1 Oli pun kasin lan-alig si Jesus kan cha disipulusla, kalala, “Inggew chi osaʼn byaklang un langipiyeɏ si losan un kukkuwala si osaʼn man-aayyuwan. Ngim chingngeɏn chi hachiʼn byaklang un gasgastuwola pilakla. 2 Ot impaayegla siya ot kalala, ‘Simma allaʼn chongchongɏok un pin-am koon? Amilom ilista cha losan un killingwam mipanggop si cha impiyeɏk kan sika ti kaalok sika si kawachim.’

3 “Simsimmok chi man-aayyuwan lu silu ustuʼn koola. Ot kalala, ‘Simma ga kook ti allaʼn kaalolak si ap-apuk? Chakpun ammuʼn mamayaw ya mabiilak un mampalimus. 4 Katla kook, ulay lu kaalolak si kawachik, makwaʼn mangiliyolak kan cha biɏunku si byebbyeɏoycha.’

5 “Ot ilayagela losan cha ummutang si ap-apula ot silin-ossala ilimus. Ilimusla si ummula, ‘Piga utanglu si ap-apuk?’ 6 Kalala, ‘Singgasut un amutuʼn apɏus.’ Ot kalan chi hachiʼn man-aayyuwan, ‘Alliya listaan chi utanglu. Pinmaam ta obsonta limampuɏu utanglu.’ 7 Ot ilimusla si osa, ‘Piga utanglu si ap-apuk?’ Ot kalala, ‘Sillibuʼn siɏup un wheat.’ Ot kalan chi hachiʼn man-aayyuwan, ‘Alliya listaan chi utanglu, pinmaam ta obsonta si waɏun gasut.’ ”

8 Lagamput pun, laammuwan chi apula kilasikap chi man-aayyuwalola, ot chilayawla kilalaingla. Ot kalan Jesus, “Tuttuwa cha achipun mamati kan Apudyus, lasiksikapcha si kooncha lu cha mamati.”

9 Intuɏuy Jesus un lantudtuchu kan chicha, kalala, “Ha ibyegak kan chikayu useɏonyu kilabyaklangyu utla pitaʼn makabibiɏulanyu ti lu maamin, maawat kayuʼd langit un mataguwanyu ing-inggala. 10 Ha taguʼn mapiyeɏ un mangchon si paat un byaleg, mapiyeɏ boʼn mangchon si chakeɏʼn byaleg. Ngim ha taguʼn achipun mapiyeɏʼn mangchon si paat un byaleg, achipun bo mapiyeɏʼn mangchon si chakeɏʼn byaleg. 11 Ked lu achipun kayu mapiyeɏ un mangchon si bilaklang utla pita, silu mangipiyeɏ kan chikayu si tuttuwaʼn bilaklang ud langit? 12 Ya lu achipun kayu mapiyeɏan un mangchon si kukkuwan cha uchum, silu ma asi mangatod kan chikayu si kukkuwa un mangkuwayu?”

13 Ot kalan bo Jesus, “Lappun bubùulon un mansimbi si chuwaʼn ap-apu. Ti memeɏyed si osa ya mansasanga si osa. Ked potpotgola osa ya am-amsiwola osa. Achipun makwaʼn manchisalon un mansimbi kan Apudyus ya bilaklang.”

14 Chingngeɏn pun cha Pariseo hachiʼn intudtuchun Jesus, ilamsiwcha siya ti memeɏyedcha si pilak. 15 Kalan Jesus kan chicha, “Ipappailayu kilabiɏuyu si sangwalan cha tagu, ngim ammun Apudyus chi awed si somsomokyu. Cha lapotog si somsomok cha tagu, lappun puutla si sangwalan Apudyus.

16 “Ha lintog Moses ya cha inggilin cha propeta si awi, hachi latungpeɏ lasuɏut inggala si timpun John un Mambubunyeg. Lallugi si hachiʼn timpu, libyegbyega Bibiɏuʼn Chameg mipanggop si Mampangatan Apudyus ya achu mangipatut un mipati. 17 Ngim lalaklaka maumasan chi allaʼn langit ya pita lu ha simpattok un lintog Apudyus.”

18 Ot kalan bo Jesus, “Lu silu leɏakiʼn mangichang si asawala ked langasawa si sabyali, makabyasuɏ si chegchegas. Ked lu silu leɏakiʼn mangasawa si hachiʼn byebyai un laichangan, makabyasuɏ si bo chegchegas.”

19 Intuɏuy Jesus un lantudtuchu, kalala, “Inggew chi osaʼn byaklang un mangkangila silupla ya ileɏgew un mampalagsak si kakan. 20 Ked inggew bo osaʼn kapus un mangngachen Lazarus, un laplu si gagateɏ long-egla. Ileɏgew un mibyabyakseɏ si sawang chi byaklang, 21 ti piolaʼn kalon chi bugta un maodcheg si lamisaan chi byaklang. Pin-an cha asu umoy chinchilan cha gagateɏla.

22 “Si osaʼn eɏgew, latoy chi hachiʼn kapus ot intallay cha angheles siya ummoycha incheeg kan Abraham ud langit. Latoy bo byaklang ot illimboncha. 23 Ot lipooy ud Hades un inggewan cha latoy un patungedla tilotoman chi ligat. Lantanged pu hachiʼn byaklang, intullonglà Abraham si adchayuwan ya si Lazarus un lichecheeg kan siya. 24 Ot lampokaw chi byaklang, ‘Ama Abraham! Kacheguwalak u ya ibuunlu si Lazarus ta ilusongla gammatla si chelum ked itodtodla si chilak ta matunglilan, ti allaʼn patungedku tilotoman chi atung chi allaʼn apuy!’

25 “Ngim kalan Abraham, ‘Somsomkom alakku, si katattagum utlat pita mallin-awa biyeglu. Ngim si Lazarus tilotomala cha ligat. Ngim si sala, lummin-awa si Lazarus utla ked sika manligligatka utlat. 26 Chakampun si abus hachi, ti allat chi mallusgong un gitang un lamechak kan chitaku, ked ulay awed piolaʼn umali utla, achipun makwa ya cha awed utlat, achipun makachemang un umali utla.’

27 “Hachi ked kalan chi byaklang, ‘Ama Abraham, mangkadkacheguwak kan sika ta ibuunlu si Lazarus ud byeɏoy cha amak, 28 ti awed cha limaʼn susuludkuʼn lelleɏaki, ta umoyla byegbyegaan chicha ta achipuncha otyan umali si allaʼn lugeɏ un amod chi ligat.’

29 “Ngim kalan Abraham, ‘Awed cha inggilin Moses ya cha propeta un mamegbyega kan chicha. Masapuɏ otyan un chongɏoncha chi itudtuchucha kan chicha.’

30 “Ot kalan chi byaklang, ‘Achipun umalay lait, ama Abraham! Ngim lu awed osà umuli matagu kan cha latoy un umoy mangibyega kan chicha, mambyabyawicha kan cha byasuɏcha.’ 31 Ngim kalan Abraham, ‘Lu achipuncha chongɏon cha inggilin Moses ya cha propeta, achipuncha mit laing mamati, ulay lu awed umuli matagu osa.’ ”