1-2 Niom karkari ta boozomen, keleŋ sua tio ti.

Niom tomtom ta karao pa toono na, kuŋgun talŋoyom pio.

Niom ta sorrokŋoyom, mi niom ta zoyomŋoyom tomini.

Mi niom ta mbio uunu na, mi niom ta leyom koroŋ somŋoyom tomini.

Keleŋ kat sua tabe aŋso i.

3 Pa nio aŋkamam kat ŋgar.

Tana kwoŋ ko ipiyooto sua ta imbot la leleŋ i, bekena aŋpei ŋgar ambaiŋana piom. ✡ Mbo 37:30

4 Iŋgi motoŋ la pa ŋgar turkeŋan pakan,

mi aŋso aŋpatiŋtiŋ kombom, mi aŋpeeze ŋgar tana piom mi aŋso yom pa.

5 Sombe mazwaana ki pataŋana ipet,

mi wal sananŋan mi pakamkaamŋan tiliu yo be tipasaana yo,

nako irao aŋmoto na som. ✡ Mbo 23:4, 27:1

6 Ŋonoono, zin len koroŋ boozo kat.

Tanata tipakurkur zitun,

mi tipase pa koroŋ kizin ma nin izze pa. ✡ Mbo 73:12; 1Tim 6:17

7-8 Mi koroŋ kizin tana ko irao ikamke zin pa meeteŋana na som.

Pa tomtom sa irao ziru Anutu tikam mburooŋo mi iŋgiimi mbotŋana mata yaryaaraŋana na som.

Ŋgar ta kembei, kozo tezem ma imborene kat.

Pa mbotŋana tana na, ka kadoono biibi mete. ✡ 1Pe 1:18+

9 Tana koroŋ kiti sa irao itatke iti pa naala,

mi ikam ti ma tombot ma alok na som. Som kat! ✡ Mbo 16:10; Mt 16:26

10 Iti tuute: Tomtom ta boozomen kola timetmeete.

Zin ŋgarŋan timetmeete raraate kembei wal kankaanaŋan ta len ŋgar somŋan i.

Mi zin ta boozomen kola tizem koroŋ kizin ma imborene lup, mi naman men ma tila. Mi koroŋ kizin ko iwe wal pakan len.

11 Tana naala kizin, ta ko iwe len ruumu be timbotmbot pa ma alok.

Indeeŋe ta matan iyaryaara na, zan bibip. Paso, len toono biibi mi koroŋ boozo.

Mi so timeete na, naala ta iwe len murin be timbotmbot pa, mi iseeŋge iseeŋge ma ila.

12 Tana tomtom ta so zaana biibi mi le koroŋ boozo, ina ambai. Mi irao iko pa meeteŋana na som.

Kola imeete ma ila lene raraate kembei ta zin mbili.

13 Tana wal ta so tipase pa zitun, na zin kankaanaŋan.

Kere la pa mbulu ta iwedet pizin mi zin wal ta lelen pizin mi tito zin pa mbulu kizin, to kikilaala. ✡ Lu 12:20

14 Zin kembei sipsip ta timbit zin be tipun zin i.

Pa meeteŋana ko iyaaru zin ma kaŋkaŋ ma tisula Andewa.

Tana meeteŋana ko imborro zin,

mi Andewa iwe len murin be timbotmbot pa mi tibuuzu.

15 Mi nio na, Anutu ko ikamke yo.

Ni ko itatke yo pa meeteŋana mburaana,

mi ikam yo ma aŋla aŋbot raami. ✡ Mbo 56:13; 1Kor 15:51+; 1Tes 4:13+

16 Tana sombe tomtom sa, ni indoundou le pat,

mi ruumu kini bok pa koroŋ ndabokbokŋan boozo,

na kam ŋgar boozo pini pepe.

17 Pa sombe imeete, na irao ila raama koroŋ kini tana som.

Koroŋ kini ndabokbokŋan tana ko irao ito i ma isula naala na som. ✡ Lu 12:15+; 1Tim 6:7

18-19 Indeeŋe ta tomtom tana mataana iyaryaara ma imbotmbot na,

ire kembei ikam mboti ambaiŋana kat.

Mi tomtom tipakurkuri paso, tire i kembei ni irao kat.

Tamen ni kola imeete, mi igaaba tumbuunu bizin ma isula zugut muriini.

Lele tana, zin wal ta so tisula, nako tire mat sa mini som.

20 Tana tomtom ta so zaana biibi mi le koroŋ boozo, mi tamen le ŋgar ambaiŋana som,

na ni kola imeete ma ila lene raraate kembei ta zin mbili.