1 Ei boso mafalende heni Au kokolang ia. Hambu neme ei basa nggei ia mai, bei taa mate, tehuu neu ko nita Manetualain palendan, ma koasa inahuun.”

2 Basa faik nee dalen, boe ma Yesus noke Petrus, Yakobis, ma Yohanis fo basa sala ndaꞌe leni lete madema nes esa lain leu. Ledoeik ala losa lain, ala lita Yesus namata-ao feꞌe. 3 Ma Ndia baloꞌa-papaken boe oo, ana daꞌdi fula manggahadok. Nai dae-bafok ia, taa hambu buas esa boe fo fulan lena heni Ndia baloꞌa-papaken ndia. 4 Kada nggengge neuk boe ma ala lita Yesus nakokola no baꞌi Elia ma Baꞌi Musa.

5-6 Petrus asa bii lalan seli. Boe ma Petrus nakandaa losa kokolak nadabak leondiak so. Basa de nafada Yesus nae, “Ama aa! Ita neulau hiak nai ia, maa! De malolenak ai tao mala lalaa anak telu. Esa soeneu Ama, esa feen neu Baꞌi Musa, ma esa bali feen neu Baꞌi Elia.”

7 Basa ndia, boe ma koꞌas konda mai, de mboti nala sala. Boe ma lamanene halak kalua neme koꞌas ndia dalek mai, nae, “Mamanene baa! Yesus ia, na, Au Ana susueng! Ei basa nggei mamanene matalolole neun baa!”✡ 2 Petrus 1:17-18; Mateos 3:17; Markus 1:11; Lukas 3:22

8 Ledoeik Petrus asa lamanene halak ndia, boe ma ala suli lafeok, tehuu nggengge neuk ala taa bisa lita hataholi feꞌek so. Kada Yesus mesa kana.

9 Basa ndia, boe ma Yesus no ana mana tungga nala loe fali leme letek mai. Boe ma Yesus kaꞌi sala nae, “Hata fo isinaak bei fo ei mitan ndia, ei boso mafaꞌda sudi see. Au ia Hataholi Isi-isik. Au musi mate dei. Boe ma, neu ko mete ma Au asoda fali so, na, bei fo ei bole mafada hataholi la.”

10 Ala toꞌu lahele Yesus hala hehelun ndia, de taa lafada hataholi la. Tehuu telu sala latatane aok lae, “Ndia maksud hata, de nae Ana nau ‘nasoda fali neme Ndia mamaten mai’ ndia? Sosoan nae leobee ndia? Talobee ia bae?”

11 Boe ma latanen lae, “Mese anggama la lae, ‘Baꞌi Elia musi mai nahahuluk, bei fo Karistus mai.’ Tehuu tungga Ama, na leobee?”✡ Maleaki 4:5; Mateos 11:14

12 Yesus nataa nae, “Memak tetebes, Baꞌi Elia mai nakahuluk fo sadia dalak fee Karistus, huu Hataholi ndia fo Manetualain tudu mema kana so neme makahulun mai. Tehuu talobee? Ei bei taa bubuluk hata fo ala sula kana nai Manetualain Susula Malalaon, laꞌeneu Hataholi Isi-iisik ndia, hetu? Huu ala sulak memak, lae, dei fo mete ma Ana mai so, na, hataholi la tao lakatotoꞌa kana, losa ala tao lisa Ndia. 13 Tehuu ei musi pasak neulalau ndiꞌidook baa! Baꞌi Elia ndia memak ana mai so. Tehuu hataholi la tao lakatotoꞌa kana, tungga sila hihiin. Ndia boe nandaa no hata fo baꞌi-baꞌi la sulak mema kana so neme makahulun mai.”

14 Leꞌdoeik Yesus no ana mana tungga katelu nala sila latonggo falik lo ana mana tungga feꞌe nala, boe ma ala lita hataholi noꞌu kala lakabubua. Hataholi la sila ala mai lita Yesus ana mana tungga feꞌe nala lasisimbo bafak lo mese anggama la. 15 Ledoeik hataholi noꞌu kala sila lita Yesus, de, ala nggengge, huu lae hetuk Yesus bei nai letek lain. Boe ma lalai leu latonggo lon.

16 Boe ma Yesus natane sala nae, “Ei masisimbo bafak hata nai ia?”

17 Boe ma hataholi esa ana mai de, nae, “Ama, mamanene dei! Au ua au ana touanang mai, fo Ama tao mahai ndia dei. Ana taa bisa kokolak, huu nitu manggalauk nalan. 18 Mete ma nitu ndia nala kakanak ndia dalek, na ana babala kakanak ia neu dae. Basa ndia, na, kakanak bafan nafufude, ma ana henggu nisin. Boe ma aon nakambii sama leo ai. Au oke Ama ana mana tungga nala fo ala husi heni nitu ndia. Tehuu ala taa bisa hata esa boe.”

