1 Bu djarreh kam‑barrhbom, nawu birri‑kihkimuk djungkay mak nawu kabirri‑wohrnan dabborrabbolk birri‑wokmarnburrinj bu Jesus wanjh kabirri‑bun ka‑rrowen. 2 Kumekke birri‑dukkang wanjh birri‑kang kure worhnang nawu ka‑ngeyyo Baylad [Pilate]. Nungka nakang Rome.

11 Jesus wam kure kumirrk nuye Baylad nawu worhnang. Nungka bi‑djawam, “Yiddok ngudda yi-worhnan nawu bedberre Djuws [Jews] bininj?” Jesus bi‑marneyimeng, “Yoh. Makka nguddangke kunwok.” 12 Nawu birri‑kihkimuk djungkay mak dabborrabbolk birri‑djuhbom Jesus, nungka minj wokdiwirrinj. 13 Wanjh Baylad bi‑marneyimeng Jesus, “Yiddok ngudda minj yi‑bengkan bu ngundih‑djuhbom kure njalehnjale‑kenh?” 14 Jesus minj ben‑wokmayinj bu yimeninj kure kunwern birri‑djuhbom. Wanjh Baylad yimeng, “Njalekenh minj yiben‑wokmang?”

15 Mandjewk la mandjewk bu birri-karrmeng mulil ngalengarre nawu worhnang wanjh bi-yerrkkeng na-kudji bininj bebmeng wam kure birri‑kaberrkdi bininj. Birri-wern bininj birri-kuknang nangale birri-mey. 16 Wanjh kumekke na-kudji bininj rurrkkendi, nawu ngeyyoy Barabbas. Kaluk namekke birri-wern birri‑bengkang na-warreni duninjh. 17 Bu bininj birri‑raworrinj kure Baylad wanjh nungka ben-djawam, yimeng, “Na-ngale ngurri‑djare nga‑bebke ngudberre, Barabbas? O Jesus nawu ka-ngeyyo ‘Christ’?” 18 Kaluk Baylad ben‑bengkang birrimekke bininj birri‑bidkenwong Jesus kure nungka bu bedda wanjh birri‑kirnweng.

19 Kaluk Baylad rerrkang kure ben‑djadmeng nuye kure ningih‑ni. Baylad nuye ngal‑bininjkobeng bi‑marne‑munkeweng kunwok, yimeng, “Yuwn baleh yi‑marneyime namekke bininj, yi-bawo. Nungka minj njale warrewoyinj. Bolkki ngayi nga‑bukirribom nungka. Wanjh ngan‑njilng-warreminj.”

20 Wanjh birri‑kihkimuk djungkay mak nawu dabborrabbolk bindi-marneyimeng birri-wern, “Ngurri-marneyimen Baylad, ‘Barabbas kam-bebme, Jesus dowimen.’ ”. 21 Kaluk Baylad yimeng, “Ngaben‑karrme bene‑bokenh: Barabbas, Jesus. Wanjh na-ngale ngurri‑djare nga‑bebke ngudberre?” Birri-wern birri‑yimeng, “Barabbas!” 22 Wanjh Baylad djawayhmeng, “Nane Jesus – baleh nga‑yimewon nawu ka‑ngeyyo ‘Christ’?” Wanjh bedda rowk birri‑yimeng, “Ngurri‑bid-dulubu kure kun-dulk cross!” 23 Baylad yimeng, “Njale warrewong?” Wanjh bedda birri‑wernh-kayhmeng munguyh, “Ngurri‑bid-dulubu kure kun‑dulk ‘cross’!”

24 Baylad ben‑nang minj baleh yimeninj. Bedda bininj wanjh birri‑ridduy. Wanjh nungka kunronj bomey bid-djirridjburrinj kure kumirrk bedberre bedda bininj. Ben-bukkang ba minj nangale bi-djuhbuyinj. Yimeng, “Nga-bid-bele. Ngayi minj kandi‑djuhbun bu nane bininj ka-rrowen. Ngudda ngurri‑djareni bu ngurri‑durrkmirri.” 25 Bedda birri‑yimeng, “Kan-djuhbun ngadberre - ngad mak wurdwurd ngadberre - bu nungka ka‑rrowen!” 26 Wanjh Baylad bi‑bebkeng Barabbas bedberre. Wanjh nawu Jesus ben-bidkenwong bininj nawu birri‑widjbirhkeng kunyarl dorrengh. Ben‑marneyimeng birri‑bang birri‑bid-dulubom kure kundulk.

