33
1 Me goko babâ e Elihu me tsaria,
“Mi kalina ia, igoe a Job ko rongomi vatavigira dou pipi sui niqu tsaqina goko kau tsaria.
2 Au vangaraunogoa laka kau tsarivanigo na omea au pada i tobaqu.
3 Pipi niqu tsaqina goko ara talu tana tobalaka, mara mana saikesa.
4 Nina Tarunga Tabu nogo God e aqosiau me tusuvaniau na mauri.
5 “Me ti vaga ke tau utu vanigo mo ko tuguvisumai vaniau niqu goko.
Bâ, me dou ti ko vangaraugira na goko sauba ko tsaria.
6 Igoe minau, kaita ka kesa moa atsa i matana God,
maia e aqosiginikaita sui moa na kao.
7 Me vaga ia me tagara sa nimu rongona igoe na mataguniaqu inau;
e utu inau kau bingi sosongoligo igoe.
8 “Miani nogo nimu goko vaga inau au rongomia igoe o tsaria:
9 ‘Inau au tau saikesa tsukia sa kibo; mau tau goto nausasilia sa omea.
inau au totu male saikesa nogo i matana God, me tagara sa sasi i koniqu.
10 Ma God moa e lave sautuna na sekoliaqu,
me nauvaniau vaga moa ti inau kesa gana gala.
11 Me soriginia na itai tapala na tuaqu,
me tuvigira pipi sui niqu aligiri au naua.’
12 “Ko rorongo dou igoe a Job, tana goko vaga igoe o tsaria e tau goto.
Aia God e loki me sasaga liuliu bâ liusigira na tinoni sui.
13 ?Megua igoe ti o taimatana God, mo tsarivaganana iani,
‘E utu saikesa aia ke tuguvisu vaniau sa niqu goko’?
14 Me atsa moa ti vaga God ke goko me ke goko danga kalina,
me utu vanigita tinoni na rongomi gadovidouana na omea aia e tsaria.
15 Mi tana bongi kalina ara maturu na tinoni,
maia God e goko vanigira tana bolebole.
16 Tana bolebole vaga nogo ia maia e sangaviginia na kuliqira,
ma nina goko parovata e gini molo matagu vanigira.
17 God e nauvaganana ia rongona kara gini mololea niqira sautu sasi,
me ke suilavagini vanigira niqira kaekae.
18 Maia e tau tamivanigira kara gini mate na isi,
me laumaurisigira tania na mate.
19 “God e dona ke totosasaga vania na tinoni
tana molomaiana na lobogu ke gadovia,
me ke gini vatsangisavi tana konina popono.
20 Na tinoni e lobogu loki e sibi tobana me tau goto ngaoa na mutsa,
atsa moa ti vaga na mutsa gani dou sosongo.
21 Ma na konina e qaroqarosaga, me kakatsa lê na sulina;
22 me varangi nogo ke ba tsuna tana barangengo na mate.
23 “Me tau utu ke kesa i laoqira na toga nina angelo God
ke mai sangaa, me ke sauvulagi vania na omea nina aqo ke naua.
24 Me ke goko tuguna vania God me ke tsaria,
‘!Ko nusilea na tinoni iani,
mo ko laka na tamivaniana ke tsuna bâ tana barangengo na mate!
Miani nogo na qolo agana na mani suilovana.’
25 Bâ, mi tana ti na konina na tinoni ia ke dato magobu dou, me ke susuliga visutugua.
26 Mi kalina aia ke nonginongi, ma God sauba ke tabea nina nonginongi,
maia ke gini mage na totu i matana God ma na samasama vaniana.
Ma God sauba ke molo gotosi vanitugua nina omea sui.
27 Mi mataqira na toga maia ke tû me ke tsarivaganana, ‘Inau au sasi i matana God.
Mau tau naua sa omea ke goto, maia God e gaea nomoa na mauriqu.
28 Me tangolivisuau te au tau gini tsuna tana barangengo na mate,
mau totu mamauri moa.’
29 “Eo, God e naubaba moa na omea sui vaga girani danga kalina,
30 rongona ke tangoli visuginia na tinoni me ke tau mate,
me ke gini magemage na totu mamauri baba moa.
31 “Mi kalina ia, migoe a Job ko rongomidoua na omea inau kau tsaria;
ko totu mui mo ko tamivaniau kau goko.
32 Me ti vaga ko tamanina sa nimu goko o ngaoa na tsariana, me dou moa ti ko tsaria minau kau rorongo;
rongona au ngao sosongolia kau makalia i mataqira na toga sui laka igoe o tau naua sa sasi.
33 Me ti vaga ko tau tamanina sa nimu goko, me dou ko totu mui moa mo ko rorongo,
minau kau sasanigo ke koegua ti ko lia na tinoni sasaga.”