1 Iwe, ekewe chon Filistia ra maun ngeni ekewe chon Israel. Nge ekewe chon Israel ra süla me mwen ekewe chon Filistia o chomong ra mätiu won ewe chuk Kilpoa. 2 Iwe, ekewe chon Filistia ra cherikaei Saul me nöün kewe mwän. Ra niela Jonatan, Apinatap me Malkisua nöün Saul kewe mwän. 3 Iwe, ewe maun a fokun pöchökülela ngeni Saul. Nge lupwen ekewe chon likapich ra rangeiti Saul, ra fokun akinasa. 4 Mürin, Saul a üreni nöün chon uwei an pisekin maun, “Kopwe üttawu noum ketilas o posu ngeniei, pwe ekei aramas resap sirkomsais resap feito pwe repwe posuei o urumotitiei.” Nge nöün chon uwei an pisekin maun esap mochen, pun a fokun niuokus. Iei mine Saul a angei nöün ketilas o püsin posu ngeni. 5 Iwe, lupwen nöün Saul chon uwei an pisekin maun a küna pwe Saul a mäla, a pwal posu ngeni nöün ketilas o eti Saul le mäla. 6 Iei usun Saul me nöün kewe ülüman mwän, pwal nöün chon uwei an pisekin maun me nöün kewe aramas meinisin ra mälapök lon eu chök rän.

7 Nge lupwen ekewe chon Israel mi nom won pwal epekin ewe lemol me chokewe mi nom ötiuen ewe chanpupu Jortan ra küna pwe ekewe sounfiun Israel ra sü, nge Saul me nöün kewe mwän ra mäla, ra likitala ar kewe telinimw o süla. Mürin, ekewe chon Filistia ra feito o imweimw lor.

8 Nge sorotän ewe rän, lupwen ekewe chon Filistia ra feito pwe repwe angei pisekin ekewe somä, ra küna Saul me nöün kewe ülüman mwän ra mätiu won ewe chuk Kilpoa. 9 Iwe, ra pökü üen Saul o pwilitawu üfan üföüfen maun. Ra pwal tinala chon künö lemenen fanüen chon Filistia, pwe repwe asilefeili ewe pworaus mi mürina ngeni ar kewe uluulun anümwäl me ekewe aramas. 10 Iwe, ra iseis üfen Saul üföüfen maun lon ewe imwenfelin ewe anüfefin Astarot, nge inisin ra emeitiua won tittin ewe telinimw Petsan. 11 Nge lupwen ekewe chon Japes-kiliat ra rongorong mine ekewe chon Filistia ra föri ngeni Saul, 12 ekewe mwän meinisin mi pwora o pöchökül ra ütä o fetal lon unusen ewe pwin tori Petsan. Iwe, ra angei inisin Saul me nöün kewe mwän me won tittin ewe telinimw Petsan, ra liwiniti Japes o keniir ikenan. 13 Mürin ra angei chüür o peiaseniir fän efoch irä itan tamarisk, me lon ewe telinimw Japes, ra pwal öchüün lon ükükün fisu rän.