Pita ana yóita be Yaubada ina matakavata tetelidi
12
(Guinuwa 12:1-24)
Erodi Pita iyoisi, deri goi ivaaisiu tetelina
1 E amo tutayana tolovina Erodi ina tovayaviyayao ilatuwokoidi sina Tomoya ana totugugunayao maniyedi siyoisidi bei siyogedegededi. 2 E Iyoni tuwowona Yemesa‡ Yemesa: Ame Yemesayana moe Sebedi natuna (Mad 4:21). nakae, kina Erodiyana ilovina siyoisi. Siyoisi, giya sisi goi tauyana sikaumate. 3 Tuwo tutayana Erodi igite bego ina guinuwa kidi Diyuu siuuyaone, ilovina bego Pita nakae siyoisi bego sikaumate. Ego moe Beredi Pokaka Aikanina ana tuta. 4 Tuwo moitamo sina Pita siyoisi. Siyoisi ikavava, deri goi sivaisiu ikaaiyaka go, kina Erodiyana ilovina bego tovayaviya yawou ainima tayamo sina Pita sirugwausi, adi taivasi, adi taivasi. Tuta liliuna tovayaviyayadi adi taivasi sikaaiyaka Pita siruugwausi. Tauna nakae Erodi iguinuwe; latuwona bego Basitáwana Aikanina† Tat 12:1-27. mlina Pitayana ikaiwoduwe tomota matadi goi takínona manuna.
Anerose tayamo ina Pita ivaite isiya tetelina
5 E Pita deri goi siyoisiikavate go, kidi Yeisu ana totugugunayaoyadi Yerusalema goi sikaawanoi makimaki Yaubada yaina Pita ana yóita manuna.
6 E Pita ikaaiyaka, ikaaiyaka aaa, e ina tuta takínona bogina ima. Tuwo itomo Erodi bego Pita ikaiwoduwe ana takínona manuna. Ego amo sabamgoyana tovayaviya adi taiyuwo nauyayanaidi goi Pita iimasisi, tayamo kakataina, tayamo kekelina. Seni aiyuwo sisiko tauyana nimana ina kidi nimadi. Ikaaiyaka go, iimasisi ikanamatáiya. Ago kidi go ituli ta tovayaviyayao adi taiyuwo deri totomna goi sikaaiyaka, deriyana siruugwausi. 7 Pita iimasisi go, Yauwe ina anerose tayamo isowóduwo deriyana sinaena goi itaoya, e mavada tayamo inínima. E Pita kivilina iláui, iwoini idigo kana,
‘Woilīm kutāoya!’
Tuwo moitamo itaoya go, seniyadi nimana goi mainao sitaligalígava sisou. 8 E aneroseyana idigo kana,
‘Am gadíwana kusīko be im sendoro kuvalilivīdi.’
E Pitayana nakae iguinuwe go, aneroseyana idigomna kana,
‘Im tanigo kwābi, kutanīgo. Ikavava, kūma kusabokuliyēgu.’
9 Tuwo Pita nakae iguinuwe. Ikavava, isabookuliye sisowóduwo. Sisowóduwo, Pita inuwonúwana kana,
‘Ame nakona yau akalayáusa.’
Go geya iyagoiyeta anerose ina guinuwa moe mooitamoina. 10 E tovayaviya tayamo sikalave, niga tovayaviya aiyuwoina sikalave go, tovayaviyayadi geya itoboinedita Pita be anerose sigitedi. Sikalavedi ikavava, sina asa ana kali totomna goi. Totomyana mana niboda kainum go, toinina ikatupáeva. Tuwo adi taiyuwo sisowóduwo. Sisowóduwo, enao tayamo asa goi siiketoiya go, aneroseyana matabuwona Pita ikalave. Tuwo Pita aneta iketoiya.
11 Ago Pita nukotona bogina imavada, iyagoi ame alayáusa geya. Tuwo toinina inuwonúwana kana,
‘Bogina ayagoi moitamo Yauwe ina anerose ietune ima Erodi nimana goi iyavegu be nakae kaga liliuna kidi Diyuu latuwodi bego siguinuwe yau yaigu go, iyavegu.’
12 Ago bogina iyagoi anerose ivaite, tuwo ina Meri ina vada. Ame Meriyana moe Iyoni sinana. Iyoniyana youyuwoina moe Maki.‡ Maki: Ame Makiyana Vala Dedevina igini yoina Vala Dedevina Maki igini. Amoko goi tomota badabadaidi bogina siitugúguna go, nava sikaawanoi. 13 E Pita ina Meri ina vada ana kali totomna goi ikaukeeyakeya go, vavina tayamo yoina Roda, tauyana toni vada ina pákwana tayamo ima idigo kana,
‘Kom avatau?’
Pita kana,
‘Yau.’
Ago niyana kina Roda inove, 14 niyanayana ikinane moe Pita niyana. Tuwo iuyáwana go, ina uyawanayana pasina totom geya ikatupaeveyeta, go sem ilokoinamo ikaluvila ina tomota ilatuwokoidi idigo kana,
‘Pita totom goi iitaoya!’
