21
Yohanis nita lalai ma daebafo mata beuk
1 Basa boe ma au ita lalai, ma daebafo mata beuk, huu lalai, ma daebafo laa kala mopo heni sala so. Tasi ta kana so boe.✡ Yesaya 65:17; 66:22; 2 Petrus 3:13 2 Boe ma au ita Manetualain kota malalaon, fo ndia Yerusalem Beuk, konda neme nusa-sodak mai. Kota ndia nahehele so, sama leo ina mana sangga kabin, fo ana sangga neu soluk ndia sao toun.✡ Yesaya 52:1; Dae-bafok Mata Beuk 3:12; Yesaya 61:10 3 Boe ma au amanene hala malii esa neme kadela mana palenda ndia mai, fo nae,
“Mete neulalau!
Mulai neme hatematak ia, Manetualain Uman nai hataholi la lalada nala.
Mulai neme faik ia, Manetualain nasoda sama-sama no Ndia hataholi nala.
Te Ndia dadik sila Manetualain so.
Ma sila dadik Ndia ana nala.
Neu ko Ana no sala taa-taa.
Ma Ana sama-sama no sala nakandondoo henin.✡ Yeskial 37:27; Malangga Anggama la Heti-heun 26:11, 12
4 Neu ko Ana hali namada luu nala,
fo ala ta lamatani so.
Huu nai ndia, ta lamahedi so.
Ma nai ndia, ta hambu mamates so.
Basa mana tao nakatotoꞌak neme makahulun mai ndia, ta kasa so.
Basa mana tao doidosok neme makahulun mai ndia, mopo heni sala so.”✡ Yesaya 25:8; 35:10; 65:19
5 Boe ma Ndia, mana manggatuuk nai kadela mana palenda ndia, Ana kokolak bali, nae, “Mete matalolole, te Au tao basan dadik beuk so.” Basa de, Ana kokolak bali no au, nae, “Sulak leo! Basa hataholi la, bisa lamahele Au Dedeꞌa-kokolang ia, te basa ia la, tetebes ndia so!”
6 Boe ma Ana nafada au bali, nae,
“Basa dedeꞌak fo Au heluk neme makahulun mai ndia, ana dadi so.
Te Au ia,
Alfa losa Omega.* Tungga hataholi Yunani la, na, Alfa ndia huruf makasososak, ma Omega ndia na huruf mateꞌek.
Ma Au ia,
neme A mai, losa Z.
Basa dedeꞌak lalaꞌen leme Au mai,
mulai neme sososan losa babasan.
Basa hataholi fo mana maa mada kala,
neu ko Au fee sala ala linu mudak,
neme oe matak mana neni sodak, fo suek hataholi la lasoda no ndoon.✡ Yesaya 55:1
7 Basa hataholi fo mana mahele tungga Manetualain dala ndoon,
neu ko ala simbo lala basa babaꞌe-babati kala ia.
Te Au dadik sila Manetualain,
ma sila dadik Au ana nggala.✡ 2 Semuel 7:14; Sosoda Koa-kio kala 89:26-27
8 Tehuu hambu hataholi luma, fo nana mbia henik,
leni tasi haꞌi balerang leu, fo mana mbila ta no hahaen ndia.
Matak leo hataholi biitua,
hataholi mana heok nasadea Yesus,
hataholi manggenggeok,
hataholi mana hohonggek,
mana makanisa hataholi,
mana songgo,
kamodo mamates,
ma mana masapepekok.
Babasan te basa sala, nana mbia henik leni tasi haꞌik neu,
fo hataholi la lae, ‘mamana mamates kaduan ndindia.’ ”
Yohanis nita kota Yerusalem mata beuk
9 Boe ma au ita esa neme ata kahitu kala sila, fo maneme nusa-sodak mai, fo makahulun ana toꞌu bokor fo nana isik no Manetualain nasan. Ana mai natonggo no au, de kokolak, nae, “Mai ia dei! Te, au sangga atudu o, ina mana kabin, fo ana sangga sao Biꞌilombo Ana.”
10 Boe ma Manetualain Dulan mai neu au, de ata esa neme nusa-sodak mai, noo au uni lete madema esa uu. Nai ndia, ana natudu au kota Yerusalem, fo ndia Manetualain kota malalaon ndia, fo konda neme Manetualain mai, nai nusa-sodak.✡ Yeskial 40:2 11 Kota ndia lolen seli! Hambu masaꞌak fo landasoaok, kalua leme Manetualain nula-nambun mai, sama leo batu poemata manggahadok. Losa basa kota ndia manggaledok. 12 Hambu tembok inahuu madema ndule kota ndia, no lelesu inan sanahulu dua. Hambu ata nusa-sodak sanahulu dua lanea lai lelesu la sila. Nai lelesu kasanahulu dua kala sila, nana sulak leo Israel kasanahulu dua kala nade nala.† Tungga hataholi malelak laꞌeneu Susula Malalaok, nomer kasanahulu duak ndia, na mana matudu nomer matetuk, laꞌeneu hataholi daebafok. 13 Lelesu ina telu lasale dulu, telu lasale muli, telu lasale kii, ma telu bali lasale kona.✡ Yeskial 48:30-35 14 Tembok ndia nambadeik nai batu netes inahuuk sanahulu dua. Nai batu la sila, esa-esako nana sulak Biꞌilombo Ana hataholi nadedenu kasanahulu duan nade nala. Sila ndia ala ono-lau Ndia nai daebafok.
