5
Ma Koluk Lun Jerusalem
1 Mwet Jerusalem, yuwot yume ke inkanek nukewa!
Liye akwoya yen nukewa!
Suk pac ke acn in kuka!
Suk lah kom ac ku in konauk sie mwet
Su oru ma suwohs ac inse pwaye nu sin God.
Kowos fin ku in konauk sie, na LEUM GOD El fah nunak munas nu sin mwet Jerusalem nukewa.
2 Kowos finne orala fulahk lowos ke Inen LEUM GOD moul,
A ma kowos fahk uh kikiap.
3 Pwayena lah LEUM GOD El suk mwet inse pwaye.
El sringil kowos, a kowos tia mayak kac.
El itungkowosi, a kowos tia lungse in aksuwosyeyuk kowos.
Kowos likkeke ac tiana forla liki ma koluk lowos.
4 Na nga nunku, “Mwet inge mwet sukasrup ac mwet nikin.
Ma elos oru uh lalfon;
Elos tia etu lah mea God El enenu selos,
Ac mea LEUM GOD El lungse elos in oru.
5 Nga ac som nu yurin mwet kol
Ac kaskas nu selos.
Sahp elos pa etu lah mea God lalos enenu selos,
Ac mea LEUM GOD El lungse elos in oru.”
Tusruktu mwet kol nukewa tia lungse muta ye ku lun LEUM GOD,
Ac srunga pac aksol.
6 Pa sis lion insak uh fah onelosi;
Wolf yen mwesis me fah seseya manolos,
Ac leopard uh ac forfor in siti selos ac suk ma nac.
Mwet ingo fin tufoki liki lohm selos, ac fah seyuki manolos
Mweyen ma koluk lalos uh arulana pus,
Ac pusla pacl elos forla liki God.
7 LEUM GOD El siyuk, “Efu ku nga in nunak munas nu sin mwet luk ke ma koluk lalos?
Elos ngetla likiyu
Ac alu nu ke god sutuu lun facl saya.
Nga kite mwet luk nwe ke elos kihpi,
A elos orek kosro
Ac sisla pacl lalos yurin mutan su kukakin manolos.
8 Kowos wella in suk in oru lungse koluk lowos nu sin mutan kien mwet tulan lowos,
Oana horse mukul ma kitakat wo ke elos sukna horse mutan uh.
9 Ya tia fal nga in kalyaelos ke ma elos oru inge,
Ac oru foloksak luk nu sin mutunfacl se su ouinge?
10 Nga fah supwala mwet lokoalok in fahsr inmasrlon takin grape sunun mwet luk
Ac pakpakiya, tusruktu in tia kunausla nufon.
Nga fah fahk elos in kotala lah ke grape uh,
Mweyen lah ingan tia ma luk.
11 Mwet Israel ac mwet Judah
Arulana pilesreyu.
Nga, LEUM GOD, pa fahk ma inge.”
LEUM GOD El Ngetla Liki Israel
12 Mwet lun LEUM GOD elos lafwekunul ac elos fahk, “Wangin ma El ac oru. Wangin ma upa ac sikyak nu sesr. Ac fah wangin mweun, ku pacl in sracl. 13 Kas lun mwet palu inge wangin kalmac, oana eng tuhtuh. Tia God pa kaskas nu selos. Ongoiya ma elos palye ingan ac ma na nu selos sifacna!” 14 LEUM GOD Kulana El fahk nu sik, “Jeremiah, mweyen mwet inge fahk kain kas inge, nga fah oru kas luk in oana sie e in oalum. Mwet uh ac fah oana etong, ac e uh ac fah esukulosyak.”
15 Mwet Israel, LEUM GOD El ac use sie mutunfacl yen loesla me in lain kowos. Sie mutunfacl oemeet me su arulana ku, sie mutunfacl su kowos tia etu kas la. 16 Mwet pisr lalos elos mwet mweun kulana su uniya ke wangin pakomuta. 17 Elos fah kangla fokin ima lowos, oayapa mwe mongo nowos. Elos fah uniya wen ac acn nutuwos. Elos ac lusluseya un sheep ac un cow nutuwos, ac sukela ima in grape ac sak fig sunowos. Mwet mweun lalos ac fah kunausla siti potyak ku lowos, su yohk lulalfongi lowos kac.
18 LEUM GOD El fahk, “Ne ouinge, in len ingo nga fah tia sukela nufon mwet luk uh. 19 Ke elos ac siyuk sripen nga oru ma inge nukewa, na Jeremiah, fahk nu selos lah ke sripen elos forla likiyu ac orekma nu sin god saya uh in facl selos sifacna, ouinge elos fah kulansupu mwet saya in sie facl ma tia ma selos.”
God El Sensenkakin Mwet Lal
20 LEUM GOD El fahk, “Fahkang nu sin fwilin tulik natul Jacob, ac fahkeng nu sin mwet Judah: 21 Porongeyu, kowos mwet lalfon ac mwet sulalkung, su oasr muta tuh tiana liye; su oasr srac tuh tiana lohng. Isa 6:9–10; Ezk 12:2; Mk 8:18 22 Nga LEUM GOD. Efu kowos ku tia sangeng sik? Efu kowos ku tia rarrar ye mutuk? Nga oakiya puk uh mu pa inge masrol lun meoa uh, sie masrol oakwuk nwe tok ma meoa uh tia ku in alukela. Noa uh finne ngirngir ac toki weacn uh, a tia ku in som alukela. Job 38:8–11 23 A kowos mwet uh, kowos likkeke ac lungse alein. Kowos kuhfla nu saya ac som likiyu. 24 Wanginna nunak in sunakinyu, nga finne supu af in taknelik ac af in kosrani, ac sot nu suwos pacl in kosrani ke kais sie yac. 25 A ma koluk lowos kosrala ma wo inge liki kowos.
26 “Oasr mwet koluk muta inmasrlon mwet luk uh. Elos wikla soano oana mwet ma likiya mwe sruhf in sruokya won, tusruktu elos filiya sruhf lalos in sruok mwet. 27 Oana ke sie mwet sruh won el nwakla kalkal lal uh ke won, ouinge elos nwakla lohm selos ke ma elos eisla lun mwet uh. Pa oru elos kulana ac kasrup; 28 pa oru elos fact ac kihp. Wangin saflaiyen orekma koluk lalos. Elos tia sang suwohs nu sin tulik mukaimtal ku oru nununku suwohs nu sin mwet enenu.
29 Tusruktu nga, LEUM GOD, fah kaelos ke ma elos oru inge. Nga fah orek foloksak nu sin mutunfacl se inge. 30 Sie ma koluklana ac mwe lut sikyak tari fin facl se inge: 31 mwet palu tia fahk ma pwaye a kikiap mukena; ac mwet tol uh kol mwet uh oana ma mwet palu sapkin, ac mwet luk uh tiana lain. Na mea elos ac oru pacl se ke ma nukewa sun saflaiya uh?”