1 Kongali* Sol 6:10 andake mende kaitinya panao dapa pia: enda mendeme niki doko yonge pee petae petea. Kana doko baanya moko pundipundi dokonya kateamopa aiyomba dokonya bui kingi ita-kisa dee lapoma balu joo manditae petea. 2 Baa* Jen 3:16; Ais 66:7 wane tongota doko manjanya maita piamopa baa etete tanda napala puu lao ae lao wane manjanya pia. 3 Dee* Dan 7:7 kongali waka mende kaitinya panao dapa pia: kanopato pambea kangyoo andake aiyomba kalange katenge doko aiyombanya nenge kingi ita mende katenge-pyaa. Aiyomba dutupanya kiŋinya balu kalange manditae katea. 4 Baanya* Dan 8:10 etenge dokome kaitinya bui dupa pitaka tepoma pyoo lita petala teponge doko pyalyandanya isa yuunya pyandea. Dopa petala enda wane manjanya piamo dokonya enomba-tena soo wane doko mandipatamopa baa nyoo nalanya anga petae sia. 5 Dokopa* Wee 2:9; Ais 7:14; 66:7; Pa 2:27; 19:15 enda dokome wane ane mende mandea. Tenda wane dokome aene kolyepe mende minao yuu dupa pitakanya endakali tata dupa pitaka iseta. Enda dokome wane doko mandipiamopa mendeme nyimina ketae Gotepa Gotenya isoo petenge toko dokopanya pea. 6 Dokopa* Pa 11:2-3; 12:14 enda doko paka pyakao endakali napalenge yuu mendenya pea. Peamo yuu dokonya mendapuame baa yuu gii taosene mende-kisa andate lapoma dee kingi ita tokange pyoo dutupanya nee maina lao Goteme yuu depa lakamaiya.

7 Kaitinya* Dan 10:13,21; 12:1; Ju 9; Pa 20:2 yanda andake mende sakatea. Enjele Maikele lenge dokopi baanya enjele dupapimi pambea andake doko yanda pimaiyaminopa, baapi baanya enjele dupapimi itingi pimaiyoo yanda pyoo kateami. 8 Dopaka doko, pambeapi baanya enjelepi dupame yandanya ita minalanya kyoto nanjepala, kapa pao kaiti-kisa dee katapenge nanjia. 9 Dokopa* Jen 3:1,4,14-15; Sak 3:1; Lu 10:18; 22:31; Jo 12:31; Pa 20:2-3 Maikelepi baanya enjelepi dupame pambea andakepi baanya enjelepi dupa soo isa pyandeami. Kanopato doko kenge Satane lata, dee Tenge Setenge lata pingi doko, baa wambatae waka. Baame yuunya endakali dupa pitaka minakasingi.

10 Mendeme* Jop 1:9-11; Sak 3:1; Pa 11:15 kaitinya katao puu lao lao pituu, “Naimanya Gote dokonya enomba-tena katao kuka kotakapi naimanya masoo miningi kaiminingi dupa-kisa tenge setao katenge doko kaitinya soo isa pyandatelyamino. Tenge dokonya minao Gotenya pyoo nyingi manapi, pupu lapaepi, isingi manapi, dutupa epapuaka ipatelyamo. Dee baanya Kataisa doko pupu lapae nyepelyamoaka. 11 Naimanya masoo miningi kaiminingi dupame Sipisipi Yakane dokonya taiyoko dokopa, baanya lao pii lamaingi dokopa dolapome tenge setao katenge doko ita miniami. Dopa petala dupame nyakama tange kapa pao kumatamane lao etete nea nakayami. 12 Tenge* Ais 44:23; 49:13; 2 Ko 6:2; Pa 20:3 dutupanya minao emba kaitipi, nyakama kaitinya katenge dupapi mona yaepalapa! Dopaka doko, isa yuupi solowata petepi nyakama etete koyatami iki lamo. Doko, Satane baa isa nyakama-kisa epeamo dokome gii kuki iki katatama lumu lao masetala etete tomba nao epeana,” lea.

13 Pambea* Jen 3:15 dokome baa soo isa yuunya pyandeami kandatala, enda wane ane mandeamo doko baame boo wataminia. 14 Dokopa* Eke 19:4; Ais 40:31; Dan 7:25; 12:7; Pa 11:3; 12:6 enda doko baanya yuu depa lakamaiyamo endakali napalenge yuu dokonya buu lao pena lao mendeme yaka lakepame andake mendenya papa mendalapo baa maiya. Yuu dokonya baa pambea dokopa tependa joo pitatamopa ee kana tepoma-kisa dee kana tokange dutupanya baa isoo nee maitami. 15 Dokopa endaki liyepala enda doko soo paakale pena lao enda dokonya maitasa kanopato dokome endaki katyuu pyasia. 16 Dopaka doko, yuu dokome enda doko nisoo pukuotala, endaki andake kanopato dokome katyuu pyasiamo doko nyoo koko palyia. 17 Dokopa* Jen 3:15; Dan 7:7,21; Pa 11:7; 13:7; 14:12 kanopato dokome enda doko etete imbumi kumapala, enda dokonya wane waka dupame Gotenya mana setapae dupa watao minao Jisasame pii leamo dupa watao miningi endakali dupa yanda pimaiya pea. 18 Dopa petala kanopato doko baa solowata pete lemba dokonya sia.