1 ዬካፓ ዳውቴ ፒሊስፄኤሜ ዓሶ ዖሊ ባሻዖ ዓሶ ፔ ዴማ ማሄኔ፤ ዒማና ዒዚ ሳዖ ዔያቶኮ ጌሊ ዓርቂ ዔኬኔ።

2 ሄሊሳዖ ሃሣ ሞዓኣቤ ዓሶ ዖሊ ባሼኔ፤ ዒዚ ዓርቂ ዔኪ ቱኬ ዓሶ ሳዓ ላይሣዖ ሃይሦ ዓሲዳፓ ላምዖ ዓሲ ዔኪ ዔኪ ሃይቃንዳጉዲ ዎጊ ዎዺሻኔ፤ ዬያሮ ሞዓኣቤ ዓሳ ዒዛም ዎርቃያ ማዒ ጊኢራኔ።

3 ጊንሣ ሃሣ ዒዚ ሶኦሪያ ዓጮ ዴማ ዓኣ፥ ፆኦባ ዓጮኮ ካኣቲ ሬሆቤ ናኣዚ ሃዳድዔዜሬ ዖሊ ባሼኔ፤ ሃዳድዔዜሬ ዖሎና ባሺንቴሢ ኬዶ ዛሎ ዔፕራፂሴ ዎሮኮ ዓኣ ዒዛ ዓጮ ማሂ ዔካኒ ዓኣዺቤቃኬ። 4 ዳውቴ ሃዳድዔዜሬኮ ፔቴ ሺያና ላንካይ ፄኤታ ፓራሢና ዖላ ዓሲ፤ ላማታሚ ሺያ ቶኪና ሃንቲ ዖላ ዓሲ ዲዒ ዔኬኔ። ሳርጌሎ ዖይቶ ጎቻንዳ ፔቴ ፄኤታ ፓሮ ዓይሳዖ ሃንጎዋቶኮ ጉቤ ቃዎ ቲቂ ቲቂ ማኣሳንሤኔ።

5 ዒማና ዴማስቆይዳ ናንጋ፥ ሶኦሪያ ዓሳ ካኣቲ ሃዳድዔዜሬ ማኣዳኒ ፖኦሊሴ ዳካዛ ዳውቴ ዬያቶ ዖሊ ላማታሚ ላምዖ ሺያ ዓሲ ዎዼኔ። 6 ዬካፓ ዔያቶ ዓጮ ጋሮይዳ ፖኦሊሳ ዱንኪ ዱንኪ ዴዓንዳ ቤሲ ኮሼኔ፤ ዬያሮ ሶኦሪያ ዓሳ ዒዛ ዴማ ዎርቂ ዒዛም ጊኢሬኔ፤ ናንጊና ናንጋ ጎዳ ዳውቴ ዴንዳ ቤዞ ቢያይዳ ዖሎና ባሻንዳጉዲ ማሄኔ። 7 ዳውቴ ሃዳድዔዜሬኮ ዖሎ ዓሶ ዓይሣ ዓሳ ዓርቂ ዓኣ ዎርቆና ኮሾና ጊቲሞ ዲዒ ዔኪ ዬሩሳላሜ ዴንዴኔ፤ 8 ዬያጉዲ ሃሣ ሃዳድዔዜሬ ዎይሣ፥ ቤፃሄና ቤሮታዬ ጌይንታ ካታሞንሢፓ ዺቢ ሞኦና ዓንጊ ዔኬኔ።

9 ሃዳድዔዜሬኮ ፖኦሊሶ ጉቤ ዖሎና ዳውቴ ባሼሢ ሃማቴ ካኣቲ፥ ቶዒ ዋይዜኔ። 10 ሃዳድዔዜሬ ዖሎና ባሺንቴሢሮ ዒ ዎዛዼያታሢ ዔርዛንዳጉዲ፤ ሃሣ «ዎዚ ዓኣይ?» ጌይ ዖኦጫንዳጉዲ ዒዛኮ ናኣዚ ዮራሜ ዳውቴ ኮይላ ዒ ዳኬኔ፤ ዬያኮ ቤርታ ቶዒ ጎዖሢ ሃዳድዔዜሬና ዎሊ ዖላያኬ፤ ዮራሜ ዒማና ዎርቄንታ ቢራ ዓንጊንታ ሃሣ ሞኦና ዓንጊና ኮሾና ዱማ ዱማ ባኣዚ ዒንጋኒ ዳውቴም ዔኪ ሙኬኔ። 11-12 ካኣቲ ዳውቴ ዖሎና ባሺ ዔዶኦሜፓ፥ ሞዓኣቤፓ፥ ዓሞኦኔፓ፤ ዬያጉዲ ፒሊስፄኤሜንታ ዓማሌቄንታፓ ዲዒ ዔኬ ቢሮ ዓንጎና ዎርቆና ሃዳድዔዜሬፓኣ ዒ ዔኬ፥ ዲዒንቴ ባኮ ናንጊና ናንጋ ጎዳም ዱማሲ ዒንጌኔ።

13 ሶኦጌ ዶኦቺ ጌይንታ ቤዛ ታጶ ሳሊ ሺያ ዔዶኦሜ ዓሲ ዳውቴ ዎዺ ማዓዖ ቤርታኣስካፓ ባሼ ዔርቴ ዼኤፒ ዓሲ ማዔኔ፤ ዓይኑ. 60። 14 ዬካፓ ዳውቴ ፖኦሊሳ ዱንኪ ዴዓንዳ ዺቢ ቤሲ ዔዶኦሜይዳ ኮሼኔ፤ ዒኢካ ናንጋ ዴራ ዒዛ ዴማ ማዒ ዒዛም ጊኢሬኔ፤ ዳውቴ ዴንዴ ቤዞይዳ ቢያ ዖሎና ባሻንዳጉዲ ናንጊና ናንጋ ጎዳ ዒዛ ማኣዴኔ።

15 ዬያይዲ ዳውቴ ዒስራዔኤሌ ዓጮ ቢያይዳ ካኣቲ ማዓዖ ፒዜ ዎጌ ዎጊንታንዳጉዲ ቢያ ኬሊ ካራ ኮዓኔ፤ 16 ዒማና ፄሩያ ናኣዚ፥ ዒዮዓቤ ፖኦሊሶ ሱኡጋሢ ማዓዛ ዓሂሉዴ ናኣዚ ዒዮሳፒፄ ካኣቲ ሄሊሲ ቢታንቶ ዓኣ ዓሲኬ፤ 17 ዓሂፁቤ ናኣዚ፥ ሳዴቄና ዓቢያታሬ ናኣዚ፥ ዓቢሜሌኬና ቄኤሶኬ፤ ሴራያ ጎዖሢ ካኣቱሞ ማኣራ ፃኣፖ ባኣዚ ፃኣፓያኬ፤ 18 ዮዳሄ ናኣዚ፥ ቤናያ ዳውቴ ካፓ ፖኦሊሶ ዓይሣያኬ፤ ዳውቴኮ ናኣታ ዒማና ቄኤሴ ማዒ ማዻኔ።