1 Bu benbekad ngalengarre Sabbad [Sabbath] bu yakminj, wanjh kunkudji bu kam-yimerranj Sunday bu djarreh kam‑barrhbom, wanjh Meri Makdelen mak ngal-buyika Meri bene-wam bene‑bolk‑nang kure ku‑midj kure kuwardde-rurrk.

2 Kaluk kunekke rerrih kunkimuk bolk-rokang. Andjel nuye nawu Kaworhnan Rowk kam-koluy kure kaddum-beh, wam kure kuwardde‑rurrk, wanjh wardde-djirrkkang manbu manwardde‑kimuk. Wanjh rerrkang kure kuwardde kaddum. 3 Kaluk nungka kuk-waydi yiman namarrkon kah-mayhke mak kun‑madj nuye djongbu-djongburrinj madj-beleminj yiman ka‑yime waydi kunngol. 4 Nawu birri-bang birri-dang-nahnang nakka wanjh birri‑keleminj bu birri-nang nawu andjel, mak birri-deldelmeng, mak birri‑kuk‑mankang yiman rerrih birri-doweng.

5 Wanjh andjel ben-marneyimeng daluk bokenh, “Yuwn ngune‑kele, ngayi nga-bengkan bu ngudda nguneh-yawan Jesus nawu birri‑kuk‑barnnameng kure kundulk cross. 6 Nungka minj kondanj ka-rri. Nungka Kod bi-rrolkkayhweng kure yimeng ngudberre. Ngunem-ray ngune-bolk-nan kure kundarrkid nuye birri-kurrmeng. 7 Werrk ngune-durnde ngurrben-marneyimen nawu ben‑bukkabukkang nuye. Ngurrben-marneyimen, ‘Jesus yawoyh‑dolkkang kure kundowi‑ken. Nungka ka-rrokme ngun‑madbun ngudberre kure Kalili kaluk kumekke ngurri-nan.’ Mane kunwok ngurrben‑marneyimen. Ngayi ngam-wam marneyime ngurrewoneng.”

8 Kaluk nawu daluk bokenh werrk bene-bolk-bawong kumekke wanjh bene‑marrkinwam. Bedda bene-djurrkwong, mak bedda bene‑keleminj warridj. Bene-djareni bindi-marne-mulewayinj bininj nawu ben-bukkang nuye Jesus kure baleh yimeng. 9 KKumekke minj djarreh bene-rlobmeninj, kumekke bene‑darnh‑nang kumirrk Jesus. Ben‑ngeybom berrewoneng. Wanjh nawu daluk bokenh benem‑yikang darnkih bene‑marne‑bard‑durrungkulhdanj nuye bene‑denge‑karrmeng. 10 Jesus ben-marneyimeng berrewoneng, “Minj ngune-kele. Ngune‑ray ngurrben-marneyimeng nawu ngayi ngarri-danginj kabirri‑re kure Kalili kaluk kumekke ngandi-nan.

11 Wanjh kumekke nawu daluk bokenh bindi-yikang bininj nawu ben‑bukkang nuye Jesus. Wanjh nawu birri-nang birri‑dang‑nahnang birri-wam kure kubolk-kimuk, mak bindi‑marne‑yolyolmeng nawu birri-kihkimuk djungkay kure baleh yimerranj bedberre. 12 Wanjh djungkay birri-kaberrk-raworrinj bininj nawu dabborrabbolk deleng, wanjh birri-karre-marnbom. Bu bedda birri-djareni nawu birri-bang birri-kurrinj. Bu bedda bindi‑karre‑mulewam nawu birri-bang nakimuk kunwardde. 13 Bindi-marneyimeng, “Ngurrben-marneyimen nawu bininj, bu bininj nawu Jesus ben-bukkabukkang birrim-wam kukak bu birri‑djirdmey kure ngudda ngurrih-kodjdjeyoy. 14 Bu ‘governor’ ngun-wobekkan ngudberre bu kuneng-ken, kaluk ngadman ngarri-wokdi, minj nun-djuhbun ngudberre. Yuwn ngurri-njilng-warre.” 15 Wanjh birri-bang birri-mey kunwardde. Birri-wam wanjh bindi‑marneyimeng kure birri-wern bininj, bindi-kurrinj. Wanjh birri‑wern bininj nawu Jews birri-bekkang manekke ka-kurren kunwok. Wanjh kumekke birri-wern bininj nawu Jews kabirri‑woybukwon munguyh manekke manu ka-kurren kunwok.

16 Nawu birrimekke 11 nawu ben-bukkabukkang nuye birri-wam kure Kalili wanjh birri-wam kure mandulum, kure Jesus ben‑marneyimeng wanjh kumekke birri-narren. 17 Wanjh kumekke bedda birri-nang Jesus, wanjh birri‑marne‑bard‑durrungkulhdanj nuye. Kaluk birri-buyika minj birri‑woybukwoyi bu nungka dolkkang. 18 Wanjh Jesus kam-wam kure darnkih bedberre. Ben‑marneyimeng, “Nawu Ngabbard ngan-wong kunngudj nuye, nga-karrme kunngudj nuye. Nga-worhnan rowk kure kaddum kure kondanj kukurlk. 19 Wanjh ngurri-ray kure birri-warlah-ken bininj nawu birrim‑dolkkang kubolk-bubuyika kuwern. Mak ngurrben-bukka ba ngayi ngandi-kadjung. Ngurrben-kodjdjuhkemen kure kunngey Ngabbard, Beywurd, Nawaralmakkayken. 20 Ngurrben-bukkabukka kuwern rowk kure marneyimeng ngudberre ba ngayi ngandi-wok-marrkmang. Woybukki ba karri-djarrk-re ngayi dorrengh munguyh mak kure ka‑yi‑ngurdme rowk.