1 मिनु मत्तान आ तौ शेफत्‍याह, पश्‍हुर आ तौ गेदाल्‍याह, शेलेम्‍याह आ तौ युकल नु माल्‍कीयाह आ तौ पश्‍हुरमी येरमीयामी मुर नेल्‍ल आन कली देंशो लोव़ नेंतेक्‍म। मेको आ लोव़ मार बाक्‍त देंशा हना, येरमीया २१:१ 2 परमप्रभु यावेम “सु सु एको सहरमी बाक्‍नीमी, मेकोपुकी तरवार, अन्‍काल नु मुर बेक्‍तीक रोइम बेक्‍नीम। तन्‍न सु सु गुइ पोक्‍शा, कल्‍दी आन बाक्‍तीके जाक्‍दीत्‍नीमी, मेकोपुकी चहिं ब्रोंइनीम। मेको आन गिंम प्रोंइशा लडाइ रे ब्रोंइनीम” देंशो बाक्‍त। येरमीया २१:९ 3 मिनु परमप्रभु यावेमी “एको सहर थमा पा बेबीलोन ङा पिप आ लडाइ पाइब आन गुइम दुम्‍ब। मिनु मेकोपुकीमी एको सहर आन के सेल्‍नीम” देंत, दे येरमीयाम देंशो बाक्‍त। 4 मिनु ठेयब मुरपुकीम पिप कली “एको मुर कली साइक्‍चा माल्‍ब। मारदे हना एकोमी ओदेंशो लोव़ पा, एको सहरमी लीशो लडाइ पाइब नु मुर नेल्‍ल आन थुं लुक्‍च लपाइश्‍शो बाक्‍ब। एको मुरुम मुर आन कली रिम्‍शो ममाइ मरिम्‍शो प‍चा दाक्‍ब” देंतेक्‍म। 5 मिनु पिप सिदकीयाहम “मेको इन गुइमीन बाक्‍ब। गो इन कली मारेइ पने मचाप्‍नुङ” दे माइक्‍तीमी। 6 मोपतीके मेकोपुकीमी येरमीया कली लाइश्‍शा, पिप आ तौ माल्‍कीयाह आ इनारम तोक्‍तेक्‍म। मेको इनार पिप आ दरवार खाल पाइब आ लाङगाम बाक्‍त। मिनु मेकेर डोरीम फ्रेंशा इनारम तोक्‍तेक्‍म। मेको इनारमी ब्‍वाक्‍कु मबाक्‍माक्‍त। हिलो ला बाक्‍माक्‍त। मिनु येरमीया मेको हिलोम ग्रुम्‍‍त।

7 मेकेर पिप आ खिंम गेय पाइब एबेद-मेलेक नें पाइश्‍शो मुर का बाक्‍त। मेको एथीयोपीया ङा बाक्‍त। मेकोमी येरमीया कली इनारम तोक्‍शो नेंतु। मेना पिप बेन्‍यामीन लाप्‍चोमी बाक्‍शो बाक्‍त। येरमीया ३९:१५-१८ 8 मिनु एबेद-मेलेक पिप आ खिं रे लशा पिप कली 9 “आं प्रभु, आं पिप, एको मुरपुकीम परमप्रभु यावे आ लोव़ पाइब येरमीया कली इनारम तोक्‍शा मरिम्‍शो पाम्‍तेक्‍म। सहरम शोब्‍ले नुम नोले मेको मेकेर शोव़लुम बेक्‍ब” देंत। 10 मिनु पिपम कूशी, एथीयोपीया ङा एबेद-मेलेक कली “एक रे मुर सां आन कली लाइश्‍शा, मेको परमप्रभु यावे आ लोव़ पाइब येरमीया कली बेक्‍चा क्‍येङा ङोंइती इनार रे ग्रुंइदीन” दे अरेप्‍तु। का निक्‍शी मुरुमी ३० जना मुर ब्रेश्‍शो बाक्‍ब। 11 मोपतीके एबेद-मेलेकम मेको मुर आन कली लाइक्‍तु। मिनु पिप आ खिं ङा मार मार वोइक्‍तीक आगा ङा कोठाम लत। मिनु मेकेर रे माइत जेक्‍शो वासी ग्रुंइताक्‍व। मिनु मेकोमी येरमीया कली मेको वासी डोरीम फ्रेंशा तोक्‍तु। 12 मिनु एथीयोपीया ङा एबेद-मेलेकमी येरमीया कली “इ बला आगा नु डोरी आन दातेमी एको माइत जेक्‍शो वासी वोतो” देंत। मिनु येरमीयामी मो पाप्‍तु। 13 मिनु मेकोपुकीमी डोरीम येरमीया कली इनार रे ग्रुंइताक्‍मे। मेको नोले येरमीया पिप आ दरवार खाल पाइब मुर आ जेल्‍खान ङा लाङगाम बाक्‍त।

