1 Iwe, lon afisuen ierin ach oola, lon aengolun ränin ewe alimuen maram, ekoch me lein ekewe souakomwen chon Israel ra feito o mot mwei, pwe repwe angei öüröürer me ren ewe Samol mi Lapalap. 2 Mürin, ewe Samol mi Lapalap a kapas ngeniei, 3 “Nöün aramas, kopwe kapas ngeni ekewe souakomwen chon Israel o üreniir pwe iei aloi ngang Kot ewe Samol mi Lapalap, ‘Ifa usun, oua feito rei pwe oupwe angei ämi öüröür seniei? Mwo manauei, üsap mwüt ngenikemi pwe oupwe aisiniei och. Ngang Kot ewe Samol mi Lapalap üa kapas.’ 4 Nöün aramas, ifa usun, kopwe apwüngüür? Ifa usun, kopwe eäni apwüng ngeniir? Kopwe achema ngeniir än semelaper kewe föför mi anioput 5 o üreniir, ‘Iei alon Kot ewe Samol mi Lapalap: Lon ewe rän, lupwen üa fili Israel, üa pwon fän akapel ngeni ekewe mwirimwirin Jakop, üa pwal pwärätä ngeniir usi me lon ewe fanü Isip. Iwe, üa pwon fän akapel ngeniir o apasa: Ngang ewe Samol mi Lapalap ämi we Kot. 6 Lon ewe rän üa pwon fän akapel ngeniir, pwe üpwe emwenirewu seni ewe fanü Isip o emwenirelong lon eu fanü üa fili fän iter, eu fanü mi mürina seni meinisin, eu fanü mi pwülüöch o fanüeräs. ✡ Eks 6.2-8 7 Iwe, üa üreniir, pwe ir meinisin repwe pöütala ekewe uluulun anümwäl mi anioput ra pwapwaiti, resap pwal alimengaueer ren ekewe uluulun anümwäl seni Isip. Ngang ewe Samol mi Lapalap ar we Kot. 8 Nge ir ra lükümach o ü ngeniei, resap mochen aüselingaei. Resap pöütala ekewe uluulun anümwäl mi anioput ra pwapwaiti, resap pwal likitala ekewe uluulun anümwäl seni Isip. Iei popun üa ekiekin awarato ai lingeringer wor o amüchü ai song ngeniir lon Isip. 9 Nge üsap föri, pun üa ekiekin tümwünü iteüöchi, pwe itei esap küna turunufas me lein chon ekewe mwü ia ra wasöla ie. Pun üa fen asile ngeni chon Israel me fän mesen ekewe mwü, pwe üpwe emwenirewu seni ewe fanü Isip. 10 Iwe, üa emwenirewu seni ewe fanü Isip o emwenirelong lon ewe fanüapö. 11 Üa ngeniir ai kewe allük o aiti ngeniir ai kewe pwüüng, pwe chokewe mi aleasochisiir repwe manau. ✡ Lif 18.5 12 Üa pwal ngeniir ai kewe ränin sapat pwe eu asisil lefilei me ir, pwe repwe silei pwe ngang ewe Samol mi Lapalap üa apiniir. ✡ Eks 31.13-17 13 Nge ekewe chon Israel ra lükümach o ü ngeniei lon ewe fanüapö. Ra fokun purätiu ai kewe allük o aleasolapa ai kewe pwüüng aramas ra wisen aleasochisiir, pwe repwe manau ren. Iwe, ra pwal fokun apiningaua pinin ai kewe ränin sapat. ✡ Lif 18.5

Iei popun üa ekiekin awarato ai lingeringer wor lon ewe fanüapö, pwe repwe rosola meinisin. 14 Nge üsap föri, pun üa ekiekin tümwünü iteüöchi, pwe itei esap küna turunufas me lein chon ekewe mwü mi küna usun ai emwenawu chon Israel seni Isip. 15 Nge lon ewe fanüapö üa pwon fän akapel ngeniir pwe üsap emwenirelong lon ewe fanü üa fen ngeniir, eu fanü mi mürina seni meinisin, eu fanü mi pwülüöch o fanüeräs, ✡ Num 14.26-35 16 pun ra purätiu ai kewe allük, ra aleasolapa ai kewe pwüüng o apiningaua pinin ai kewe ränin sapat. Iwe, ra chök fel ngeni ar kewe uluulun anümwäl seni lon letiper. 17 Nge üa fokun eäni tong ngeniir, pwe üsap afeiengaueer o aroserela meinisin me lon ewe fanüapö.

