1 Dokopa* Lu 10:4-11 Jisasame disaipele kingi ita-kisa dee lapoma dutupa epena lao nyoo kambu pyatala kalai mendapua isina lao dokaita pupu lasia-pyaa. Pupu lasetala enjele koo tata tata dupa watao pyapengepi yaina dupa mee jakamaipengepi kalai dupa dokaita maiya-pyaa. 2 Maitala dokaita lamaiyoo, “Nyakamame Gotenya isingi dokonya lao pii lamaiyoo, yaina nyepae dupa mee jakamaiya pupape! 3 Paanya pituu pangalipi mende naminao nokainapi, neepi, munipi opale mende manja nayao yonge pee pingi mendai iki pyoo pupape. 4 Pataminopa* Ap 9:43; 16:15; 17:7; 18:3 endakali mendeme nyakama andaka lanyia kandeno doko, anda dokonyaka kalyepape. Dee paanya pituu, anda doko yakinalapape. 5 Endakali* Ap 13:51 mendapuame nyakama taeme ipamini lamo lao lanyala nayami kandeno doko, nyakamame yuu taono doko yakinatala pao pituu, dupame kandatala masina lao nyakamanya mokonya kuni kungumapi patatamo dupa lyanda lanya nepalapape!” Jisasame lea-pyaa. 6 Dopa lateamopa dokaitame pupala taono yakane dupa pitakanya payao Wai Pii Epe doko lamaiyoo yaina pyapae dupa pitaka mee jakamaiyami-pyaa.

7-8 Jisasame* Mt 16:14; Mk 8:28; Lu 9:19 piamo dupa pitakanya atome pii dupa yuu yakane isingi akali Etote dokome sia-pyaa. Endakali mendapuame, “Jone Kaimbu Pingi doko malunya sakatapyana,” leami-pyaa. Mendapuame, “Akali Ilainja doko sakatapya lamona,” leami-pyaa. Dee mendapuame, “Potopesa wamba kateamino dupanya mende malunya dee sakatapya lamona,” leamiaka-pyaa. Dopa leamino doko sepala Etote mona andea-pyaa. 9 Dopa* Lu 23:8 pyoo katao Etoteme lao pituu, “Nambame Jonenya mange kepatewaka doko, pii longo silyo akali doko api lusilyamape?” lea-pyaa. Baame Jisasa kandapu laka lao masoo kutao katea-pyaa.

10 Maitakao* Mk 6:30-31,45; Lu 10:17; Jo 1:44 aposele dupa pilyoo ipupala nyakamame kalai wakale wakale piamino dupa pitaka Jisasa lamaiyami-pyaa. Dokopa baame dokaita laminao pupala yuu taono Betesaita lenge dokonya dutupa-pipa iki kateami-pyaa. 11 Dopaka* Mk 8:4-10 doko, endakali dupame, “Jisasa yuu Betesaita dokonya kalyamona,” lapae sepala baa watao epeami-pyaa. Epeaminopa Jisasame dupa lanyepala Gotenya isingi dokonya lao pii lamaiyoo, dee endakali mendapua yaina paleta kateamino dupa kandatala mee jakamaiyoo pia-pyaa.

12 Yuu alemanjiamopa, akali kingi ita-kisa dee lapoma dutupa pilyoo Jisasa kateasa ipupala baa lamaiyoo, “Yuu dakenya endakali napalengema lamona, endakali dokaitame yuu taono yakanepi mee anda yuupi soo pelyamo dupanya nee natamipi luu palitamipi pima pena laa!” leami-pyaa. 13 Dopa* 2 Kiŋ 4:42-44 leaminoaka doko, Jisasame dokaita lamaiyoo, “Nyakamameaka dokaita nee maiyepa!” lea-pyaa. Dopa lateamopa dokaitame lao pituu, “Endakali dupa pitakame nee nena lao naimame sambakamaiya napatamano kandao doko, naimanya betesa yuungi wapaka lapoma pyoo iki silyamona, kapa napapomo,” leami-pyaa. 14 Akali peteamino dupa taosene yuungi joo peteami-pyaa. Dokopa Jisasame baanya disaipele dupa lamaiyoo, “Nyakamame endakali dupa kingi ita yuungi yuungi lao wakale limbao petena lamaiyepa,” lea-pyaa. 15 Leamoli pyoo baanya disaipele dupame lamaitiaminopa endakali pitaka isa peteami-pyaa. 16 Dokopa* Lu 22:19; 24:30-31; Ap 2:42; 20:11; 27:35 Jisasame betesa yuungi wapaka lapoma pyoo siamo dutupa nyepala kaiti-kisa kandalyetae katao yaka pilino lao loma setala nee dutupa konjia-pyaa. Konjepala baanya disaipele dupame mokosoo endakali dupa maina lao maiya-pyaa. 17 Nyepala maiyaminopa dokaita pitakame nao tiaka kayapala kakana sina kayamino dupa disaipele dupame nyoo baseketa mandi kingi ita-kisa dee lapomanya mandyuu tumbasiami-pyaa.

