. Ala latane lae, “Tungga ita anggaman heti-heun nae, mete ma touk esa kasaok so, na bole namaketu no saon, do taa?”
3 Yesus nataa nae, “Masanenedak dei! Heti-heuk laꞌeneu sasaok fo Baꞌi Musa fee ita, nae, leo bee?”
4 Ala lataa lae, “Baꞌi Musa heti-heun nae, hataholi bole lamaketu, sadi fee susula namaketuk neu sao inan dei.”✡ Tui Seluk laꞌeneu Dala Sodak 24:1-4; Mateos 5:31
5 Yesus bala nae, “Heeh! Mamanene, baa! Huu kada ei langga batun, de Baꞌi Musa sulak leondiak. 6 Ei boso mafalende heni tutui sososak fo faik Manetualain nakadadadik lalai ma dae-bafok! Hambu nana sulak nae,
‘Manetualain nakadadaꞌdik hataholi, touk no inak.✡ Tutuik laꞌeneu Sososan 1:27; 5:2
7 Huu ndia de, touk musi laꞌo ela ina-man,
fo neu nasoda dalek esa no saon,
8 huu sila dua sala dadik leu esa so.✡ Tutuik laꞌeneu Sososan 2:24
9 Mete ma Manetualain tao dua sala dadik leu esa so, na, hataholi boso fee sala lamaketu bali!”
10 Basa ndia, boe ma, Yesus no ana mana tungga nala mesa kasa maso leni uma esa dalek leu. Leu ndia boe ma latane Yesus nanonolin isinaak ndia.
11 Yesus nataa nae, “See ana ela heni sao inan, fo ana sao seluk, na, hohonggek ndia so. 12 Inak boe oo leo ndiak! Mete ma ana ela heni sao toun fo ana sao seluk, na hohonggek ndia boe!”✡ Mateos 5:32; 1 Korintus 7:10-11
Lamatuak Yesus fee babaꞌe-babatik neu kakana kala
(Mateos 19:13-15; Lukas 18:15-17)
13 Faik esa, boe ma hambu hataholi la loo ana nala leni Yesus leu, fo loke Ana tao liman neu sala, fo fee sala babaꞌe-babatik. Tehuu Yesus ana mana tungga nala kaꞌi hataholi la sila.
14 Yesus nita leondia, boe ma Ana manggalau ana mana tungga nala, nae, “Mboꞌi kakana kala sila leni Au mai. Boso kaꞌi sala, huu hataholi fo sama leo sila ia, na, Manetualain hataholi nala sila. 15 Ei masanedak neulalau! See fo nau neni Manetualain matan mai, na, ana musi dokodoe Manetualain, sama leo kakana kala dokodoe inan no aman. Mete ma taa leondiak, na sila taa landaa dadik leu Manetualain hataholi nala.”✡ Mateos 18:3 16 Basa ndia, boe ma Yesus holu nala kakana kala sila, de Ana tao liman neu esa-esako langgan lain, de Ana fee sala babaꞌe-babatik.
Hataholi kamasuꞌik sangga dalak fo nasoda nakandoo no Manetualain
(Mateos 19:16-30; Lukas 18:18-30)
17 Yesus no Ana mana tungga nala sangga laꞌo, boe ma hataholi kamasuꞌik esa nalai-nalai mesan mai, fo sangga natonggo no Ndia. Ana nakatele neu Yesus matan, boe ma natane, nae, “Ama Mesen fo nana hadak nalan seli! Au sangga atane fa. Leoiak, Ama. Au musi tao leobee, fo suek au bubuluk tebe-tebe, au bisa maso nusa-sodak, fo au asoda sama-sama ua Manetualain?”
18 Yesus nataa nae, “Hatina, de o mae Au ia nana ‘haꞌdak nala seli’? Taa hambu hataholi esa nana hadak nalan seli, tehuu kada Manetualain mesa kana. 19 O bubuluk so, basa Manetualain hoholo-lalanen neme makahulun ele mai nae,
‘Boso makanisa;
Boso hohongge;
Boso mamanaꞌo;
Boso dadi sakasii pepekok;
Boso pepeko mala hataholi buan;
ma fee hadak holomata neu o amam ma inam.’ ”✡ Kalua neme Masir mai 20:12-16; Tui Seluk laꞌeneu Dala Sodak 5:16-20
20 Boe ma hataholi ndia nataa, nae, “Tetebes, Ama Mesen! Au tungga basa hoholo-lalane kala sila so neme au bei taꞌeꞌanang mai.”
21 Yesus kasian neu hataholi ndia. Boe ma Ana nafada nae, “Tetebes! Tehuu bei ela dedeꞌak esa bali. Hatematak ia, o fali leo, fo seꞌo heni basa o hata mala. Doi nala muu babaꞌe sala leu hataholi mana toꞌa-taa kala. Basa ndia, na, o mai fo tungga Au leo. Dei fo Manetualain bala fee o hata feꞌek, nai nusa-sodak.”
22 Hataholi ndia namanene nala Yesus kokolan ndia, boe ma dalen nakalalutuk. Basa de, ana fali no dalen hedis nalan seli, huu kamasuꞌi ndoos.