27 Nawu Baylad nuye djawirna birri-ngimihweng Jesus kure bedberre kurrurk-kimuk, mak birri-wern nawu birri-bang birri‑raworrinj nuye. 28 Wanjh birri-yerrkkeng kun-madj nuye, mak na-buyika birri‑djongbom nawu yiman nawu worhnang nuye kun-madj djongburrinj, nawu kuk-buyika man-burrba. 29 Mak birri-bang birri-mey kinj man-mirrh-yih, wanjh birri‑marnbom kodj-burlh nawu kun-kodj-kenh, rerre wanjh birri‑marnekurrmeng kure kun-kodj nuye. Kunkaninj birri‑marne‑kurrmeng kure ku-bidkun nuye, yiman nawu ka-worhnan nuye. Wanjh birri-boddanj kure kumirrk nuye wanjh birri‑djekmiwong Jesus, wanjh birri-marneyimeng, “Ngundi‑burlumeng ngudda yi-worhnan bedberre bininj nawu Djuws!” 30 Mak birri-kuknunjbom. Birri-yimey manekke kunkaninj wanjh birrih-bom kure kunkodj nuye. Munguyh birri-djal-bom. 31 Bu bedda birri-ngurdmeng bu birrih‑bom, wanjh birri‑yerrkkeng nawu kukbuyika kun-madj djongbuh‑djongburrinj. Birri-djongbom nawu nuye kunmadj. Wanjh birri‑kang birri-wam kure birri-barnnameng nungka.

32 Kumekke wanjh birri-yi-bebmeng kure ku-berrk, kumekke birri‑nang na-kudji bininj nawu Sayrin-beh [Cyrene] nawu ngeyyoy Saymon [Simon]. Birri‑djurrkkang nungka ngorrkan kure kunkarlang nuye kun‑dulk ‘cross’ nuye Jesus. 33 Wanjh birri-bebmeng kure ka-bolkngeyyo Kolkoda [Golgotha] manbu ka-yime “Kun-red ngalengarre kun‑kodjmurrng”. 34 Birrimekke birri-bang birri-bowong Jesus, birri-rawong kun‑bang mak birri-mey kure kun-dulk ngalengarre kun-kalkid birri-bo-wong ngudkeng nuye kun-kanjbabang. Wanjh Jesus bo‑bekkang manekke kun-bang wanjh nungka warnyakminj, minj bonguyinj, bekkang manbang. 35 Kaluk bu bedda birri-dulubom kure kun-dulk ‘cross’, wanjh birri‑madj-yerrkkeng, birri-dahkenweng. Nakudji nabang ben‑marneyimeng, “Ngudda yi-winhme ngurri-kang kunmadj nuye Jesus”. 36 Wanjh birrimekke birri-bang birri-rerrkang, birri-nahnang. 37 Kaddum kure kundulk birri-kurrmeng kunngey ngeyyoy, “Nane Jesus nawu worhnan bedberre bininj nawu Djuws”.

38 Mak bene-bokenh bininj nawu bene-bangni, wanjh bindi‑djarrk‑barnnameng Jesus dorrengh. Na-kudji kukbarndi kure ku-kun nuye Jesus. Na-buyika kukbarndi kure kudjakku nuye. 39 Bininj birri-wam birri-yurrhkeng, nakka kun-warre birri-yimeng nuye Jesus, mak birri-marnewarnyakminj nuye. 40 Birri-marneyimeng, “Ngudda yi-yimeng bu yi-rurrk-bakke manbu Dembel [Temple], kaluk yi-yawoyh-rurrkmarnbun kun‑kodjdje man‑kudji bokenh! Bolkki wanjh yi-rrolka! Yim-kolu kure ‘cross’ kun‑dulk bu ngudda woybukki Beywurd nuye Kod!”

41 Wanjh nawu birri-kihkimuk djungkay, mak nawu kabindi‑bukkabukkan man-karre, mak nawu dabborrabolk warridj birrih-duy Jesus. 42 Mak birri-marneyimerrinj, “Nungka ben-kukmarnbom birri‑buyika bininj mak minj ka-kukmarnburren nungan weleng‑kenh! Mak nungka wanjh ka-worhnan kadberre nawu Yidrayel [Israel] bininj! Wardi kam-kolu kure ‘cross’ kun-dulk ba karri-woybukwon! 43 Nungka kabi-woybukwon Kod mak bolkki wanjh Kod bi‑kukmarnbu, bu nungka kabi-marnedjare. Kone wanjh nungan welengken yimeng, ‘Ngayi Beywurd nuye Kod’.”

44 Kunekke rerrih mak bininj bene-bokenh bene-yimeng nawu bindi‑barnnameng Jesus dorrengh bu beneh-duy.

45 Kaluk bu benbekad buldjdjarn dung-yibmeng, wanjh kumekke ku‑bolkwern kak-bakmeng rowk, ben-karrmeng bokenh kun-kudji minj kun-kuyeng ben-karrmeninj. 46 Kaluk bu wolewoleminj bokenh kun-kudji kun-dung yimerranj, Jesus kayhmeng wernkih, bu yimeng, “Yilay! Yilay! Lama sabachthani?” (mane kunwok ka-yime, “Ngardduk Kod! Ngardduk Kod! Njale ngayi kan-bawong?”)

47 Kaluk birri-buyika bininj nawu kumekke birrih-di birri‑bekkang wanjh birri-yimeng, “Nakka kabih-kayhme Yilaydja [Elijah]!” 48 Wanjh na-kudji bininj rlobmeng wernkih mey nawu kun-madj na‑kerlkkerlk wanjh djuhkeng kure kunbang warreminj, wanjh dukkang kure kun-dulk kumekke wanjh bi‑bowoyinj bu Jesus bonguyinj. 49 Birri-buyika bininj birri-yimeng, “Med, karri-bawo, wardi karri‑nan Yilaydja kam-re ba kabi-kukmarnbun.”