18 Koto* Lu 3:21 mende Jisasa iki loma soo kateamopa, disaipele dupa baa kateamo dokonya epeami-pyaa. Epeaminopa baame dokaita pisoo, “Endakali kambu dupame namba kandao apina lengemape?” lea-pyaa. 19 Dokopa* Mt 14:1-2; Mk 6:14-15; 9:11-13; Lu 9:7-9 dokaitame pii yanu pyao, “Endakali yangimi emba kandao Jone Kaimbu Pingi dokona lengema. Yangimi Ilainjana lengema. Dee yangimi potopesa wamba kateamino dupanya mende dee malunya sakatapyana lengemana,” leami-pyaa. 20 Dokopa* Lu 2:26; 23:35; Jo 1:49; 6:66-69; 11:27 baame dokaita lamaiyoo, “Doko nyakamame namba kandao apina lengemape?” lea-pyaa. Dopa leamopa Pitame pii yanu pyao, “Emba Gotenya Kataisa dokona,” lea-pyaa.

21 Pitame* Mk 1:34 dopa leamopa Jisasame pii kyoto joo dokaita lamaiyoo, “Nyakamame Pitame pii lelyamo doko endakali mendaipi mende lamaiya nayalapape!” lea-pyaa. 22 Dopa* Lu 9:43-45; 17:25; 18:31; 24:7,26,44 latala baame pii mende lao pituu, “Endakalinya Ikiningi dokome tanda longo lao napenge. Isingi akalipi, pitisa mupapi, mana setapae masingi akalipi dupame baa daa latala pyao kumasetami. Dopa petataminopa koto teponya Goteme baa dee sakatasetana,” lea-pyaa.

23 Dokopa* Lu 14:27; Jo 12:26* Mt 10:38-39 baame endakali dupa pitaka lamaiyoo, “Endakali mendeme namba watao payatoo lao masetamo kandao doko, baame baa tange kame setala yuu yongata dii lao baanya ita poko doko nyoo soo namba watao paena. 24 Endakali* Lu 17:33; Jo 12:25 mendeme baa tange isoo auu pyoo katapu laka lao masetamo kandao doko, baa alu pita. Dopaka doko, endakali mendeme namba lao masetala baa tange kame setamo kandao doko, baa auu pyoo katata. 25 Doko, endakali mendeme yuunya oapi dupa pitaka nyoo setao katapala baa koyatamo kandao doko, oapi dupa pitakame aipa petala baa nisetape? 26 Endakali* Mt 10:33; Lu 12:9; 2 Ti 1:8; 2:12; 1 Jo 2:28 mendeme nambapi nambanya piipi dupanya elya kayatamo kandao doko, Endakalinya Ikiningi tii pipae doko baanya Takangepi enjele epe etete dupa-pipa awapa tii pyoo ipao pituu baame endakali doko kandao elya kayata. 27 Nambame* Mt 10:23; Lu 22:18; Jo 21:22; 1 Te 4:15-18 nyakama kiningi langilyona, endakali ae kalyamino datupanya mendapua kumala nayataminopa Gotenya isingi doko kandatamina,” Jisasame lea-pyaa.