18 Iwe, üa apasa ngeni nöür kewe lon ewe fanüapö: Ousap aleasochisi ekewe allük ämi kewe lewo ra föri, ousap tümwünü örünier kewe, ousap pwal alimengauakemi ren ar kewe uluulun anümwäl. 19 Ngang ewe Samol mi Lapalap ämi we Kot. Oupwe aleasochisi ai kewe allük o apwönüetä ai kewe pwüüng, 20 oupwe pwal apiniöchü pinin ai kewe ränin sapat, pwe repwe eu asisil lefilach. Mürin, oupwe silei pwe ngang ewe Samol mi Lapalap ämi we Kot. 21 Nge nöür kewe ra pwal lükümach o ü ngeniei. Resap fokun alesochisi ai kewe allük, resap pwal apwönüetä ai kewe pwüüng aramas ra wisen aleasochisiir pwe repwe manau ren. Iwe, ra pwal apiningaua pinin ai kewe ränin sapat. Iei popun üa ekiekin awarato ai lingeringer wor o amüchü ai song ngeniir lon ewe fanüapö. 22 Nge üsap föri, pun üa ekiekin tümwünü iteüöchi, pwe itei esap küna turunufas me lein chon ekewe mwü mi küna usun ai emwenawu chon Israel seni Isip. 23 Iwe, lon ewe fanüapö üa pwal pwon fän akapel ngeniir, pwe üpwe atoropaseer lein chon ekewe mwü won fanüfan, ✡ Lif 26.33 24 pun ra aleasolapa ai kewe allük o purätiu ai kewe pwüüng, ra pwal apiningaua pinin ai kewe ränin sapat o fel ngeni än ar kewe lewo uluulun anümwäl. 25 Iei mine üa asechirela pwe repwe apwönüetä allük mi lomotongau, repwe pwal tümwünü ekewe pwüüng resap manau ren. 26 Üa pwal asechirela, pwe repwe alimengaueer ren püsin ar asor, lupwen ra eäni asoren kek nöür mwänichi. Ren ei üa apwüngüür, pwe repwe silei pwe ngang ewe Samol mi Lapalap.’

27 Iei mine, nöün aramas, kopwe kapas ngeni chon Israel, ‘Iei alon Kot ewe Samol mi Lapalap: Mi pwal wor och mine semelapemi kewe ra turunufaseei ren, pwe ra likitieila. 28 Iwe, üa emwenirelong lon ewe fanü, üa pwon fän akapel ngeniir me mwan pwe üpwe ngeniir. Nge lupwen ra küna ekewe chukutekia, ra föri ar asor won, pwal fän ekewe irä mi mwuresires. Ikenan ra asongaei ren ar kewe asor ra keni, pwal ren ar ninala ar kewe lö mi pwokus me ar asoren ün. 29 Iwe, üa aisiniir: Met sokun lenien fel ei leni mi tekia oua feila ngeni? Iei mine a iteni Pama * Pama wewen lenien fel mi tekia tori ikenai.’ 30 Iwe, kopwe üreni ekewe chon Israel, ‘Iei alon Kot ewe Samol mi Lapalap: Pwota oua chök föri ekewe tipis semelapemi kewe ra föri o mocheisou ngeni ar kewe uluulun anümwäl mi anioput? 31 Lupwen oua uwato ämi kewe lifang o eäni asoren kek nöümi kana ngeni ekewe uluulun anümwäl, oua püsin alimengauakemi tori ikenai. Ifa usun, üpwe mwüt ngenikemi chon Israel, pwe oupwe angei ämi öüröür seniei? Mwo manauei, ngang Kot ewe Samol mi Lapalap üa apasa, üsap fokun mwüt ngenikemi pwe oupwe aisiniei. 32 Iwe, ämi oua ekieki lon letipemi, pwe oupwe apirü ekewe mwün lükün o wewe ngeni aramasen ekewe ekoch fanü ren ämi fel ngeni irä me fau. Nge ei sokun ekiek esap fokun fis.

