1 Kalan Jesus kan cha disipulusla, “Tuttuwaʼn maawis chi tagu un makabyasuɏ kan Apudyus. Ngim kadchegu taguʼn mangwa si makabyasuɏan cha uchum! 2 Un-ulloy chi ibitinla biletun gilingan si byegangla ked lantup-ung si byeybyey lu siya mangmangwa si makabyasuɏan cha allaʼn achipun lootong chi pammaticha. 3 Ked ammanyu tanchaalan chi koonyu!

“Lu makabyasuɏ suludlu, byegbyegaam ked lu mambyabyawi, pakawalom. 4 Lu mangam pitu makabyasuɏ kan sika si osaʼn eɏgew ya langam pitu bo umali kan sika un mampakawan, masapuɏʼn pakawalom.”

5 Kalan cha apostoles kan Apu Jesus, “Pakoscheɏom u pammatimi.”

6 Summongbyat si Jesus, “Lu awed pammatiyu un isun chi kapaat un bukeɏn chi mustasa, makwaʼn kalanyu si allaʼn kayuʼn sikamuru, ‘Mabyagutka ked limuɏaka si byeybyey.’ Ked tuttuwaon chikayu.”

7 Intuɏuy Jesus un lan-ugud, kalala, “Lu awed osa kan chikayu awed bubùulolaʼn manchelok willu man-ayyuwan si keɏlilu ked lu gumatong si byeɏoylu un lampeɏpu si payaw, ha kalam kamman kan siya, ‘Chesom ta manganka?’ 8 Chakampun! Ngim ibyegam kan siya, ‘Ingka pasantan chi siluplu ya iyalam cha kalok umula asika ot mipasali mangan.’ 9 Masapuɏ kamman un manyamanka si bubùulom ti tiluttuwala imbilinlu? Chakampun! 10 Isula bo kan chikayu. Lu tiluttuwayu losan cha imbilin Apudyus kan chikayu, achipunyu kalan un, ‘Bubùulon chikami laing, kingwami biyangmi.’ ”

11 Intuɏuy cha Jesus ummoy ud Jerusalem ot langoycha si lambyeatan Samaria kan Galilee. 12 Alla pun un lichuumcha si osaʼn ili, liyabot cha simpuɏuʼn leɏaki un losan cha laleprosy. Bummettawacha un summiked, 13 ot lampokawcha un kalancha, “Apu Jesus! Kacheguwam u chikami.”

14 Intullong pun Jesus chicha, kalala, “Ingkayu ipaila cha long-egyu kan cha papachi ta maluttuwaancha un lakaan chi sakityu.”* 17:14 Leviticus 14:1-8 Si inggewancha si chaɏan, lummin-awacha.

15 Intullong pun chi osa kan chicha un lakaan chi sakitla, lapalauli kan Jesus ot inyip-ipkawlaʼn lanchayaw kan Apudyus. 16 Lampalintuming siya si sangwalan Jesus ot lanyaman kan siya. Hachiʼn leɏaki ked iSamaria.

17 Oli pun kalan Jesus, “Chakampun kamman un simpuɏucha un lummin-awa? Chimma ummoyan cha siyam? 18 Puggey un abus laoy un ossaan un kakkaili langulin lanyaman kan Apudyus?” 19 Ot kalan Jesus kan siya, “Lumibbyatka ta ingkan. Gapu si pammatim, lummin-awaka.”

20 Si lamingsan ilimus cha uchum un Pariseo kan Jesus lu kam-anman chi gumatngan chi Mampangatan Apudyus? Silongbyatan Jesus chicha, kalala, “Lappun ustù sinyeɏ un mangitullongan si gumatngan chi Mampangatan Apudyus. 21 Ya lappun bo mangibyegan, ‘Itullongyu, alla utla!’ willu ‘Anchiya!’ Ti awed kan chikayu Mampangatan Apudyus.”

22 Oli pun kalan Jesus kan cha disipulusla, “Chumtong chi timpu un pionyuʼn mitullong chi osaʼn eɏgew un mangulilan chi Alak chi Tagu, ngim achipunyu mitullong hachiʼn timpu. 23 Ked lu awed mangibyega kan chikayu, ‘Itullongyu udchi!’ willu ‘Itullongyu utla!’ Ngim achiyu umoy sington. 24 Ti Sakon un Alak chi Tagu lu mangulilak, isun chi sumlitan chi kilat un lappun achi mangitullong ti lilangala losan utla pita. 25 Ngim masapuɏʼn umula mapaligatan si amod ya issalak kan cha tagu si salaʼn lolap.

26 “Isun chi timpun Noah chi makwa si eɏgew un mangulilan chi Alak chi tagu. 27 Ha timpun Noah, cha tagu langa-langancha, ummilu-ilumcha ya langas-asawacha inggala si eɏgew un lilumlokan cha Noah si bapur. Ot gummatong chi litap utla pita ot laamincha laalud.† 17:27 v. 26-27, Genesis 6:5-8, 7:6-24

28 “Isun bo chi lakwa si timpun Lot. Cha tagu langa-langancha, ummilu-ilumcha, ngummilangilacha ya lallakulakucha, lammuɏa-muɏacha ya lampappaudcha si byeɏoy. 29 Ha eɏgew un lalelalan cha Lot ud Sodom, ummuchen si apuy ya asupli un lampeɏpuʼd langit ot lilasapla chicha losan.‡ 17:29 v. 28-29, Genesis 18:20--19:25

30 “Kamatchi bo makwa si eɏgew lu mangulin mampaila chi Alak chi Tagu.

31 “Si hachiʼn eɏgew, ha taguʼn awed si otop chi byeɏoyla, achipun makwaʼn lumlok mangaɏad cha alikamola. Isun chi taguʼn inggew si tattaɏun, achipun mangulin si byeɏoyla. 32 Somsomkonyu lakwa si asawan Lot!§ 17:32 Genesis 19:26 33 Ha taguʼn piolaʼn taguwon chi biyegla ked mataɏakla mit laing. Ha taguʼn mangkasutala biyegla gapu kan sakon ked matatagu ing-inggala. 34 Ibyegak kan chikayu, si hachiʼn labi chuwa cha masusuyop si osaʼn katli, maaɏa osa ya matelan chi osa. 35 Ked awed chuwaʼn byebyaiʼn mambyayu, maaɏa osa ya matelan chi osa. 36 Ked awed bo chuwaʼn leɏakiʼn lasiput, maaɏa osa ya matelan chi osa.”

37 Ot ilimus cha disipulusla, “Apu, udma makwaan chi lait?” Ot kalan Jesus, “Lu chilu awechen chi lecheg, hachi mauppulan cha bukaw.”