14 मिनु पिप सिदकीयाहम परमप्रभु यावे आ लोव़ पाइब येरमीया कली ब्रेत्‍थ सोइक्‍ताक्‍व। मिनु परमप्रभु यावे आ खिं ङा निक्‍शी लाप्‍चो नोले ङा ठेयब लाप्‍चो आ ङोंइती चाक्‍पाइक्‍तीमी। मिनु पिपम येरमीया कली “गो इ कली लोव़ का निक्‍शी हिल्‍लो पाइनुङ। आं ङोंइती गे मारेइ लोव़ मख्रुइक्‍तो” दे माइक्‍तु। 15 मिनु येरमीयामी सिदकीयाह कली “गो इन कली लोव़ पाता हना, गे आं कली साइक्‍नीनी। गो इन कली अर्ती गेतन्‍नी हना, गे मेको मनेंनीनी” देंत। 16 मिनु पिप सिदकीयाहम सुइ आन मतुइक्‍चा ङा पा, येरमीया नु कसम जशा “परमप्रभु यावे ब्रोंइशा बाक्‍शो खोदेंशो पा, गो इं कली सोक्‍त गेप्‍तु। गो मेको आ नेंमी कसम जशा देंनुङ। गो इ कली मसाइक्‍नुङ। गो इ कली साइक्‍चा माल्‍ब मुर आन गुइम मगेनन” देंत। येरमीया ३८:४-५

17 मिनु येरमीयामी सिदकीयाह कली “मुर नेल्‍ल आन परमप्रभु यावे, इस्राएली आन परमप्रभुमी ‘गे बेबीलोन ङा पिप आ ठेयब मुर आन कली आंमान जिम्‍मा गेसाक्‍नी हना, इन सोक्‍त ब्रोंइब। मिनु एको सहर क्रोइक्‍चा मपुंइसीब। मिनु इन खिं ङा मुरपुकी यो ब्रोंइनीमी। 18 तन्‍न गे आंमान बेबीलोन ङा पिप आ ठेयब मुर आन गुइम जिम्‍मा मगेसाक्‍नी हना, एको सहर कल्‍दी आन गुइम गेंसीब। मिनु मेकोपुकीमी एको कली क्रोइक्‍नीम। मिनु गे मेको आन गुइ रे मब्रोंइनीनी’ देंशो बाक्‍ब” देंत। 19 मिनु पिप सिदकीयाहम येरमीया कली “कल्‍दी आन बाक्‍तीकेम प्रोक्‍शा लशो यहूदीपुकी तशा, गो हिंशो बाक्‍नुङ। मारदे हना कल्‍दीपुकीम आं कली मेको आन गुइम जिम्‍मा गेतीमी हना, मेकोपुकीमी आं कली मरिम्‍शो पाइक्‍नीम” देंत। 20 मिनु येरमीयामी “मेकोपुकीमी इन कली मेको आन गुइम जिम्‍मा मगेनीम। गो इन कली देंशो परमप्रभु यावे आ लोव़ टिने। मिनु इन कली रिम्‍शो दुम्‍ब। इन सोक्‍ती यो ब्रोंइब। 21 तन्‍न गे मेको आन गुइम जिम्‍मा गेंसीने मबिस्‍साक्‍नी हना, परमप्रभु यावेम आं कली कोंइशो एकोन बाक्‍ब। 22 यहूदा ङा पिप आ दरवारम प्रोंइसीशो मीश मुर नेल्‍ल बेबीलोन ङा पिप आ ठेयब मुर आन बाक्‍तीके लाइक्‍नीम। मिनु मेको मीश मुरपुकीम इन कली ‘इन थमा सुइश्‍शो इन वारचपुकीम इन कली जोल पाम्‍तेक्‍म। मुल इन खोइली हिलोम ग्रुम्‍शो बाक्‍ब। इन वारचपुकीम इन कली प्रोंइशो बाक्‍नीम’ देंनीम। 23 इन मीशपुकी नु इन आल नेल्‍ल कल्‍दी आन बाक्‍तीके चाक्‍दीत्‍नीम। गे आंमा यो कल्‍दी आन गुइ रे ब्रोंइचा मताइनीनी। बेबीलोन ङा पिपम इन कली ग्‍याइक्‍ब। मिनु एको सहर चहिं क्रोइक्‍नीम, देंशो बाक्‍ब” देंत। येरमीया ३२:४; येरमीया ३४:३

24 मिनु सिदकीयाहम येरमीया कली “एको लोव़सी पशो सुइम मतुइक्‍तमेक्‍ल। मो मदुम्‍त हना, गे साइक्‍चा पुंइसीनेवे। 25 गो गे नु लोव़ पशो ठेयब मुरपुकीम तुइक्‍ताक्‍म हना, मिनु इ बाक्‍तीक जाक्‍शा ‘पिप कली मार, देंनी? मिनु पिपम मार, देंमे? आंइ रे मारेइ लोव़ मख्रुइक्‍तीन। मो पाइतीनी हना गो इन कली साइक्‍नीकी, दे इ कली हिल्‍लो पाम्‍तेक्‍म हना, 26 गेमी मेको आन कली “गो आं कली साइक्‍चा कली योनाथन आ खिंम मसोइक्‍तीनी” दे गो पिप नु लोव़ का ला पाता’ देनो” दे माइक्‍तु। 27 मिनु ठेयब मुर नेल्‍ल येरमीया आ बाक्‍तीक जाक्‍शा, हिल्‍लो पाम्‍तेक्‍म। मिनु मेकोमी पिपम देंशो खोदेंशो पा, मेको आन कली माइक्‍तीमी। मोपतीके मेकोपुकीमी मेको कली अरु मारेइ हिल्‍लो मपामे। मारदे हना पिप नु येरमीया आस दातेम पशो लोव़ सुइम मतुइ‍क्‍तेम। 28 मिनु यरूसलेम ग्रातीक नाक्‍त सम्‍म येरमीया पिप आ दरवार खाल पाइब मुर आ लाङगा ङा जेल्‍खानम बाक्‍शो बाक्‍त। येरमीया ३७:२१