28 Jisasame* Lu 3:21; 5:16; 6:12; 8:51; 9:18; 11:1; 22:41* 2 Pi 1:17-18 pii dutupa latala maitakao koto tukulapopi mende pateamopa, baame Pitapi, Jonepi, Jemesapi utupa laminao yuu manda mendenya loma sala pea-pyaa. 29 Pupala baame loma soo kateamopa baanya lengelyaapi doko waka jia-pyaa. Baanya yonge pee doko etete kyoo lao lenge lipilipi pia-pyaa. 30 Dopa* Lu 24:4; Ap 1:9-11 piamopa akali lapoma Mosesepa Ilainjapa lee mendai ipao baa kateasa kalyu petala pii lao kateami-pyaa. 31 Akali* Lu 9:22; 13:33 dolapo kaitinya tii pipae doko-pipa katao ipupala Jisasame maitakao Jetusaleme pupala kalai etasalanya pitamo dupapi kumatamo dupapi dupanya lao pii leami-pyaa. 32 Pitapi,* Jo 1:14; 2 Pi 1:16-18 Jonepi, Jemesapi dutupa lenge luu kayaminoaka doko, luu palya nayami-pyaa. Dokaitame Jisasa baa tii pipae jiamo doko kandao pituu akali lapoma baa-pipa kateambino dolapo kandeamiaka-pyaa. 33 Akali* Lu 5:5; 8:24,45; 9:49; 17:13 lapoma dolapome Jisasa yakinatala paanya piambinopa, Pitame Jisasa lamaiyoo, “Akali Andake, naima dakenya katapumanopa auu pilyamona, aiyaa anda tepoma pimana! Mende embanya, mende Mosesenya, mende Ilainjanyana,” lea-pyaa. Pitame pii leamo dutupanya tenge mende masala nayao mee ambe lea-pyaa.

34 Baame* Lu 1:12 pii dutupa lao kateamopa kopa mendeme ipupala nyakama sanga piamopa akali dutupame paka kayami-pyaa. 35 Dokopa* Ais 42:1; Mt 3:17; 12:18; Mk 1:11; Lu 3:22; Jo 1:34; 12:28-30 kopa dokonya pii mende tambetambe ipupala lao pituu, “Doo kalyamo doko nambanya Ikiningi, baa nambanya yapao nyepae dokona, nyakame baanya pii doko sakamaiyepape!” lea-pyaa. 36 Pii* Lu 9:21 doko lalu peteamopa dokaitame Jisasa iki kateamo kandeami-pyaa. Gii dokopa dokaitame nengekaita lyokatala kandeamino dupanya mendaipi mende endakali mende lamaiya nayami-pyaa.

37 Taita dopa pyoo dokaitame yuu manda doko yakinatala peaminopa endakali kambu longo mendeme Jisasa kaitinisa kandanyiami-pyaa. 38 Dokopa akali dupanya mendeme endakali kaina dokonya katao kyoto joo ee lao, “Mana Lenge Akali! Embame nambanya wane dake nisakape! Nambanya wane mendai dake iki-kaita embame nisakatale lao ee lelyo. 39 Enjele koo mendeme wane dake minatae soo walu lasilyamopa baa ae lao kambu apupuaka mandyuu singi. Dopa pyoo silyamopa enjele koo dokome yonge dupa koyasoaka katao yapa yakinala naenge. 40 Dopa pingi dokonya nambame embanya disaipele dupame enjele koo doko watao pyakamaina laloaka doko, dokaitame kapa pao watao pyakamaiya nayalaminona,” lea-pyaa.

41 Dopa leamopa Jisasame lao pituu, “Kanau! Masoo minala naengema uanga pyoo paengema endakali nyakama! Oo koto koto ongo namba nyakama-pipaka tole katatama laape? Nyakamame nambaka nenge nyoo katatami laape?” lea-pyaa. Dopa latala baame akali doko lamaiyoo, “Embanya wane doko laminao asa ipu!” lea-pyaa. 42 Laminao epeamopa enjele koo dokome wane doko lombanya setapala minao walu lasia-pyaa. Dokopa Jisasame enjele koo doko pyalanya leamosa wane doko mee jia-pyaa. Dokopa Jisasame wane doko takange doko tange maiyakamaiya-pyaa. 43 Dokopa endakali dupa pitakame Gotenya kalai andake piamo dupa kandatala mona andeami-pyaa.

Koteaka lao baame piamo dupa pitaka kandatala endakali dupame baa lalyoo kateaminopa Jisasame baanya disaipele dupa dapa lamaiya-pyaa: 44 “Nyakamame* Lu 9:22; 12:50; 17:25; 18:31-33 pii datupa sepala kame nasalapape. Akali mendeme Endakalinya Ikiningi doko endakali dupa laitaka pyaanya enge nyalanya pilyamona,” lea-pyaa. 45 Dopa* Lu 18:34 leamoaka doko, pii dokonya tenge doko masala naena lao yalo petae siamosa disaipele dupame masala nayami-pyaa. Dee dokaitame pii dokonya tenge doko baa-kisa pisalanya paka kayami-pyaa.

