1 Pỳj me hêj xi ijõ Pahhiti!

He ityc xàa wỳr ikrã pictor tuata kam,

wa itỳj ate itehcajpar prãmte ana ijàhwỳr.

2 Ijõ Pahhiti, ite amã icaràr xà ata na ikampa!

Ne ite amji pytàr xà na ijàhwỳr xà ata to, ca ipytà!

3 Ca ha ite ato kên xà itajê to,

ate amji japackre prãmte ahna ihkàhhôc to na mã,

jũ mã wa ha, ne ate icurê mã imẽn xà ata pê icato,

ne ma jũ kam tẽ?

Hamreare!

Ca ha atỳj hahpan xà na ikên mã imẽ.

4 Cakrô, ca nee ate ito hajỹr nare.

Ne quêt cama atỳj, ite ato kên xà itajê to tojnõ,

ne nee hipêr to amji japackre nare,

mãr wa ihkôt amji mãacupahti to ipa.

5 Ỹhỹ me ikwỳ, wa ite amji kam ijapac xà cunea to

Pahhiti te itehcajpar na hikaj.

Ne ampeaj kam wa itỳj cute ampo na

imã amji to hũjahkre xà ata na

amji mã to hane.

6 Ne pom krãhtare pê caxwari krĩ jamãr catêjê apẽ xà jikaj ata jirôa pê,

wa itỳj ijõ Pahhiti jikaaj to hikaj.

7 Me ikwỳ pê Ixaher catêjê atajê,

ca ha atỳj ampeaj kam Pahpãm to me amji mã hanea to me hane.

Ampo na?

He cumã me akĩn rohnỳtti mã,

nehõtpê ihtỳj cumã me apytàr prãm.

8 Na quê ha ihtỳj Ixaher catêjê

pê mehkwỳ atajê te ame to kên jahpan xà na,

cute mehkên mã me hàr xà ata pê me hũtà.