4
Sie Pang Nu Ke Auliyak
1 LEUM GOD El fahk, “Mwet Israel, kowos fin lungse forla, kowos forma nu sik. Kowos fin pwaye nu sik ac sisla ma sruloala ma nga srunga ingan, 2 na ac tufah fal kowos in fulahk ke Inek. Mutunfacl nukewa fah siyuk sik in akinsewowoyalos, ac elos fah kaksakinyu.”
3 LEUM GOD El fahk nu sin mwet Judah ac Jerusalem, “Akfisrasryeak fohk ke acn ma soenna imaiyuk. Nimet yukwiya fita sunowos inmasrlon kokul uh. Hos 10:12 4 Kowos mwet Judah ac Jerusalem, kowos in karinganang wuleang su nga, LEUM GOD lowos, orala inmasrlok ac kowos, ac kowos in sifacna kisakinkowosme nu sik. Kowos fin tia oru, na kasrkusrak luk ac tayak oana e, ke sripen ma koluk kowos oru. Ac fah firir ac wangin sie ku in konela.”
Kas In Sensenkakin Mwet Judah Ke Mweun
5 Ukya mwe ukuk in sasla facl sac nufon!
Sasa in yohk ac kalem!
Fahkang nu sin mwet Judah ac Jerusalem
In kaing nu ke siti ma potiyukyak ku.
6 Srisrngi inkanek nu Zion!
Kaing, kom in moulla! Nimet pahtlac!
LEUM GOD El use ongoiya
Ac kunausten lulap liki acn epang.
7 Sie su kunausla mutunfacl uh mukuiyak tari,
Oana soko lion otyak liki acn in wikwik lal.
El tuku in kunausla Judah.
Siti lun Judah ac oan musalla,
Ac wangin mwet ac muta we.
8 Ke ma inge nokomang nuknuk yohk eoa, ac tung ac mwemelil
Mweyen kasrkusrak upa lun LEUM GOD
Tiana forla liki Judah.
9 LEUM GOD El fahk, “In len sac, tokosra ac mwet fulat ac fah wanginla pulaik lalos. Mwet tol ac arulana lut, ac mwet palu ac fah oela.”
10 Na nga fahk, “LEUM GOD Fulatlana, kom arulana kiapwela mwet Jerusalem! Kom fahk mu ac fah oasr misla, a cutlass se pa oanna inkwawalos.”
11 Pacl se ac tuku ke ac fah fwackyang nu sin mwet Jerusalem lah sie eng na fol ac tuku yen mwesis uh nu yorolos. Ac fah tia sie eng srisrik mwe na okla kulun wheat — 12 a ac fah sie eng na upa supweyuku sin LEUM GOD. LEUM GOD sifacna pa akkalemye nununku lal nu sin mwet lal.
Mwet Lokoalok Kuhlusak Acn Judah
13 Ngetla liye — mwet lokoalok el tuku oana pukunyeng uh. Chariot in mweun lal oana eng fohru, ac horse natul uh mui liki eagle uh. We nu sesr! Kut ac sikiyukla!
14 O Jerusalem, ohlla ma koluk liki insiom tuh kom in ku in moul. Kom ac nunku nunak koluk uh nwe ngac?
15 Mwet utuk kas tuku Dan me, ac liki fineol in acn Ephraim, in sulkakinelik pweng koluk. 16 Elos tuku in sensenkakin mutunfacl uh, ac in fahk nu sin Jerusalem lah mwet mweun elos tuku liki sie facl loessula. Mwet lokoalok inge fah wowoyak lain siti lun Judah 17 ac elos fah rauneak Jerusalem oana mwet san elos rauneak ima se, mweyen mwet lal uh orek likkeke lain LEUM GOD. LEUM GOD pa fahk ma inge.
18 Judah, kom sifacna oru ma inge in tuku nu fom. Ouiyen moul lom ac orekma koluk lom pa pwanang keok se inge in fakiskomi sasla insiom.
Asor Lal Jeremiah Ke Mwet Lal
19 Nga waiok! Nga tia ku in muteng waiok se inge!
Insiuk kihmkimyak ke sangeng!
Nga tia ku in misla.
Nga lohng mwe ukuk
Ac pusren sasa lun mweun.
20 Mwe ongoiya uh kalkalwen in sun kut;
Facl sac nufon sikiyukla.
Lohm nuknuk sesr kunausyukla in kitin pacl na.
Mwe lisrlisr uh mihsasa uh.
21 Nga ac liye flag lun mweun nwe ngac,
Ac lohng pusren mwe ukuk putaka?
22 LEUM GOD El fahk, “Mwet luk elos lalfon;
Elos tia eteyu.
Elos oana tulik lalfon;
Wangin etauk lalos.
Elos sasla ke oru ma koluk,
A tiana etu in oru ma wo.”
Aruruma Lal Jeremiah Ke Kunausten Ma Ac Tuku
23 Nga ngetla liye faclu — wangin lumah ac wangin koano.
Nga ngetak nu yen engyeng uh — wangin kalem we.
24 Nga ngetang nu ke eol uh, tuh na kusrusrsrusr,
Ac tohktok uh wacwat.
25 Nga liye lah wangin mwet.
Finne won yen engyeng uh — sohkla wanginla.
26 Acn ma imaiyukla ekla yen mwesis.
Siti nukewa kunausyukla
Ke sripen kasrkusrak upa lun LEUM GOD. (
27 LEUM GOD El fahk mu faclu nufon ac fah mwesisla ac wangin ma oan fac, tusruktu El fah tia kunausla nufon.)
28 Faclu ac fah mwemelil;
Inkusrao fah lohsrla.
LEUM GOD El fahk ma inge,
Ac El fah tia ekulla nunak lal.
El orala tari sulela lal
Ac fah tiana ekla liki.
29 Ke kusen kasrusr lun un mwet mweun fin horse ac mwet pisr,
Mwet nukewa ac kaingla.
Kutu ac kaing nu insak uh,
Ac kutu ac fanyak nu inmasrlon eot lulap.
Siti nukewa ac pisala,
Ac wangin mwet ac sifil muta we.
30 Jerusalem, kom sikiyukla tari!
Mwe mea kom in nukum nuknuk srusra?
Mwe mea kom in yunikomla ke mwe naweyuk gold ac sang sroal in akkatoye motom?
Kom sifacna oru kom in kato ke wangin!
Mwet kawuk lom siskomla
Ac kena unikomi!
31 Nga lohng sie sao, oana pusren sie mutan akola in isus,
Oana pusren tung lun sie mutan oswe tulik se oemeet natul.
Pa inge tung lun Jerusalem, ke el suk mongol
Ac asroelik paol ac fahk,
“Nga ac misa!
Elos tuku in uniyuwi!”