1 Iwe, lupwen Tafit me nöün kewe aramas ra tori Siklak lon ewe aülüngatin rän, ekewe chon Amalek ra akomwen feito won ewe fanü Nekep pwal lon Siklak, pwe repwe küt liaper. Ra pwal liapeni Siklak o kenala. 2 Ra uwala ekewe fefin me meinisin mi nom lon, ekewe mi kükün me ekewe mi watte. Iwe, resap niela eman, nge ra chök uweerela o feila won aler. 3 Iwe, lupwen Tafit me nöün kewe aramas ra feito ren ewe telinimw, ra küna pwe a kar, nge pwülüer pwal nöür mwän me fefin ra oola. 4 Mürin, Tafit me chokewe mi nom ren ra kechü, tori resap chüen pöchökül le kechü. 5 Iwe, pwülüen Tafit kewe ruoman ra pwal oola, iter Ahinoam seni Jesreel me Apikael piin pwülüen mä we Napal seni Karmel. ✡ 1.Sam 25.42-43 6 Iwe, Tafit a fokun riaföü, pun ekewe aramas ra ekiekin monei ngeni fau, pokiten ir meinisin ra letipengau ren nöür kewe mwän me fefin mi oola. Nge leluken Tafit a pöchökülsefäl ren ewe Samol mi Lapalap an we Kot.

7 Iwe, Tafit a üreni ewe souasor Apiatar nöün Ahimelek we mwän, “Kopwe uwato rei ewe efot.” Iei mine Apiatar a uwato ren Tafit ewe efot. ✡ 1.Sam 22.20-23 8 Iwe, Tafit a aisini ewe Samol mi Lapalap, “Ifa usun, üpwe tapweri ei mwichen sounfiu? Ifa usun, üpwe tongeni liapeniir?” Nge Kot a pälüeni, “Kopwe tapweriir, pun kopwe fokun liapeniir o amanaua ekewe mi oola.” 9 Iei mine Tafit a feila fiti ekewe wonopükü mwän mi nom ren. Iwe, ra tori ewe öüwö Pesor, ia ekoch me leir ra nomotiu ie. 10 Tafit echök a sopwela an tapweriir fiti föpükü mwän. Iwe, rüöpükü mwän ra nomotiu, pun ra men fokun malülü pwe resap chüen tongeni pwerela pekilan ewe öüwö Pesor.

11 Iwe, ra küna eman re Isip me lon ewe fanü mi amassawa o emwenato ren Tafit. Ra amongöni pilawa o aünü koluk, 12 ra pwal ngeni eu kinikinin echö nokop seni fik me ruoumw föün wain mi pwas. Nge lupwen a wes me mongö, a aiepöchökül, pun esap mongö o ün lon ükükün ülüngat rän me ülüngat pwin. 13 Iwe, Tafit a aisini, “En nöün iö? Ia ka feito me ie?” Nge ätewe a pälüeni, “Ngang eman alüal seni Isip, nöün eman re Amalek amanau. Ai samol a likitieila, pun a toriei och samau ülüngat rän a la. 14 Äm aia küt liapem lon ewe fanü Nekep fanüen chon Cheret, lon fanüen chon Juta, pwal lon ewe fanü Nekep fanüen Kalep, äm aia pwal kenala Siklak.” 15 Tafit a aisini, “Ifa usun, ka tongeni emwenieila ren ewe mwichen chon küt liaper?” Nge i a pälüeni, “Kopwe pwon fän akapel ngeniei iten Kot, pwe kosap nieila ika atolongaei lepöün ai samol, mürin üpwe emwenukela ren ewe mwichen chon küt liaper?”

16 Iwe, lupwen a emwenala Tafit ren ewe leni, ra küna ekewe chon Amalek pwe ra toropasfeil won unusen ewe fanü, ra momongö o ükün, ra pwal pworuk pokiten liaper mi chomong ra angei seni fanüen chon Filistia me fanüen chon Juta. 17 Sorotän ewe rän, Tafit a maun ngeni ekewe chon Amalek seni lesosorusich tori lekuniol. Esap wor eman me leir a tongeni süla, chilon chök föpükü alüal mi süla won war kamel. 18 Iwe, Tafit a aliwinala meinisin mine ekewe chon Amalek ra angei. A pwal amanaua ekewe aramas meinisin pwal pwülüan kewe ruoman. 19 Esap wor eman a pöüt seniir, ese lifilifil ika ekewe mi kükün ika ekewe mi watte, nöür ät ika nöür nengin, pwal meinisin mine ekewe chon Amalek ra liapeni ika mine ra chök angei, Tafit a aliwininala meinisin. 20 Iwe, Tafit a pwal angesefäli ekewe pwiin sip me kow. Iwe, nöün kewe aramas ra emwenala ekei man me mwen pwal ekewe ekoch pwin man o apasa, “Ikkei ir ekewe man Tafit a liapeni.”

21 Mürin, Tafit a feito ren ekewe rüöpükü mwän, chokewe ra nonometiu ren ewe öüwö Pesor, pun resap tongeni tapwela mürin Tafit pokiten ra fokun malülü. Iwe, ra feila pwe repwe churi Tafit me ekewe aramas ra eti. Lupwen Tafit a kan ngeni ekewe aramas, a kapong ngeniir. 22 Iwe, ekoch mwän mi ngau me manauangau me lein ekewe mwän mi eti Tafit ra üra, “Pokiten ätekewe resap etikem, äm aisap ngeniir och seni mine aia liapeni o aliwinato, chilon chök pwe eman me eman epwe angei pwülüan me nöün kana o feila.” 23 Mürin, Tafit a üreniir, “Pwi kana, ousap fokun föri iei usun ren mine ewe Samol mi Lapalap a fang ngenikich. I a tümwünükich seni feiengau o awinnakich pwe sa akufu ewe mwichen chon küt liaper mi fiu ngenikich. 24 Esap wor eman a tipeeu ngenikemi won ei ekiek. Pun ükükün inetin ätewe mi feila maun epwe chök ükükün inetin ätewe mi nonometiu ren ekewe pisek, repwe chök nönnöpök.” 25 Iwe, Tafit a föri pwe ei lapalap epwe eu allük me pwüng fän iten chon Israel seni ewe ränin tori ikenai.

26 Iwe, lupwen Tafit a tori Siklak, a tinala ekoch kinikinin liapan ren chiechian ekewe souakomwen chon Juta o üreniir, “Iei eu lifang fän itemi seni mine üa liapeni me ren chon oputen ewe Samol mi Lapalap.” 27 Iwe, a tinala ekewe lifang ren ekewe aramas mi nom lon Petel me Ramot mi nom lon ewe fanü Nekep, pwal ren chokewe mi nom lon Jatir, 28 lon Aroer, Sifmot me Estemoa, 29 lon Rakal, lon ekewe telinimwen chon Jeramel me chon Ken, 30 lon Horma, Porasan me Atak, 31 lon Hepron pwal lon ekewe leni meinisin ia Tafit me nöün aramas ra nonomfeil ie.