1  ✡ Giu 13:19Kamaina bi Mousis Islael lavedi i giuwedina gado, “Bada emi Maimaituwa ya nawenawemina mba dobunemo te ko vai bi koi taniwage. Bi temi aubaimi tana dobu matabudi 7 ya kagebogebodi, maibena mani Ḡiti, mani Gigasi, mani Amoli, mani Keinan, mani Pelisait, mani Ḡivait bi mani Debus. Niga dobudi a nanaka bi a ḡailisi gulata mote mai temi. 2 Bi sauginemo Bada emi Maimaituwa niga dobudi nimemimo ya sivudi, te ko lauyovoḡedi bi koi peki kovidi. Mote koma launuwatoiyedi bi vaitedi waianina koma voiye. 3 Bi kota komai naḡinaḡiyedi bi mote natunatumi komai aninedi te natunatudi sima naḡidi. 4 Banina natunatumi male Bada sa ḡose bi sa nawedi maimaituwa ḡesaudi sa lauduneyedi. Bamoda mainana ko voiyena ba Bada lisimimo ya medi bi maḡemota ya kagebogebo kovimi.

5 “Niga mainana edi ko voiyedi olta ko suwa waiyamonidi, edi laudune ḡakimidi ko dou kivikividi. Bi koikoitau Asela kaimo a voiyedi bi a lau lauduneyedina ko koi ḡavuḡavukidi bi matabudi kaimo koi kalaḡosedi. 6  ✡ Pot 19:5Niga ko voiyena banina ba Bada Maimaituwa temi i vinemi te lava waiyawa tana matanemo. Lava a wapa dobu matabunemo sa miyamiya bi geḡa te temi Islael lavemi i vinemi te ena lava otimi kona tubuḡa.

7 “Temi Islael lava kaikaigwaḡemi mote mai dobu ḡesaudi. Bi Bada ena nuwavainemo i vinemi. Temi mote ko wapa gulata mai dobu ḡesaudi, geḡa. 8 Bi Bada i wainuwavaina gulatemi aubaina bai emi magumagula i giugiuwapaena i voiye wata. Temi Idip ḡalibonana ena waibada dibunemo konai taupaulayababa. Bi tana ena ḡailisi dididiginemo i kapotiyovomi. 9  ✡ Pot 20:5,6, 34:6,7Taunana aubaina ko sibe kauwe te Bada emi Maimaituwa tana taunana Maimaituwa otina. Tana bai i giugiuwena ba mote imai geḡa bi kamaina te ya voiye. Tana ena giuwapa nove kimtina ani iyaiyavakasaḡa lisidimo i voivoiyena mainana kota niga kimtina lisinemo ya voiye wata. Mabai sawai nuwavaine bi kalinana sa kaikaiwata kauwena. Ba tana tedi ya wainuwavaine gulatedi bi visuvisu lisidimo ya voiyena waianina i voivoiyena luvanemo. 10 Tana mote imai goela tedi mabai sa dabodabokena ba kamaina te ya kovoḡidi. 11 Taunana aubaina niga waiḡakedi niganana yà wailovelovemina, matabudi ko kaiwata kauwedi.”