1 Paulu iwetewete pang di kuto maimai a imot, motong la iyege malala Aten, inbe imadit a ila pang ye malala mai san yo ene Korin i. 2 Ila, ngan le la ipuske tool atu kidi Yuda yo ene Akuila i. Ngan Akuila tani in tool ke tana mai Pontus, inbe ya in muku ngan iye rimana Pirisila yaru tipa ke tana mai Itali a timan, yesoo Sisa Kolodius itara betanga be di Yuda le imot be tiyege malala mai Rom a tikoo. Le nga Paulu ila be la ikamata di yaru. 3 Motong la iye di tiyepe, inbe iye di tikaua urata ye saingi asara kulini pang rumu yo badabada nga, yesoo Paulu tani in urata ki yo iyeii i, in gaongo leu ben di ngan. 4 Le nga Paulu iye di tiyepe, inbe kanakana ye lal kidi Yuda ke sungunu nga, ngan ilo rumu kidi Yuda ke gaongo in lono, a lo iwetewete pang di Yuda le Girik a ikapye be ipamadit lodi, a nen ngan be titara lodi medana pang Yesu.

5 Inbe ye kene yo Selas iye Timoti tipa ke Masedonia a timan ye in nga, motong la Paulu ipas le iwetewete betanga ke Maro pang di tooltool ngan leu. Ngan le Paulu tani in iwete betanga pang di Yuda nen, “Yesu in Kirisi tani yo Maro ipootoo be si ikap di tooltool ki a ipamulu di i.” 6 Ngan Paulu iwete pang di nen, bong ye kene tani in di Yuda tikapye be tirautoo betanga ki, le nga tikan paseme ye betanga dook tiap. Motong la Paulu itaurai gauru ye sousoungu ki du tana a be ipapos di ye dada dook tiap kidi yo tiyeii i, inbe iwete pang di nen, “Ai, kumata le be Maro igarungang le kallemim nga, ngan in busunu kiang ang tapmim. Au tauk i taukak busunu ye urata kiau i. Le nookoot nga ole ala la awetewete betanga ke Maro pang di tooltool yo tipa ye rara kidi Yuda tiap nga.”

7 Motong la Paulu iyege rumu ke gaongo tani, inbe ipas a ila pang ye rumu ke tool atu yo ene Titi Yastus i. Ngan ya in tool ke sungunu pang Maro kidi Yuda, inbe rumu ki ikodo potai pang ye rumu ke gaongo tani in. 8 Inbe tool kuto mai yo matan kala rumu kidi Yuda ke gaongo i, in ene la Kirispas i. Ya in iye di tooltool yo iye di tiyepe ye rumu ki nga, ngan di le imot titara lodi medana pang Tool Mai. Inbe di tooltool alunu kaiye ke Korin la tilongo betanga ke Paulu, ngan le titara lodi medana lapau a tirriu di nga.

9 Motong la ye bong atu in Paulu ikamata Tool Mai ye mianga be iwete panga nen, “Ai, kin kutattadai be! Bong kuwetewete le ikenen leu, inbe kin kupakomo koom be. 10 Au i ole ayepe yong, le tool sa ke be imadit a igarungong, nga tiap, yesoo di tooltool kiau alunu kaiye nanga la tiyepe ye malala mai i nga.” 11 Tina Paulu ikamata mianga nen nga, le nga sila iyepe nango la Korin ngo ye rai kerana atu inbe taudu limi be atu, inbe ipatomonai di tooltool ye betanga ke Maro.

12 Bong ye kene yo Gaiyo iyei tool kuto mai pang tana mai Akaia ye in nga, ngan le di Yuda tina ngan tigaua lodi le atu, inbe timadit a tikadono Paulu. Le nga tikauu a lo tipatakode ye ni ke karatanga betanga, inbe tiwete nen. 13 Tiyei ne, “Ai, tool i nga ikapye be ipatomonai di tooltool, a be nen ngan tiwil betanga yo iken ye ger kiam nga, inbe tisung pang Maro ye dada san.”

14 Di Yuda tina ngan tiwete nen, le nga Paulu tani in iyiti koonoo be iraua betanga kidi. Bong ngan Gaiyo imadit le iwete pang di Yuda tina ngan nen, “Di Yuda nga, kumata le be tool i ipaskimooloonoo ger kiidi sa, too be iyeie dada dook tiap sa nga, ngan la be ole dook mata ke be au i alongo betanga yo kiang nga. 15 Bong be ang ngan lomim modoko ye betanga kasin pa, inbe ye di tooltool edi yo iken ye ger kiang ang tapmim nga, ngan la le be kaman pang yau nga, ngan dook tiap. Be nen ngan ole ang tapmim kakarata betanga tani in. Au i o ke be alongo betanga ke so yo nen ngan a akarata tiap.” 16 Gaiyo iwete pang di Yuda tina nen, motong la inganga di a tikoo ye rumu ke karatanga betanga tani. 17 Motong la di tooltool tina yo Gaiyo inganga di nga, ngan di le imot tiportak be tiparama Soten, tool kuto mai yo matan kala rumu kidi Yuda ke gaongo i, inbe tirauu sila nangan la damadama ke rumu ke karatanga betanga ngan. Bong ngan Gaiyo tani in lon modoko ye dada yo tiyeii i, in tiap.

