1 ካኣቲ ሴሎሞኔ ጌኤዦ ማኣሮ ማዾ ቢያ ማዺ ጋፒሴስካፓ ዒዛኮ ዓዴ፥ ዳውቴ ናንጊና ናንጋ ጎዳም ዱማሴ ቢሮንታ ዎርቆንታ፤ ዬያጉዲ ሃሣ ሜሌ ባኮዋ ቢያ ጌኤዦ ማኣሮይዳ ዓኣ ሜሆ ጌሦ ማኣሮ ጌልዜኔ። 2ሳሙ. 8፡11፤ 1ፆኦሲ. ዓሃኬ 18፡11።

2 ዬካፓ ካኣቲ ሴሎሞኔ ናንጊና ናንጋ ጎዳኮ ጫኣቁሞ ሳኣፂኖ ዳውቴ ካታሞ ማዔ፥ ፂዮኔይዳፓ ሃንጋ ጌኤዦ ማኣሪ ዔኪ ሙካንዳንጉዲ ኬኤዛኒ ዒስራዔኤሌ ዓሶኮ ጋርቾ ዓሶና ፃጶ ፃጶንታ ማኣሮ ማኣሮንታኮ ሱኡጎ ቢያ ዬሩሳላሜይዳ ቡኩሴኔ። 2ሳሙ. 6፡12-15፤ 1ፆኦሲ. ዓሃኬ 15፡25-28። 3 ዒስራዔኤሌ ዓሳ ላንካሳ ዓጊኖይዳ ዉልሾ ዴማ ቦንቻ ቦንቾና ካኣቲ ዔኤሌ ዓሳ ቢያ ዬሩሳላሜይዳ ሙኪ ቡኬኔ፤ 4-5 ዒስራዔኤሌ ዓሶኮ ሱኡጋ ቢያ ፔቴይዳ ቡኪንቴ ዎዶና ሌዊ ዓሳ ጫኣቁሞ ሳኣፂኖ ኬዲ ጌኤዦ ማኣሪ ዔኪ ዬዔኔ፤ ዬያጉዲ ሃሣ ቄኤሶንታ ሌዊ ዓሶንታ ዓፒሎና ማዢንቴ ናንጊና ናንጋ ጎዳ ካኣሽኪንታ ማኣሮና ጋሮይዳ ዓኣ ፆኦሲ ማዾም ዱማዼ ሜሆዋ ቢያ ጌኤዦ ማኣሪ ዔኪ ዬዔኔ። 6 ዒማና ካኣቲ ሴሎሞኔንታ ዴሮንታ ቢያ ጫኣቁሞ ሳኣፂኖኮ ቤርቶ ዛላ ሙኪ ቡኬኔ፤ ሚርጉማፓ ዔቄያና ፓይዲንታኒ ዳንዳዑዋ ዺቢ ማራይንታ ባይንታ ዒንጎ ባኣዚ ማሂ ናንጊና ናንጋ ጎዳም ዔያታ ሺኢሼኔ።። 7 ቄኤሳ ናንጊና ናንጋ ጎዳኮ ጫኣቁሞ ሳኣፂኖ ጌኤዦ ማኣሪ ዔኪ ጌላዖ ዑሣ ዓኣዼ ዱማዼ ጋሮይዳ ዓኣ ኪሩቤሌ ጋኣዞ ዴማ ጌሤኔ። 8 ዒማና ፒሺንቲ ዓኣ ኪሩቤኤሎኮ ጋኣዛ ጫኣቁሞ ሳኣፂኖንታ ሳኣፂኖ ኬዶና ዛጳሢ ሚፆንታ ካንቂ ዓኣቼኔ። 9 ዛጳሢ ሚፃ ኮሺ ዖዶሲታሢሮ ዑሣ ዓኣዼ ዱማዼ ጋሮኮ ቤርቶ ዛላ ዔቄ ዓይጎ ዓሲያማዖም ዴንቃኒ ዳንዳዓኔ፤ ጋዓንቴ ሜሌ ዛላና ዔቄ ዓሲ ፔቴታዖ ዴንቃኒ ዳንዳዑዋሴ፤ ዬንሢ ዛጶ ሚፆንሢ ሃኖ ሄላንዳኣና ዒኢካ ዓኣኔ። 10 ዬያ ጫኣቁሞ ሳኣፂኖ ጋራ ዒስራዔኤሌ ዴራ ጊብፄይዳፓ ኬስኬንቴ ናንጊና ናንጋ ጎዳ ዔያቶና ዎላ ጫኣቁሞ ጫኣቄያና ሙሴ ሲና ዹኮይዳ ጫኣቁሞ ሳኣፂኖ ጋራ ጌሤ ላምዖ ሹጮ ዓርሶናዞንሢዳፓ ዓታዛ ሳኣፂኖ ጋራ ሜሌ ዓኣ ባኣዚ ባኣሴ። ላሚ. ዎማ 10፡5።

11 ቄኤሳ ጌኤዦ ማኣራፓ ኬስኬኔ፤ ዬያታ ቄኤሳ ቢያ ዔያቶ ማዾንጎ ጎዖና ኬሎ ማዒባኣቴያ ቢያሢ ፔና ጌኤሺ ናንጊና ናንጋ ጎዳም ዱማሴኔ። 12 ፆኦሲ ቦንቾም ዓይኑሞ ዓይናዻ ሌዊ ዓሳ ቢያሢ፥ ዓሳኣፔ፥ ሄማኔንታ ዪዱታኔንታ፤ ዔያቶኮ ዓቲንቆ ናኣቶንታ ዒጊኖንታ ቢያ ሚዛጲ ሻኣዣ ማኣዖ ማይንቲ ዓኣኔ፤ ሌዊ ዓሳ ዒማና ዑኡቱቡሎንታ ፔቴ ሻሺ ዴንሢ ዋርቆ ጎኦሎዋ ዔኪ ናንጊና ናንጋ ጎዳም ዒንጎ ባኮ ሺኢሾ ቤዞኮ ዓባ ኬስካ ዛሎና ዔቂ ዓኣኔ። 13-14 ዔያቶና ዎላ ዛዬ ዋርቃ ፄኤታና ላማታሚ ማዓ ቄኤሴ ዓኣኔ፤ ዬያታ ፆኦሲ ቦንቾም ዓይኑሞ ዓይናዻ ዓሳ ዛያሢንታ ዑኡቱቡላሢንታ ፔቴ ሻዦ ዴንሢ ዋርቆ ጎኦሎንታ ሜሌ ባኮዋ ዖልሲ ዖልሲ ሂዚ ጌዒ ዓይናዺ ፔቴ ዑኡሲና ናንጊና ናንጋ ጎዳ ጋላታኔ።

ዒማና ዔርቲባኣንቴ ፆኦሲኮ ቦንቾ ፔጋሲ ዻዋ፥ ዓኣፒዳ ዱዱካ ፖዒ ፖዓ ሻኣሬ ናንጊና ናንጋ ጎዳኮ ጌኤዦ ማኣሮ ኩሜሢሮ ቄኤሳ ካኣዦ ማዾ ማዻኒ ዳንዳዒባኣሴ። 1ፆኦሲ. ዓሃኬ 16፡34፤ 2ፆኦሲ. ዓሃኬ 7፡3፤ ዒዝ. 3፡11፤ ዓይኑ. 100፡5፤ 106፡1፤ 107፡1፤ 118፡1፤ 136፡1፤ ዔር. 33፡11። ኬሲ. ማፃ 40፡34-35።