23 Boe ma Yesus suli neu-mai, de nakokola no ana mana tungga nala nae, “Mamanene baa! Hataholi kamasuꞌik memak sosotak maso nusa-sodak!”
24 Lamanene Yesus kokolan leondia, boe ma ana mana tungga nala lasapangga. Tehuu Yesus kokolak nakadaik bali, nae, “Mamanene neulalau! Nau dadik Manetualain hataholin, na, totoꞌan ana seli! Boso mae dedeꞌak ndia mudak. 25 Huu hataholi kamasuꞌik maso neni nusa soꞌdak fo ana dadik Manetualain hataholin, na totoꞌan sama leo banda onta inahuuk esa, maso neni lalaen dale neu, nesik ndandau bolo.”
26 Yesus kokolan ndia, tao nala basa sala boe lasapangga bali. Boe ma latatane aok, lae, “Mete ma tetebes leo ndiak, na, see bisa hambu sodak, bae?”
27 Yesus suli sala esa-esa, boe ma Ana nafada nae, “Soaneu hataholi, na, taa bisa. Tehuu boso mafalende henin: soaneu Manetualain, na, basan mana dadik!”
28 Basa boe ma, Petrus kokolak nae, “Ama aa! Ai lao ela basa ai hata nala, de ai tungga Ama. Tehuu ai hambu hata?”
29-30 Yesus nae, “Au sangga afada ei leoiak: hataholi fo mana tungga Au, ma ana laꞌo ela ndia inama nala, kaꞌafadi nala, ma, ana nala, osi-lutun, ue-ledin, ma basa ndia uma isi nala, fo neu tui-bengga Manetualain Hala Malolen, na, neu ko ana hambu nggati falik losa laꞌi natun. Basa hata fo ana laꞌo ela kala sila, neu ko ana simbo falik lena heni ndia. Ma ndia boe oo, neu ko nasoda nakandoo no Manetualain. Babalan ndindia! 31 Masanenedak baa! Hataholi fo mana tao inahuhuu aon, na, tungga Manetualain duduꞌan na dei fo hataholi ndia kadiꞌi anak nalan seli. Tehuu hataholi taok aon kadiꞌik, na, tungga Manetualain duduꞌan, na, ndia mana dadik hataholi inahuuk.”✡ Mateos 20:16; Lukas 13:30
Lamatuak Yesus nafada Ndia mamaten, neu kalaꞌi telun
(Mateos 20:17-19; Lukas 18:31-34)
32 Faik ndia, Yesus asa laꞌok leni Yerusalem leu. Yesus laꞌok nakahuluk. Boe ma ana mana tungga nala ma hataholi feꞌe kala tungga Ndia. Ala lasaneda hata fo Ndia dedeꞌa-kokola makahulun, nae, hataholi la sangga tao lisa Ndia nai Yerusalem. Huu ndia, de ala lasapangga ma bii. Namanene leondia, boe ma Yesus noke nala kada Ndia ana mana tungga nala mesa kasa, fo nafada selu kasa hata fo hataholi sangga tao Ndia nai Yerusalem. 33 Ana kokolak nae, “Ei mamanene baa! Hatematak ia, ita sangga teni Yerusalem teu. Au ia Hataholi Isi-isik. Tehuu ala seꞌo heni Au neu malangga anggama la ma mese anggama la nai ele. Basa boe ma ala huku lisa Au. Boe ma ala fee Au uu hataholi feꞌek kala fo taa mana malelak Manetualain. 34 Basa boe ma ala kokolak lakamamaek Au. Ala mbula ambe neu Au. Ala filo lahina Au aong. Basa bei fo ala tao lisa Au. Memak Au mate tetebes, tehuu neu binesan, Au asoda fali.* Nai dedeꞌa Yunani, ala mulai hinggan neme: leledon ia (= esa), foꞌa (= dua), binesak (= telu), balidemak ( = haa). De, nai dedeꞌa Yunani, (tei tritei heimera) “nai fai katelun” maksud nai dedeꞌa Malai Kotak, na, ndia “neu binesan”. Masaneda huu, Lamatuak Yesus maten neu fai lima (hingga esa) Neu foꞌa main, na, ndia fai nee (hingga dua), Lamatuak Yesus nai lates dale. Neu binesan, na, ndia sosodaꞌina (hingga telu), Lamatuak Yesus nasoda fali. De, tungga ita hihingga fain, na, Ana mate leꞌodaek dua, boe ma Ana nasoda fali.
Yakobis no Yohanis loke fo suek sila dadik hataholi inahuuk
(Mateos 20:20-28)
35 Basa ndia boe ma, Yakobis no Yohanis fo Sabadius ana nala, leni Yesus leu. Ala loke Ndia lae, “Ama Mesen aa! Ai paluu fa!”
36 Yesus natane nae, “Ei paluu hata?”
37 Boe ma ala lataa lae, “Leoiak Ama! Mete ma Ama nanggatuuk toꞌu palenda so, na, ai moke Ama manggatutuu ai, esa nai Ama boboa konan, ma esa nai Ama boboa kiin, fo ai boe oo, toꞌu palenda.”