19 Namanene leondia boe ma Yesus mboka sala nae, “Wei! Ei ia ana seli maa! Au anoli ei taa-taa so, tehuu ei taa bubuluk neulalau. Ma ei taa mamahele tebe-tebe neu Au! De Au musi nggaleloak neu ei losa fai hida? Mia kakanak ndia neni ia mai!” 20 Boe ma ala koꞌo loo kakanak ndia neni Yesus neu. Tehuu ledoeik nitu nita Yesus, boe ma ana bala nabuu kakanak ndia lololi neu dae, losa bafan fufude kala.

21 Basa boe ma Yesus natane kakanak aman nae, “O anam dadi tao leoiak ia, neme fai hidak mai?”

Boe ma aman nataa nae, “Neme kadiꞌi anan mai so. 22 Nitu ndia sangga nae tao nisa kakanak ia dook ia so. Ana tao natuda taa-taa au anang neni haꞌi dale neu, ma nabolon neni oe dale neu. De Ama fali malan dei! Mete ma bisa, na, kasian ai, fo mahai kakanak ia dei.”

23 Yesus nataa nae, “Tehuu hatina de o mae, ‘mete ma bisa’? Memak Au bisa tao ala basa-basan, tehuu sadi hataholi namahele dei!”

24 Basa ndia, boe ma toulasik ndia nataa ma hihii namatani nae, “Ama! Memak au amahele so. De fali mala au, fo au namaheheleng boe natea bali!”

25 Ledoeik ndia, Yesus nita hataholi noꞌuk mai lakaseseti lai ndia. Basa boe ma Ana palenda nitu ndia nae, “Heeh! Nitu manggalauk! O kalua muma kakanak ndia mai, fo ela namanene ma ana bisa kokolak. O boso maso seluk muni kakanak ia dalek mu bali.”

26 Namanene Yesus kokolak nae leondia, boe ma nitu ndia nakau natingga nalan seli. Ana bala nabuu kakanak ndia losa ana leꞌa, bei fo nitu ndia kalua laꞌo elan. Boe ma kakanak ndia ana male leobali sangga maten. Losa hataholi la sila kokolak lae, “Naa! Ana mate so!”

27 Tehuu Yesus toꞌu nala kakanak ndia liman, de nafofoꞌan. Boe ma ana foꞌa tutik leo.

28 Basa boe ma Yesus no ana mana tungga nala laꞌo ela mamanak ndia de ala leni uma esa dalek leu. Latane Yesus nai ndia lae, “Ama! Huu hata de isinaak, ai taa bisa husi mala nitu ndia?”

29 Boe ma Yesus nafada nae, “Mamanene neulalaun! Nitu la memak manggalauk. De metema ei taa hule-haladoi moke tulu-falik neme Manetualain mai, na, ei ta mabeꞌi husi nitu mata leondiak.”

30 Basa ndia, boe ma Yesus no ana mana tungga nala laꞌo ela mamanak ndia, de ala leni nusa Galilea leu. Faik ndia, Yesus taa nau hataholi la bubuluk lae Ndia nai ndia so, 31 huu kada Ana sangga nanoli Ndia ana mana tungga nala. Ana nafada sala, nae, “Taa dook so bali, tehuu ala sangga seꞌo heni Au uu hataholi feꞌek kala. Basa na, ala tao lisa Au, fo Hataholi Isi-isik ia. Memak Au mate, tehuu neu binesan, na, Au asoda fali.”* Nai dedeꞌa Yunani, ala mulai hingga neme: leledon ia (= esa), foꞌa (= dua), binesak (= telu), balidemak (= haa). De, nai dedeꞌa Yunani, (tei tritei heimera) “nai fai katelun” maksud nai dedeꞌa Malai Kotak, na, ndia “neu binesan”. Masaneda huu, Lamatuak Yesus maten neu fai lima (hingga esa). Neu foꞌa main, na, ndia fai nee (hingga dua), Lamatuak Yesus nai lates dale. Neu binesan, na, ndia sosodaꞌina (fai katelun), Lamatuak Yesus nasaoda fali. De, tungga ita hihingga fain, na, Ana mate leꞌodaek dua, boe ma Ana nasoda fali.

32 Yesus nafada leondiak, tehuu ana mana tungga nala lakandaan. Ala taa lambalani latane seluk Yesus maksud ndia hata.

33 Basa ndia, boe ma Yesus asa laꞌo losa Kapernaum. Ledoeik ala maso leni uma dale leu, boe ma Yesus natane ana mana tungga nala nae, “Isinaak ei masisimbo bafak hata ndia neme dala laladak?”