33 Mwo manauei, ngang Kot ewe Samol mi Lapalap üa apasa: Üpwe nemenikemi ren pei mi pöchökül o manaman, üpwe pwal awarato ai lingeringer womi. 34 Üpwe emwenikemiiwu seni lon ekewe mwü ren pei mi pöchökül o manaman, üpwe achufengenikemi seni lon ekewe fanü ia oua toropasfeil ie o awarato ai lingeringer womi. 35 Üpwe emwenikemiilong lon fanüapön ekewe mwü. Ikenan üpwe eäni apwüng ngeni eman me eman leimi. 36 Usun üa apwüngü semelapemi kewe lon ewe fanüapön Sinai, iei usun üpwe pwal apwüngükemi,’ ” iei alon Kot ewe Samol mi Lapalap. 37 “Üpwe fokun tümwünükemi fän woki wokun chon fofol man o föri pwe oupwe aleasochisi ai we pwon ngenikemi. 38 Üpwe aimwü senikemi chokewe mi lükümach o ü ngeniei, pwal chokewe mi tipis ngeniei. Iwe, üpwe emwenirewu seni lon ekewe fanü ia ra nonom ie, nge resap tolong lon ewe fanü Israel. Mürin oupwe silei pwe ngang ewe Samol mi Lapalap.”

39 Iei usun Kot ewe Samol mi Lapalap a apasa, “Ämi chon Israel oupwe feila meinisin o angang ngeni ämi kewe uluulun anümwäl. Nge mürin eu fansoun oupwap fokun aüselingaei, nge ousap chüen apiningaua itei mi pin ren ämi asor me ämi kewe uluulun anümwäl.”

40 Iei alon Kot ewe Samol mi Lapalap, “Won chuki mi pin, ewe chukun Israel mi fokun tekia, chon Israel meinisin mi nom lon ewe fanü repwe angang ngeniei. Ikenan üpwe etiwakemi, üpwe angei senikemi ämi asor, ämi lifang mi fokun mürina, pwal meinisin mine oua apini fän itei. 41 Mürin ai emwenikemiiwu seni lon ekewe mwü o achufengenikemi seni ekewe fanü ia oua toropasfeil ie, üpwe etiwakemi usun ai etiwa eu asor mi pwokus. Iwe, üpwe pwärätä lefilemi me mwen chon ekewe mwü pwe üa pin. 42 Iwe, lupwen üpwe aliwinikemiila lon ewe fanü Israel, ewe fanü üa pwon fän akapel ngeni ämi kewe lewo pwe üpwe ngeniir, mürin oupwe silei pwe ngang ewe Samol mi Lapalap. 43 Ikenan oupwe chechemeni ämi kewe föför meinisin oua alimengauakemi ren. Oupwe püsin anioputakemi ren ekewe föföringau meinisin oua föriir. 44 Iwe, oupwe silei pwe ngang ewe Samol mi Lapalap, lupwen üpwe apwüngükemi sap won ükükün ämi kewe föföringau meinisin, pwe ren ai tümwünü iteüöchi me remi chon Israel,” iei alon Kot ewe Samol mi Lapalap.

45 Iwe, ewe Samol mi Lapalap a kapas ngeniei, 46 “Nöün aramas, kopwe newenewen ngeni ör o eäni kapasen üpälü ngeni. Kopwe osuni usun feiengauen wöllapen ewe fanü mi nom ör. 47 Kopwe üreni wöllapen ewe fanü mi nom ör, pwe epwe aüselinga aloi ngang Kot ewe Samol mi Lapalap: Nengeni, üpwe keni eu ekkei me lukalapom. Iwe, epwe kenala om kewe irä meinisin, ekewe irä manau pwal ekewe irä pwas. Ngetengetan esap kunula. Nge ekewe aramas meinisin seni ör tori efeng repwe mefi pwichikaren ewe ekkei. 48 Iwe, aramas meinisin repwe küna pwe ngang ewe Samol mi Lapalap üa keni, nge esap wor eman a tongeni kunuela.” 49 Nge üa apasa, “Ai Kot Samol mi Lapalap, kosap awisa ngeniei ei angang. Aramas ra fen apasa usi, pwe üa chök fos ngeniir lon pworausen awewe.”