46 Dokopa* Lu 22:24 disaipele dupame, “Naimanya mende api alyasale joo kalyamape?” lao pii yanda pyoloo piami-pyaa. 47 Dokopa Jisasame dokaitanya masiamino dupa kandatala baame wane koo mende kii minao nyepala baanya patalisa-kaita katasia-pyaa. 48 Dopa* Mt 10:40; 18:5; Lu 10:16; 14:11; 22:26; Jo 13:20 petala dokaita lamaiyoo, “Endakali mendeme namba lao masetala wane koo dake lanyilyamo dokome namba lanyingiaka. Endakali mendeme namba lanyilyamo dokome namba puu leamo doko lanyingiaka. Dopana, nyakama pitakanya pundipundi joo katenge endakali doko alyasalena,” lea-pyaa.

49 Dokopa* Lu 5:5; 8:24,45; 9:33; 17:13; Ap 3:16; 19:13 Joneme baa lamaiyoo, “Akali Andake, akali mendeme embanya kenge doko lao enjele koo dupa watao pyapumopa naimame kandatala baa naima watao napaenge dokonyana kaena lapumana,” lea-pyaa. 50 Dopa* Mt 12:30; Lu 11:23 leamopa Jisasame baa lamaiyoo, “Nyakamame baanya kalai doko kaena lao daa nalalapape! Endakali mendeme nyakama yandapipi nanjoo kalyamo doko nyakama tata joo katengena,” lea-pyaa.

51 Goteme* Mk 10:32; Lu 13:22; 17:11; 18:31; 19:28 Jisasa kaiti-kisa lanyetona lao masiamo gii doko tengesa pia-pyaa. Dopa piamopa Jisasame Jetusaleme paanya mona mendai palyetala sakatao pea-pyaa. 52 Kaitinisa* Mt 1:19; 10:5; Mk 10:1; Jo 4:40-42 pao pituu baame baanya wai minakamaiyoo paenge akali mendapua wambao pena lea-pyaa. Dokopa akali dutupame Samatia tangemanya yuu mendasa pupala Jisasa ipapomo lao baanya kaitinipi andapi dupa depa lakamaiyanya masoo kateami-pyaa. 53 Dopaka* Jo 4:9 doko, Jisasa baa Jetusalemeaka paapomona lao masetala Samatia tange dupame baa nyakamanya yuusa lanyala nayami-pyaa. 54 Dokopa* 2 Kiŋ 1:9-16; Mk 3:17 disaipele Jemesapa Jonepame mana doko kandatala Jisasa lamaiyoo, “Kamongo, nalimbame kaitinya itate kaiyepae mende epena lao wii latala endakali dokaita tao mulyina lambape?” lao pisiambi-pyaa. 55 Dopa lao pisiambinosa Jisasame kapilyetala dolapo kandao pyalanya lea-pyaa. 56 Dokopa dokaitame yuu doko kayapala mendasa peami-pyaa.

57 Dokaita kaitinisa peaminopa akali mendeme ipupala Jisasa lamaiyoo, “Emba payateli pyoo nambame emba watao payatoana,” lea-pyaa. 58 Dopa leamopa Jisasame baa lamaiyoo, “Yana kapua dupanya palenge yuli kombe dupa singi. Dee yaka dupanya palenge panda singiaka doko, Endakalinya Ikiningi dokonya imambu soo aiyomba setenge panda mende nasingina,” lea-pyaa. 59 Dopa* Lu 14:26,33 latala dee baame akali waka mende lamaiyoo, “Embame namba watao ipu!” lea-pyaa. Dopa leamoaka doko, akali dokome baa lamaiyoo, “Akali Andake, wambao nambame nambanya takange doko malu petala puu lapoko!” lea-pyaa. 60 Dokopa* Lu 15:24 Jisasame baa lamaiyoo, “Endakali kumapae joo katengema dupame kumapae yango dupa tange malu pina kayapala embame Gotenya isingi dokonya lao pii lao tayala puu!” lea-pyaa. 61 Dopa* 1 Kiŋ 19:20 lateamopa akali waka mendeme Jisasa lamaiyoo, “Akali Andake, nambame emba watao payatowakana, wambao nambame nambanya tata dupa lasa latala puu lapoko!” lea-pyaa. 62 Dokopa* Pl 3:13 Jisasame baa lamaiyoo, “Endakali mendeme wambao kalai mende pyaanya elyaka kayao sakatatala maitakao mona kapilyetala kayata pyoo katatamo kandao doko, Goteme baa isala nayatamopa baame kalai mende kapa pao napitana,” lea-pyaa.