1 Ijõ Pahhiti, ca ramã ate ipupun pejtu

na ri amã ijahkre pej.

2 Ne ramã ite ampo ton xà atajê cunea na amã ijahkre pej.

Ne ampỳa mã amã ite amji kam ijapac xà cunea na ijahkre pej.

3 Ca ijàpên xà cunea me, ite apu ikôt xà atajê cunea kam ipupu,

ne ite ampo ton xà atajê cunea na

amã ijahkre pej.

4 Ne ite jũm mã ampo jarẽn xà ata xwỳjrea na,

ramã ite harẽn xà ata na amã ijahkre pej.

5 Ne jũ ri apu imõr xà ata ri,

ca atỳj ipu na apa,

ne acarôt to itête gàmtàr to apa,

ne imã ijõ pry to hahkre to apa.

6 Ne ramã ate ijahkre pej xà ita pupun pejtu,

wa nee ajte akĩnte iteamji pupun pej xà ita na,

ite amji jahkre pej nare.

Ne ite ahna amji jahkre pej xà ita ipê ipimxur tu.

7 Ne jũ kam wa ha apê tẽ?

Ca pjê cunea kam apa xà ita kam,

jũ mã wa ha ajte ne jũ kam apê hawry?

He wa nee jũ kam, apê ijũjawry nare.

8 Wa ha ma côjkwa wỳr api,

ca ha curia ramã apu mõ.

Nare, wa ha ma pjê krac ri mehtyc krĩ xà wỳr wrỳ,

ca ha curia ramã apu mõ.

9-10 Wa ha pyt japôj xà wỳr ite itor ne itẽm na,

nare, ampỳa mã pyt cjêj xà kam amji to ipijapar cakrô,

quê ha cormã gũhkra imã ijõ pryto hahkre to mõr ita na.

Ne wa ha jũ ri cormã apu mõ,

ca ha curi atỳj itehcajpa.

11 Wa ha awcapàtkô mã ijarkwa to:

“Ito amxu” hane,

ne hanea ne amcro mã ijarkwa to:

“Amji to awcapàtkô” hane,

quê ha kam awcapàtkô cakrô,

wa ha nee apê ipimxur nare.

12 Ampo na?

He amã awcapàtkô kam ampo pimxur ata pimxur nare.

Ne amã awcapàtkôti ata pê amcro jõ apẽ.

Ne amã awcapàtkô me amcro pipẽan.

13 Ne caa pê ca ahpỹanre na imã icukrã xà ton pa,

ne inxê cahã xà caxwãm pê ajkam ipyxwỳr pa.

14 Na wa itỳj amji mã apejti na garẽ.

Ampo na?

He ate ampo ton xà atajêcunea pihho

ne hahkre pej xà pimxur tu,

ne ajtea mã, ne quêt impejti.

Wa ite amji kam ijapac xà cunea to gàpên xà ita na,

ite gahkre pej pejtu.

15 Pê ca inxê tu kam ihi ton xà me, ite amji jipêj xà na ipupu.

Pê wa aracri, jũm te ipupun nare kam,

inxê cahã xà kam ipicamẽn to icati to mõ.

16 Ne pê ca ipỳm xwỳjrea na ramã ipupu.

Ne caa ramã imã jũ mã ite amji to ipijapar xà na

amcro atajê na gõ kàhhôc kam ihhôchiahpuro, mã hikwa,

cormã amcro jamre reria mã.

17 Pỳhàpà ijõ Pahpãm,

ate amji kam gapac xà itajê cunea jahkre pej xà jahkre kêatre!

Ne ampeaj kam hàhtô ne impej pit.

18 Wa ha hàhtô na ite hahkre pej prãmte cahyt xà na mã,

quê ha imã hàhtô pê ihhêj rũm pjênxôm carôt jàhtô.

Wa cahyt, ne cahyt,

ne neejũ caxuw cahyt jicu xà mã to mẽn nare,

ne kaam gõr.

Ne wa iràrà na ampra, ne hãn ne acahê na ipa,

ne ato amji japackre pyrentu.

19 Ỹhỹ ijõ Pahpãm,

he imã ate atỳj mehkrã kên te ampo kên ton to ipa atajê curan,

ne me to hamre na to prãm.

Ne imã ate me hàprêhtijũhcaprô prãmti atajê to

ipê gũjawry tu na to prãm,

mãr quê me hawry, wa icarĩcti na ipa.

20 Ne me acurê xwỳn atajê ato mehcakôc xà kêanre to me ipa,

ne ihcaprỳ na gaprỳ to mehkêanre to me ipa.

21 Ijõ Pahhiti, pom ma ame acurê,

ne ma ame apynãr caca itajê ri,

ite hajỹar ne ihtỳj imã me curê, wa ma amehcaca!

22 Wa me curê xà cunea to me curê to ipa.

Ampo na?

He acurê xwỳn itajê pê hanea ne icurê xwỳan to icurê xwỳn.

23 Ỹhỹ, ijõ Pahpãm!

Gapacta ne ikôpĩ ne icaxwỳn na awcapi,

ne ite amji kam ijapac xà cunea na ijahkre pej.

24 Ne imã, ihhêaj to ite ijõ pry cupan xà nõ ata jarẽ,

ne quêt mehtĩr rohnỳtti mã xà ata jõ pry wỳr ca ito mõ,

ne kam imẽ, wa ihkôt mõ.