34 Tehuu taa hambu esa nambalani nataa boe, huu lasisimbo bafak leme dala laladak lae, see neme sila basa sala mai, inahuun nai lain seli, neme sila basa sala mai.✡ Lukas 22:24

35 Basa boe ma Yesus nanggatuuk, de nanoli sala nae, “See nau dadik hataholi inahuuk, na, musi sodan dadi tebe-tebe leo hataholi kadiꞌianak fo ono-lau fee basa hataholi la.”✡ Mateos 20:26-27; 23:11; Markus 10:43-44; Lukas 22:26

36 Boe ma Yesus koꞌo nala kakanak kadiꞌik esa nai ndia, de Ana fali neni basa sala laladan neu. Boe ma Ana kokolak, nae, 37 “See nau tungga Au fo ono-lau hataholi anak sama leo kakanak ia, na, ndia sosoan nae, hataholi ndia boe oo, ono-lau Au. Ma ndia boe oo ono-lau Au Amang fo mana madenu Au, uni daebafok ia mai.”✡ Mateos 10:40; Lukas 10:16; Yohanis 13:20

38 Basa ndia, boe ma Yesus ana mana tunggan Yohanis, kalaak nae, “Ama aa! Laꞌi esa, ai mita hataholi esa husi nitu pake Ama naden. De ai kaꞌin, huu ita hataholin taa ndia.”

39 Boe ma Yesus nataa nae, “Heeh! Ei boso kaꞌi hataholi ndia. Huu see pake Au nadeng, fo ana tao tanda heran, na, ana taa kokolak naboo Au nadeng ndia. 40 Mete ma ana taa laban ita, na, sosoan nae ita hataholi ndia boe.✡ Mateos 12:30; Lukas 11:23 41 Masaneneda neulalau baa! Mete ma hambu hataholi bubuluk ei tungga Karistus, boe ma ana tulu-fali ei, na, neu ko Manetualain taa nafalende heni ndia sosotan. Leomae ana fee ei minu kaꞌda oe hiak nggalaas esa boe, tehuu Manetualain taa nafalende heni ndia.”✡ Mateos 10:42

42 Boe ma Yesus nafada selu kasa bali, nae, “Mete ma hambu hataholi tao nasala kakana anak esa, losak taa namahele Au so bali, na, mata neuk leo baa! Malolenak mbaꞌa batu inahuuk esa† Susula dedeꞌa Yunani nae, ‘batu mol’ fo ala pake mol neu hade gandum. neu hataholi ndia lesuhain, fo mabolo henin neni tasi laladan neu.

43 Mete ma o tao salak munik o limam, na tete heni limak ndia leo! Huu malolenak o maso muni nusa-sodak dalek muu, muni kada o limam seli, lena heni o muni o liman dua sala, tehuu ala mbia heni o muni haꞌi naraka dalek muu.✡ Mateos 5:30 44 [Naraka ndia, memak mamana doidosok. Ndia haꞌin taa hambu maten. Ma ulek malai sila kala taa hahae eꞌedok tao kaboo mbuluk].‡ Susula dedeꞌa Yunani isi-isik fo laak nalan seli, taa sulak lalane kahaa hulu haan ia. 45 Mete ma o tao salak munik o eim, na, tete heni eik ndia leo. Huu malolenak o maso muni nusa-sodak dalek muu, mua kada o eim seli, lena heni o muni o eim dua sala, tehuu ala mbia heni o muni haꞌi naraka dalek muu, mua o eim dua sala. 46 [Naraka ndia memak mamana doidosok. Ndia haꞌin taa hambu maten. Ma ulek malai sila kala taa hahae eꞌedok tao kaboo mbuluk.]§ Susula dedeꞌa Yunani isi-isik fo laak nalan seli taa sulak lalane kahaa hulu neen ia. 47 Mete ma o tao salak munik o matam, na edo henin. Huu malolenak o maso muni nusa-sodak dalek muu, mua kada o matam seli, lena heni o muni o matam dua sala, tehuu ala nggali heni o muni haꞌi naraka muu mua o matam dua sala.✡ Mateos 5:29

49 Au nanonoling ia, memak belan seli. De see nau tungga Au, na, ana musi nakatataka tungga nakandoo. Sama leo mbaa fo ala mamasin ma ala seꞌin lenik haꞌi, suek mbaa ndia nala dook.

50 Masik ndia, malole. Ita paken fo tao nalada nanaꞌak. Tehuu mete ma masik ndia mamin so, na, sosoan hata? Ita nggali henin leo. Ei boe oo, musi dadik sama leo masik, fo masoda masueao mia basa hataholi la.

Ei hahae masisimbo bafak mae see ndia inahuuk ma see ndia kadiꞌik!”✡ Mateos 5:13; Lukas 14:34-35