2 “Igamu na mane sasaga sosongo mamu dona levo na omea,

kamu rongomia na omea inau kau tsaria vanigamu.

3 Na mangana tinoni e dona ke ganividana na mutsa ti ke gani dou se tagara,

me vaga goto na kulina tinoni e dona ke rongomigadovia laka e mana se e tau mana na omea e tsaria kesa tinoni.

4 Igita nogo nida aqo kalina ia ka vilekedoua na goko sui igita a rongomia,

ma ka pedea nagua e mana se e tau mana.

5 Ma Job segenina nogo e tsarivaganana iani, ‘Inau au gotolaka i matana God,

maia God nogo e sove na sauvaniaqu na pedegoto;

6 me atsa moa ti e gotolaka niqu sasaga, migira ara tsaria moa laka au tinoni vanga pero,

me atsa moa goto ti au dona laka au tau tsukia sa sasi, minau au boka seko sosongo nomoa.’

7 “?Megua igamu, laka amu reinogoa sa mane ke vaga iani a Job ni?

Aia e tau lelê dona na kukuni taniana God.

8 Aia e reingaoa moa na totu koluaqira na tinoni sasi,

ma na liu bamai koluaqira na tinoni vanga nauseko.

9 Rongona aia segeni e tsaria na goko iani, ‘E tau lelê pelua sa tinoni na totugoto i matana God.’

10 “Bâ, ma kamu rongomiau inau, igamu na tinoni amu dona na padagadovi omea!

Aia God Susuliga Sosongo e tau saikesa dona ke naua sa omea ke sasi,

11 Aia e saupeluna vanigira na tinoni taonia niqira aqo ara naua,

me nauvania pipi tinoni tatasa vaga e ulagana nina sasaga.

12 Eo, e mana nomoa aia God Susuliga Sosongo e tau dona ke naua sa omea ke sasi;

me utu saikesa goto ke tavongani pede sekolia sa tinoni.

13 ?Me laka God e adia gana susuliga i konina kesa segeni?

?Laka asei nomoa e molovania aia ke tangoli kaputia na barangengo popono?

14 Me ti vaga God ke adivisutugua na magomago na mauri,

15 mi tana ti igira sui lakalaka na tinoni sauba kara mate,

ma kara lia visutugua na kao.

16 “Mi kalina ia igoe a Job ko rorongomai ti vaga igoe o sasaga.

17 ?Laka tangomana kesa, aia e reisavia na pedegoto, ke tagaovi gotosigira na tinoni?

?Mo padâ laka e tugugo igoe na kedeana God, aia e gotolaka me susuliga sosongo?

18 God moa e dona ke kedegira na taovia tsapakae ma na tagaovera sui

kalina igira ara tau naudoua niqira aqo se ara tsutsukibo.

19 Me tau dona ke sanga kesa tabana moa i koniqira igira na tagaovera,

se ke padalokigira bâ igira ara tamani omea danga liusigira igira ara tau tamanina sa omea,

rongona aia nogo e volagira na tinoni sui lakalaka.

20 Na tinoni e dona ke tavongani laba vania na mate tana bongi.

God nogo, me tau na limana tinoni, e labu pukaligira na tinoni mara nanga lê sui,

atsa moa ti e tangiloki na rongoqira.

21 Aia e momorosia pipi sui niqira tsakutua na tinoni.

22 Me tagara goto sa rodo pulipuli e tugua i tana kara ba taopoi tania God igira na tinoni vanga nauseko.

23 God e tau kilia ke titivania sa tinoni na tagu gua aia ke ba laba i matana tana pede.

24 Mi kalina aia e ngaoa ke aditsunagira na tagaovera tania niqira aqo,

maia e tau goto kilia ke lave tugutugu talua laka ti e dou niqira sasaga se tagara,

rongona aia e donaginigira sui nogo.

Maia e dona ke aditsunagira moa me ke molokaegira na tinoni tavosi kara tugugira.

25 Tana rongona e donagininogoa na omea sui igira ara naua,

ti aia e labu pukaligira me tsogori rapasigira tana bongi.

26 Aia e kedegira malemale na tinoni sasi i tana e tugua na tinoni sui kara reigira,

27 rongona igira ara petsakoe mara tau nogo muria aia,

mara peagira pipi sui nina ketsa.

28 Mara rotasi sosongoligira goto na tinoni ara tau tamanina sa omea,

ti igira ara gini ngangaidato vania God ke sangagira, maia e rongomia niqira nonginongi.

29 “?Me ti vaga God ke tau goto padangaoa na nauana sa omea, me laka tangomana kesa ke vaitsarigana?

?Me ti vaga aia ke poia na ngorana, masei sauba ke reilakana?

Maia segenina moa e reitutugu kaputigira na tinoni ma na vera sui,

30 kara gini tau tangomana igira na tinoni vanga nauseko na tangoliana na aqo tagaovera, ma na raqa sasiliaqira na tinoni.

31 “?Migoe a Job, laka o koevulagigira nogo vania God nimu sasi,

mo vekevania laka ko tau goto sasi tugua?

32 ?Me laka o nonginogoa God ke tusuvulagi vanigo na omea seko o naugira,

mo tami manana i tobamu na mololeana?

33 ?Me ti vaga igoe o reisavia na omea God e aqosia,

ma nagua goto o ngaoa aia ke nauvanigo?

Nimu aqo nogo igoe ko pede, me tau inau;

mo ko tsarivanigami nogo kalina ia nagua o padâ.

34 “Eo, mi kalina igira ara sasaga loki mara dona na padagadovi omea

kara rongomia na omea inau au tsaria, me sauba igira kara tsarivaganana,

35 ‘Igira sui nina goko a Job ara tau talu mai tana sasaga,

na goko bubulega sui tagara rongona lê moa.’

36 Ke dou bâ ti vaga God ke kede saikesalia a Job,

rongona aia e goko vaga saikesa moa na tinoni vanga nauseko.

37 Maia e paboginia moa nina sasi na petsakoe mangana God,

me ngaoa moa laka aia ke managana.

Mi matada igita sui aia e tû me goko peâ God.”