31
Kot a filätä Pesalel me Oholiap pwe repwe angang ngeni
31.1-11
(Eks 35.30–36.1)
1 Iwe, ewe Samol mi Lapalap a kapas ngeni Moses, 2 “Iei üa filätä Pesalel nöün Uri, nge Uri nöün Hur seni ewe ainangen Juta. 3 Üa fen ngeni i Ngüni o fang ngeni silelap me tipachem me tufichin föri sokopaten angang meinisin, 4 a pwal sip le ekiekietä mettoch mi fö. Iwe, a sile angang ngeni kolt, silifer me piras, 5 a pwal sile angangen nechei fau aüchea pwe repwe maseöchülong lon lenier, pwal angangen fala irä me sokopaten angang. 6 Iwe, üa pwal filätä Oholiap nöün Ahisamak seni ewe ainangen Tan pwe epwe alisi Pesalel. Üa pwal atufichi aramas meinisin mi sile sokun angang pwe repwe tufichin föri meinisin mine üa aiti ngonuk: 7 Ewe imwenfel seni mangaku, ewe pworofel me öppüngün won, pwal pisekin lon meinisin, 8 ewe chepel me pisekin, ewe lenien atittin seni kolt mi mürina me pisekin meinisin, ewe rongen asoren ötüöt, 9 ewe rongen asoren kek me pisekin meinisin, ewe sepien töttöl me motongan, 10 ekewe üf mi mürina o pin, ewe souasor Aaron epwe üföüf, pwal üfen nöün kewe mwän repwe üföüf, lupwen ra föri ar angangen souasor, 11 ewe löön epit me ewe minen asoren ötüöt mi pwokus fän iten ewe leni mi pin. Repwe föri meinisin ükükün mine üa allük ngonuk.”
Pinin ewe ränin sapat
31.12-17
12 Iwe, ewe Samol mi Lapalap a kapas ngeni Moses, 13 “Kopwe üreni ekewe aramasen Israel, ‘Oupwe apini ai ränin sapat, pun epwe eu asisil lefilei me ämi seni eu täppin aramas tori eu täppin. Ren ei oupwe silei pwe ngang ewe Samol mi Lapalap üa apinikemi. 14 Oupwe apini ewe ränin sapat, pun a pin ngenikemi. Iteiten aramas mi aüangaua pinin ewe rän epwe ninnila. Ewer, iteiten aramas mi föri och angang lon ränin sapat epwe käriwu seni aramasan. 15 Lon ükükün wonu rän oupwe föri ämi angang, nge ewe afisuen rän ewe ränin sapat, eu ränin asösö a pin me rei. Iteiten aramas mi föri och angang lon ränin sapat epwe ninnila. ✡ Eks 20.8-11; 23.12; 34.21; 35.2; Lif 23.3; Tut 5.12-14 16 Iei mine ekewe chon Israel repwe apini ewe ränin sapat o aüöchü pinin seni eu täppin aramas tori eu täppin, pwe asisilen eu pwon esemüch. 17 Ei rän eu asisil lefilei me chon Israel tori feilfeilachök. Pun lon ükükün wonu rän ngang ewe Samol mi Lapalap üa föri läng me fanüfan, nge lon ewe afisuen rän üa ükütiu le angang o asösö.’ ” ✡ Eks 20.11
Ewe uluulun kow seni kolt
31.18–32.35
18 Iwe, lupwen Kot a wes me kapas ngeni Moses me won ewe chuk Sinai, a ngeni ekewe rüepek fau mi chöpöp, ewe ia a mak ie ekewe allük püsin Kot a makei wor.