2 “Tagu taunana Bada emi Maimaituwa, temi Idipmo konai taupaula yababa bi e kapotiyovomi.

3 Temi nimemimo mote maimaituwa ḡesaudi koma voiyedi bi koma lauduneyedi. Tagu tauguḡa ko lauduneyegu.

4 Temi nimemimo mote koikoitau koma voiye kitana mai bai galewemo e dobumo e nisa dibunemo. 5  ✡ Pot 34:6,7; Wai 7:9,10Bi koikoitaudi mote koma lauduneyedi. Tagu emi Maimaituwa tagu Bada unuunuligu. Tagu tauguḡa ko lauduneyegu. Magula mabai a dabodabokeguna ba tagu kaka natunatudi, iteitedi, nosinosidi bi waḡewaḡedi yà kovoḡidi. 6 Bi kota tedi mabai tagu sa ḡoeḡoegu bi egu waiḡake sa kaikaiwata ba tagu egu ḡoe kenakenana tedi lisidimo ya kena nonoḡa, kimta ani iyaiyava kasaḡa nopodimo.

7 Tagu Bada emi Maimaituwa mote isagu komai beyabeyakuluḡe, aiyai mainana ya voiyena ba yà kovoḡi.

8  ✡ Pot 16:23-30Waiyawasi laḡanna waiwaiyawina ko noḡoti bi ko vivile kauwe. 9 Laḡan 6 nopodimo temi emi noya matabudi ko voiyedi, 10 bi laḡan wai 7-na e vine te tagu Bada emi Maimaituwa lisigumo koi yawasi bi mote aiyai ima noya. Temi, natunatumi, emi taupaula oloolotodi bi waiwaivinidi, emi ḡamoḡamo bi tautavatava matabudi lisimimo sa miyamiyana ba mote sima noya. 11  ✡ Pak 2:1-3Banina tagu Bada laḡan 6 nopodimo galewa, dobu bi nisa nopodimo mwali matabudi e voiyedi. Bi laḡan wai 7-nemo ei yawasi bi niga laḡanna e kavisuvisu bi e voiye te laḡan waiwaiyawina.

12  ✡ Met 15:4, 19:19; Mak 7:10, 10:19Tamam bi tinam kwa viviledina ba tagu Bada em Maimaituwa niga dobuna yà vitevitemna noponemo em miya ya lofa.

13  ✡ Pak 9:6; Met 5:21, 19:18; Mak 10:19Mote lava kumai peki.

14  ✡ Met 5:27, 19:18; Mak 10:19Mote mwanem kuma vawaidoḡa.

15  ✡ Met 19:18; Mak 10:19Mote kuma danene.

16  ✡ Pot 23:1; Met 19:18; Mak 10:19Mote em tau kaiyovumo kumai wavu yababe.

17 Mote em tau ena vanuwa, ee mwanena, ee ena taupaula olotona ee waivinina, ee ena bulumakau, ee ena donki bi ena pulapula ḡesaudi kuma kita konekonedi.”