1 मिनु पिप कली कोव़ब आन कप्‍तान नेबुजरादानमी, येरमीया कली साङलोमी फ्रेंशा यरूसलेम नु यहूदा ङा फ्रेंशो मुरपुकी नु बेबीलोन लाइक्‍चा चिक्‍शो थिदा बाक्‍त। मिनु येरमीयामी रामाह प्रोना नोले परमप्रभु यावेमी मेको कली लोव़ पाप्‍तु। येरमीया ३९:११-१४ 2 मिनु पिप कली कोव़ब आन कप्‍तानमी येरमीया कली थिश्‍शा, मेको कली “परमप्रभु यावे, इ परमप्रभुम एको रागीम ठेयब श्‍येत गे‍तीक आ पर्बम लोव़ पशो बाक्‍त। 3 मुल परमप्रभु यावेम एको रागी क्‍याम्‍ताक्‍व। मिनु मेकोमी आ देंशो खोदेंशो पाप्‍तु। मारदे हना गेपुकीम परमप्रभु यावे कली पाप पाइतीनी। मिनु मेको आ देंशो मटिनी। मोपतीके इन कली ओदेंशो दुम्‍त। 4 तन्‍न मुलाक्‍ती गो इ गुइ ङा साङलो प्रुइक्‍ताक्‍‍न। गे गो नु बेबीलोन लचा दाक्‍नेवे हना, गाक्‍को। गो इ कली रिम्‍शो पा कोव़नुङ। तन्‍न गे गो नु बेबीलोन लल मदाक्‍ते हना, बाक्‍को। कोव़ङो, एको रागी नेल्‍ल इ ङोंइती बाक्‍ब। गे ते लल दाक्‍नेवे, मेक लने चाप्‍नेवे” दे माइक्‍तु। येरमीया ३९:१२ 5 मो हना यो येरमीया लचा चिक्‍तानु नेबुजरादानमी लेश्‍शा कोव़शा “शाफान आ तौ अहीकाम आ चच गेदाल्‍याह आ बाक्‍तीक लावो। मेको कली बेबीलोन ङा पिपम यहूदा राज्‍य ङा हुकुम पाइब सेल्‍शो बाक्‍ब। मेकेर मेको नु अरु मुरपुकी नु बाक्‍को। गे ते लत दाक्‍ङे, मेक लावो” माइक्‍तु। मिनु मेको पिप कली कोव़ब कप्‍तानमी मेको कली जचा थोव़क नु अरु कोसेलीपुकी गेप्‍तु। मिनु मेको कली प्रोंइतु। येरमीया ३९:१४ 6 मोपतीके येरमीया अहीकाम आ तौ गेदाल्‍याह आ बाक्‍तीके मिस्‍पा सहर लत। मिनु मेको नु रागीम प्रोंइशा वोइश्‍शो मुरपुकी नु बाक्‍त।

7 मिनु लडाइ पाइब आन ठेयब मुर नेल्‍ल नु आन मुरपुकीमी “बेबीलोन ङा पिपमी अहीकाम आ तौ गेदाल्‍याह कली मेको रागी ङा हुकुम पाइब सेल्‍तु। मिनु मेको रागी ङा नेल्‍ल आन क्‍येङा प्रुङग मीश मुर, आल नु प्रुङग मुर आन कली फ्रेंशा बेबीलोन मलाइश्‍शो मेको गेदाल्‍याह नु बाक्‍नीम” देंशो नेंतेक्‍म। २राजा २५:२२-२४ 8 मिनु मेको नेल्‍ल मिस्‍पा सहरम गेदाल्‍याह आ बाक्‍तीकेम लाम्‍‍तेक्‍म। नेथन्‍याह आ तौ इश्‍माएल, कारेआह आ तौ योहानान नु योनाथन, तन्‍हुमेथ आ तौ सेरायाह, नेतोफाह आ मुर एफाइ आ तौपुकी, माकाथी आ तौ येजन्‍याह नु मेको आन मुर नेल्‍ल लाम्‍‍तेक्‍म। येरमीया ४१:१,११ 9 मिनु शाफान आ चच अहीकाम आ तौ गेदाल्‍याहम मेकोपुकी नु मेको आन मुर नु कसम जशा “कल्‍दी आन गेय पचा कली महिनीन। रागीम बाक्‍शा बेबीलोन ङा पिप आ गेय पने। मिनु इन कली रिम्‍शो दुम्‍ब। 10 गो इं बाक्‍तीक जाक्‍ब कल्‍दी आन ङोंइती इन ठेयब मुर दुम्‍शा लोव़ पचा कली मिस्पा सहरमी बाक्‍नुङ। गेपुकीम चहिं अङगुर, बर्खाम सिप्‍ब फल फुल नु तेल इन ग्‍योंबुम वोतीन। मिनु इन योव़शो सहरमी बाक्‍कीन” दे माइक्‍तीमी। 11 मिनु मोआब, अम्‍मोन, एदोम नु अर्को रागीपुकीम बाक्‍ब यहूदी नेल्‍लेम मेको लोव़ नेंतेक्‍म। बेबीलोन ङा पिपम का निक्‍शी मुर आन कली यहूदामी प्रोंइशा वोइश्‍शो बाक्‍ब, दे नेंतेक्‍म। मिनु शाफान आ चच अहीकाम आ तौ गेदाल्‍याह कली मेकेर ङा हुकुम पाइब सेल्‍शा वोइश्‍शो बाक्‍ब, दे यो नेंतेक्‍म। 12 मिनु नोले यहूदी नेल्‍ल ते ते ब्रशो बाक्‍मा, मेक मेक रे लेश्‍शा, यहूदा रागी मिस्‍पाम गेदाल्‍याह आ बाक्‍तीकेम जाक्‍तेक्‍म। मिनु मेकोपुकीम शुश फल फुल नु अङगुर नु पोव़शी खुप्‍ताक्‍मे।

13 मिनु कारेआह आ तौ योहानान नु गाउं गाउंम बाक्‍शो लडाइ पाइब मुर आन ठेयब मुर गेदाल्‍याह आ बाक्‍तीके मिस्‍पाम जाक्‍तेक्‍म। 14 मिनु मेको कली “अम्‍मोनी आन पिप बालीसमी नेथन्‍याह आ तौ इश्‍माएल कली इन कली साइक्‍चा कली सोइश्‍शो बाक्‍ब, दे तुइक्‍नीनी?” देंतेक्‍म। तन्‍न अहीकाम आ तौ गेदाल्‍याहम मेको आन लोव़ थमा मसुद। 15 मिनु कारेआह आ तौ योहानानम मिस्पाम गेदाल्‍याह कली “सुइम मतुइक्‍चा ङा पा नेथन्‍याह आ तौ इश्‍माएल कली साइक्‍चा कली आं कली हुकुम गेयीनी। एको लोव़ सुइम मतुइक्‍नीम। इन एर ओंथ नेल्‍ल देल्‍शो यहूदी आन कली ब्रपाइक्‍चा कली नु यहूदामी लीशो आन कली साइक्‍चा कली मेकोमी मारदे इन कली साइक्‍चा मला?” देंत। 16 तन्‍न अहीकाम आ तौ गेदाल्‍याहम कारेआह आ तौ योहानान कली “गे मोदेंशो गेय मपावो। मारदे हना इश्‍माएल आ पर्बम इ पशो लोव़ थमा ममाइ” दे माइक्‍तु।