18 Paulu iyepe kaiye nango la Korin ngo, motong la iye Pirisila ye Akuila timadit a tiyege di diedi kapala yo titara lodi medana pang Yesu nga, inbe tipa le tila ye malala mai san yo Senkiria i. Le nga ye kene tani yo Paulu la iyepe Senkiria ye in nga, ngan tikoto kutono, yesoo itoo momo kidi Yuda ye yo muku ngan ipamede betanga medana atu pang Maro nga.* Ye dada ke kotingi kutodo yo Paulu itoo i, in nen. Paulu tani in itoo momo kidi Yuda, inbe ipamede betanga medana atu pang Maro muku nen be ole isapa ye kotingi kutono, inbe iyei urata ke raingi bingi dook mata ke Yesu pang di malala kapala le imot, ngan la be ikoto kutono nga. Motong la iyiri ye ookoo atu a be ikooi ye a idi pang Siria nga. Ngan le ikaua Pirisila iye Akuila lapau a tiyei ene, inbe tiye tikooi ye ookoo tani in a tidi. 19 Tikooi a tidi, le di pombe ye launu ke Epeses, motong la Paulu iyege Pirisila iye Akuila sila tiyepe nango, inbe ya taunu ilo rumu kidi Yuda ke gaongo in lono lo iye di Yuda tiwetewete nga. 20 Le nga ye kene tani in di Yuda tina titoru nen, “Ai, nga ole si amyong tayepe kasin ngan.” Bong ngan Paulu iyei ne, “Atoo, o ayepe tiap.” 21 Paulu tani in iwete nen, motong la be ipa, ngan iwete pang di nen, “Kumata le Maro ya taunu lono dook mata be amulu a aman pang yang nga, ngan la be amulu a aman nga.” Motong la Paulu iyege Pirisila iye Akuila sila tiyepe, inbe iyiri ye ookoo mulu a iyege malala tani yo Epeses i. 22 Ngan ookoo tani yo iyiri ye i, in ikooi a idi ngan le di isolo ye tiek ke malala mai Sisaria. Motong la Paulu ipa tana a ilo pang Yerusalem lo matan so di tooltool yo tigaua ye bareme ke Yesu nga, inbe iwete lo ponana ki pang di. Motong la iyege di sila tiyepe, inbe imulu a idu pang Antiok nga.

23 Ngan Paulu tani in idu Antiok nga, ngan le du iyepe kasin, motong la ipa mulu. Ngan le idu ye malala atu atu yo iken ye tana ke Galesia le Pirigia nga, inbe du ipamede Yesu di galiunu le imot, a be nen ngan tikodo le timede ye Tool Mai.

24 Ngan tool atu kidi Yuda in ene la Apolos i. Ya in tool ke malala mai Aleksandia ngan du iyepe nango la Epeses ngo. Ngan ya in tool ke be ikap tutu koonoo dook ye betebetanga ki, inbe lon galanga dook mata ye Rau ke Maro. 25 Ngan Apolos tani in tipatomonaii ye dada ke Tool Mai lapau le lon galanga ye. Le be ipatomonai di tooltool nga, ngan iwete betanga yo tarantatu ngan leu pang di ye so yo Yesu iyei nga. Bong ya in lon galanga ye rriungu yo ke Yowan, in leu. 26 Inbe ya in ilo rumu kidi Yuda ke gaongo in lono, lo iwetewete betanga ke Maro nga, ngan itattadai di tooltool tiap, bong iwete le koon mede san. Le nga ye kene tani in Pirisila iye Akuila tilongo betanga ki, motong la yaru tikiuu a ila rumu kidi la tiwete nin dada yo ke Maro ngan panga, a be nen ngan lon galanga ye dook.

27 Motong la ye kene yo Apolos lon wetewete be idu pang tana mai Akaia ye in nga, ngan le di diene kapala yo titara lodi medana pang Yesu a tiyepe Epeses nga, ngan tipamede ye betanga. Inbe tiwodo rau pang Yesu di galiunu yo tiyepe Akaia ngo a tiwete pang di be Apolos du pombe ngan tikauu. Motong la Apolos idu nga. Ngan kene yo Apolos du pombe Akaia ye in nga, ngan le ilon kaiye Yesu di galiunu yo muku ngan Maro lono pang di a iyei dada dook mata pang di ngan le titara lodi medana panga nga. 28 Inbe iwetewete le koon mede ye betanga ke Maro la mallangana ye di tooltool matadi, a be nen ngan irautoo betanga kidi Yuda yo tiweta i. Ngan nen le iwete pang di ye betanga yo iken ye Rau ke Maro nga, a be ipagalanga lodi ye nen, be Yesu in Kirisi, tool tani yo Maro ipootoo be si ikap di tooltool ki a ipamulu di i.