50 Wanjh Jesus kayhmeng kun-kimuk, yerre wanjh nungan baworrinj bu ngerh-yakminj, wanjh doweng.

51 Kunekke rerrih nawu man-burrba barndih-barndi kure Dempel [Temple] ku‑rurrk nakka wanjh djalkmiwam bu bakmeng bokenh, kaddum djalkmiwam kam-koluy kanjdji. Warridj bolk-rokang mak wardde‑barrabarrhmeng. 52 Mak nawu birrih-dudjendi kure ku-midj nakka wanjh dangmarrhmiwam bedberre, wanjh birriwern nawu Kod nuye bininj nawu kunyungki birri-doweng, nakka wanjh birri‑yawoyh‑kerrngehminj. 53 Kaluk bu Jesus yawoyh-kerrngehminj kure ku-midj wanjh bedmanwali birrimekke bininj birri-dolkkang kure kumidj-beh, birri-wam kure ku-bolkkimuk kubolk-djamun kure birri-wern bininj bindi‑nang.

54 Nawu birri-bang birri-nahnang Jesus kumekke birrih-di, mak nawu ‘centurion’ nawu kaworhnan bedberre dorrengh. Bu birri‑nang kun‑red bolkrokang mak njalehnjale nawu kurduyimeng, bedda wanjh birri-keleminj, wanjh birri-yimeng, “Woybukki duninjh nane bininj Beywurd nuye Kod”.

55 Birri-wern daluk-daluk birri-munkekaydjuy Jesus kure Kalili [Galilee] mak birrih-nahnang, nakka mak birrimh-di djarreh kure ‘cross’ kundulk, wanjh birrih-nang. 56 Wanjh birri-djarrkni ngalekke Meri Makdalen [Mary Magdalene], mak ngalu Meri ngal-badjan bedberre Jesus, Djayms [James], Djosib [Djoseph], mak ngalbuyika ngalu daluk ngalbadjan berrewoneng Djayms, Djon [John] nawu Zebedi [Zebedee] ben-bornang.

57 Bu Jesus ben-bukkabukkang, nakudji bininj kam‑dolkang nakang kunred Aramadiya [Aramathea]. Ngeyyoy Djosib [Joseph]. Nungka wanjh barndi. 58 Kaluk ngokdanj, Djosib wam bi-yikang Baylad [Pilate], wanjh bi-djawam yimeng, “Kamak bu kan-kukwon Jesus.” Wanjh Baylad ben‑wokrayekwong nawu djamun nuye ba Jesus kabirri‑kukwon nawu Djodjib. 59 Wanjh nawu Djodjib bi-kukmey Jesus wanjh bi-kuk-dukkang nawu na-bele manburrba. 60 Wanjh bi-kuk-kang bi-kuk-kurrmeng kure kuwardde-rurrk. Manekke wanjh Djodjib nuye, man-kerrnge kure nungka wardde-dadjdjeng. Wanjh wardde-djirrkkang man‑wardde‑dulmuk kure dang-balhmeng kure dang-rurrk-ni wanjh bolk-bawon, wanjh nungka wam. 61 Kunekke rerrih Meri Makdalen, ngal-buyika Meri bene-wam bene-rerrkang kure kabbal borledmi-kenh.

62 Kunkodjdje-buyika manbu benbekad ngalengarre ‘Sabad’ [‘Sabbath’], wanjh nawu birri-kihkimuk djungkay mak nawu Barisis [Pharisees] birri-yikang Baylad. 63 Wanjh birri-marneyimeng, “Nawu yi-kimuk, ngad ngarri‑bengkan bu namekke Jesus nawu kurrih-kurrinj, bu darrkid-ni wanjh kune yimeng, ‘Bu kun-kodjdje bokenh man‑kudji rerre, ngayi wanjh nga‑yawoyh‑dolkkan kure kun‑dowikenh.’ 64 “Yiben-wokrayekwo birri-buyika birri-bang ba kabirri‑dang‑nahnan kure kunwardde‑rurrk bu ka-yimerran kun-kodjdje bokenh kun-kudji. Mak nawu djawirna nuye wardi kabirrim-re kabirri‑mang wanjh kabindi-marneyime birri-buyika bininj bu nungka dolkkang kure kun‑dowikenh. Jesus kurrinj bu kun-yungki bu kun-yungki bu mulewam nungka dolkkayinj. Wanjh kaluk bu nuye djawirna kabirri-mulewam nungka dolkkang, wanjh kabirri‑kurren kure kun-kimuk duninjh!” 65 Wanjh Pilate ben-marneyimeng, “Mah! Wanjh ngurrben-ka birri‑buyika birri-bang ba kabirri-wernh-dang-nahnang kure baleh ngudda ngurri-bengkan.” 66 Birri-wam birri-dang-barlhmeng, birri-dang-rayekwong ba minj nangale ka‑rrangmarrhmang. Birri‑bang birri-di birri‑dang‑nahnang.