15 ‘Kom nakona kuyaluwo’, tomota kaedi.
Go kina vavinayana ikaugeogéona kana,
‘Moitamo, tauyana!’
16 E kina go Pitayana nava ikaukeeyakeya. Tuwo tomotayadi sitaoya sina ali totomna sikatupáeve, e tauyana sigite. Sigite, nukotodi siwówana. 17 E tauyana nimana ikatulagasi, tomota isanabodedi situgau. E situgau go, ilatuwokoidi Yauwe manakaena deri goi ivakede isowóduwo. Aiyuwoina idigo kana,
‘Kōna ame dogoiyadi kotalavaitēdi Yemesa‡ Yemesa: Ame Yemesayana moe Yeisu siyana toina, sinadi tayamo. Tauyana Yeisu ana totugugunayao Yerusalema goi adi tovakumgo (Mak 6:3). be sedao nuumisaidi yaidi.’
Ibóbwara ikavava, itaoya ikalavedi go, ina ituli ta kasa.
18 E vanuwo itomo, kidi tovayaviyayadi uyaodi sisáwala gagaina Pita ina tagau pasina. Geya siyagoiyeta tauyana nako.
19 E kina go Erodiyana ina topaisewayao ilatuwokoidi sina Pita silusale. Silusale, silusale, geya, tuwo deri ana tomatakavatayaoyadi boi Pita deri goi siyoisiikavate iduduwedi sima ivakakonedi. Latuwona iyagoi Pita manakaena isiya. Ago kidi geya siyagoiyeta geya. Ivakakonedi ikavava, ilovina bego idi bágala pasina sikámasa. Ikavava, tauyana itaoya Yudiya ana dadava ikalave go, isou ina Sesariya goi ikaaiyaka.
20 E tauyana gamona igoyo toina kidi da Taya be da Saidoni yaidi. E bodayadi aiyuwo nuwodi tayamo goi adi katumapuyao sikinavedi sietunedi sina Sesariya goi Erodi ina tomatakavata yoina Barastasi sitamyabi bego tauyana ina Erodi igudali, e bei ina egamogamogu ikavava. Latuwodi Erodi sigite bei idi livisi sigiepalu. Nakae siguinuwe unana avadi moe Erodi ina kaba lovina goi ima. Tuwo Barastasiyana ina Erodi nukotona isanayato. E moitamo Erodi itagona bego maliyalina tayamo taiyao sibóbwara. 21 E maliyalinayana boi siupeupe bogina ima, tauyana ana kwama dedevina ilosi. Ikavava, ina aba takínona ana kaba tusobu goi itusobu go, ivatowo ibóbwara yaidi. 22 E boda niyana sinove, tuwo sikatutao siduduwo kadi,
‘Ame tomota niyana geya, go sem ame yaubada tayamo niyana!’
23 E Erodi inovedi go, Yaubada ina togaga ana káeyana geya ikamoitamoeyeta. Tauna mainao Yauwe ina anerose ina Erodiyana iláui ikatówana; atowanayana pasina motemoteta sinaena sikani, e ikámasa.
24 Go Yaubada ina livalayana tuwaina itogaga. Yeisu ina tonumisayao sina livalayana tuwaina sisanunui, tauna tauyadi idi boda tuwaina ibadabada.
Tonumisa Antiyoki goi Saulo be Banabasi
sivamoleyedi sina Vala Dedevina sitalavaite
sivamoleyedi sina Vala Dedevina sitalavaite
(Guinuwa 12:25—14:28)
Baloma Kimaasabaina
Saulo be Banabasi ikinavedi sina sitalavaita
Saulo be Banabasi ikinavedi sina sitalavaita
25 E kidi go Banabasi be Saulo idi paisewa Yerusalema goi bogina ikavava, tuwo sikaluvila sina Antiyoki go, Iyoni taiyao. Tauyana youyuwoina moe Maki.† Gui 12:12.
‡12:2 Yemesa: Ame Yemesayana moe Sebedi natuna (Mad 4:21).
‡12:12 Maki: Ame Makiyana Vala Dedevina igini yoina Vala Dedevina Maki igini.
‡12:15 Pita ina anerose: Amo tutayana tomota idi nuwonúwana ame nakae: Tomota tamo tamo mana anerose. Ame aneroseyana ina paisewa moe matakavata. Aiyuwoina tomota idi nuwonúwana bego aneroseyana maisina tauna nakae tomotayana imataakavate maisiyana. Tauna ameko tomota nakona sinuwonúwana bego ame Pita ina anerose unana Pita maisiyana. Go aiyuwoina nakona amo Pita balomaina. Kidi Diyuu sinuuwonúwana neta koroto ikámasa, balomaina ikaaiyaka poyapoya goi maliyalina maniyedi namliyeta ituko.
‡12:17 Yemesa: Ame Yemesayana moe Yeisu siyana toina, sinadi tayamo. Tauyana Yeisu ana totugugunayao Yerusalema goi adi tovakumgo (Mak 6:3).