38 Yesus nataa nae, “Ei dua-nggei taa bubuluk hata fo ei mokek ia. Neu ko Au ia hambu doidosok noꞌun seli. De leobee? Ei maehetuk ei bisa lemba doidosok sila sama-sama mia Au, losa mate do?”✡ Lukas 12:50
39 Ala lataa, lae, “Ai bisa Ama!”
Yesus bala nae, “Memak ei boe oo, neu ko lemba doidosok sama leo Au boe. 40 Tehuu neu ko see ndia nanggatuuk nai Au boboa konang ma Au kiing ndia, Au taa ndia aketun. Ndia Manetualain hak nakeketun ndia. Ana naketu mema kana so, fo see ndia mana manggatuuk nai mamanak ndia.”
41 Ledoeik ana mana tungga feꞌe nala lamanene Yakobis no Yohanis loke leondia, boe ma ala luli lalan seli. 42 Boe ma Yesus noke nala basa sala, de Ana nafada sala nae, “Leoiak! Ei bubuluk basa so, hetu? Hataholi inahuuk mana toꞌu palenda, lateme tuni-ndeni lauinggu nala, losa tala bisa lakababalek. Ma malangga-malangga nala leme hataholi nusak fo taa mana malelak Manetualain, ala fee palenda lala lena-lenak, losa lauinggu nala taa botik lala langga nala. 43 Tehuu ei boso tao leondiak! De see neme ei mai fo ana sangga nau dadik hataholi inahuuk, na, ana musi dadik sama leo mana ono-lau hataholi feꞌek.✡ Lukas 22:25-26 44 Ma see nau daꞌdi malanggan, na ana musi tao aon leo jongos.✡ Mateos 23:11; Markus 9:35; Lukas 22:26 45 Huu Au, Hataholi Isi-isik ia, taa mai fo hataholi ono-lau Au. Tehuu Au mai fo ono-lau hataholi noꞌuk. Au mai fee Au sodang katema tuan fo soi ala hataholi noꞌuk sala-singgo nala.”
Lamatuak Yesus tao nahai hataholi mbokek esa
(Mateos 20:29-34; Lukas 18:35-43)
46 Yesus no ana mana tungga nala ma hataholi noꞌun seli losa kota Yeriko. Ledoeik ala sangga laꞌok lakandoo, boe ma hambu hataholi mbokek esa nanggatuuk hule doik nai dalak bifin. Ndia naden Bartimeos fo Timeos anan. 47 Ledoeik namanene lae mana nesik ndia, na Yesus neme Nasaret mai, boe ma nanggou tingga-tingga nae, “Yesus! Dauk tititi-nonosin aa! Ai mahani taa-taa Ama dook ia so! Kasian neu au dei!”
48 Lamanene ana nanggou leondia, boe ma hataholi la kaꞌin lae, “Wei! O nee-nee dei!”
Tehuu ana boe nanggou natingga seluk, nae, “Yesus! Dauk tititi-nonosin aa! Kasian neu au dei!”
49 Boe ma Yesus hahae de nae, “Ei mian neni ia mai!”
Boe ma ala leu lafadan, lae, “Wei! O nee-nee leo! Ama Mesen noke o. Mai leo!”
50 Namanene leo ndia, boe ma Bartimeos nggali heni lafan, de nambadeik lai-lai, fo neu natonggo no Yesus.
51 Yesus natanen, nae, “O hii hata?”
Hataholi mbokek ndia nataa nae, “Ama! Au oke fo au bisa ita!”
52 Yesus nafada seluk bali, nae, “Huu o mamahele mae Au bisa tao ahai o, de hatematak ia o hai so! De, muu leo!”
Boe ma Bartimeos matan hai tutik. Basa ndia, boe ma ana neu tungga Yesus.
✡10:4 Tui Seluk laꞌeneu Dala Sodak 24:1-4; Mateos 5:31
✡10:6 Tutuik laꞌeneu Sososan 1:27; 5:2
✡10:8 Tutuik laꞌeneu Sososan 2:24
✡10:12 Mateos 5:32; 1 Korintus 7:10-11
✡10:19 Kalua neme Masir mai 20:12-16; Tui Seluk laꞌeneu Dala Sodak 5:16-20
✡10:31 Mateos 20:16; Lukas 13:30
*10:34 Nai dedeꞌa Yunani, ala mulai hinggan neme: leledon ia (= esa), foꞌa (= dua), binesak (= telu), balidemak ( = haa). De, nai dedeꞌa Yunani, (tei tritei heimera) “nai fai katelun” maksud nai dedeꞌa Malai Kotak, na, ndia “neu binesan”. Masaneda huu, Lamatuak Yesus maten neu fai lima (hingga esa) Neu foꞌa main, na, ndia fai nee (hingga dua), Lamatuak Yesus nai lates dale. Neu binesan, na, ndia sosodaꞌina (hingga telu), Lamatuak Yesus nasoda fali. De, tungga ita hihingga fain, na, Ana mate leꞌodaek dua, boe ma Ana nasoda fali.
✡10:44 Mateos 23:11; Markus 9:35; Lukas 22:26