15 Boe ma, ata mana kokolak no au ndia, ana toꞌu ai uꞌukuk lilo mbilas esa, fo sangga uku kota ndia no lelesu inahuun ndia ma tembo nala.✡ Yeskial 40:3 16 Ana uku nakahuluk kota ndia tembon boboan haa sala. Ndia nalun, ma loan, ma deman basa sala sama, fo kilo lifun dua natun dua dua hulu (2.220).‡ Susula Malalaok dedeꞌa Yunani nana sulak nae stadia lifun sanahulu dua. 17 Boe ma ana uku tembok katen, meter nee hulu lima. Basa uꞌukuk ia, tungga hataholi natetemen uꞌukun.§ Susula Malalaok dedeꞌa Yunani nana sulak nai ia, nae, “peihon natun esa haa hulu haa (144)”. Peihon esa, na, sanahulu dua laꞌi sanahulu dua, fo ndia natun esa haa hulu haa (144). De mete ma sanahulu dua, na ndandaan, nae, manadaik. Ma natun esa haa hulu haa (144), ndandaan nae, matetuk. 18 Tembok ndia, ala taon neme batu manggadilak mabeli, nade yaspis. Ma basa hata manai kota ndia dalek, ala taon neme lilo mbilas isi-isik, fo manggadilak leo titilok.
19 Batu netes fanderen kasanahulu dua kala sila, ala paroong sala leme batu manggadilak mabeli. Batu kaesan batu yaspis, saꞌan momodo akidook. Batu kaduan batu nilam, saꞌan momodo tasi. Batu katelun batu mirah, fo saꞌan mbilas. Batu kahaan batu samrud, fo saꞌan momodo akidook. 20 Batu kaliman batu unam, fo nana lapis no soklat-fulak. Batu kaneen batu sardius, fo saꞌan mbilas. Batu kahitun batu ratna cempaka, fo saꞌan kuni lilok. Batu kafalun batu beril, fo saꞌan momodo akidook. Batu kasion batu krisolit, fo saꞌan kuni nulak. Batu kasanahulun batu krisopras, fo saꞌan momodo anak. Batu kasanahulu esan batu lasuardi, fo saꞌan momodo tasi. Ma batu kasanahulu duan batu kecubung, fo mbila balanggeok. 21 Ma lelesu ina kasanahulu dua kala sila, nana taok neme mutiara deꞌek sanahulu dua. Lelesu esa, na nana taok neme mutiara deꞌek esa. Ma kota ndia okofon, ala taon neme lilo mbilas isi-isik, fo nanggahado leo titilok.✡ Yesaya 54:11-12
22 Ma au suli neu-mai, te au ta ita Uma Huhule-haladoik nai kota ndia so. Huu Manetualain mana koasa nai lain seli, ma Biꞌilombo Ana ndia, lai ndia lakandondoo henin. De, hataholi la leu lakaluku-lakatele lakandoon neu Sala. Ta paluu uma huhule-haladoik nai ndia. 23 Kota ndia boe oo, taa paluu ledo do bulak, fo tao manggaledon boe, huu Manetualain mandela-masaꞌan tao manggaledok nai ndia. Ma, Biꞌilombo Ana ndia, dadik leo bandu mana mbilak.✡ Yesaya 60:19-20 24 Mete te, hataholi la leme basa nusa kala manai daebafok, dei fo ala mai lalaꞌok nai manggaledok ndia dalek. Mane-mane kala malai daebafok, leni suꞌi nala fo ana seli ndia, leu boe.✡ Yesaya 60:3 25 Nai ndia, leꞌodaek taa so. Huu ndia de, ala taa paluu kena lelesu maso neni kota neu. 26 Mete te, ala leni basa hata malole la, dadik neu hada-holomata leme basa nusa kala malai daebafok ia, leni kota ndia dalek leu.✡ Yesaya 60:11 27 Te, mana ta bole maso leni ndia neu, na ndia basa hata manggalau kala. Sila: mana songgo, mana hohongge kala, ma masapepeko kala. Mana bole maso kala, na ndia kada hataholi la, fo nade nala nana sulak lai Biꞌilombo Ana susula masodan.✡ Yesaya 52:1; Yeskial 44:9
✡21:1 Yesaya 65:17; 66:22; 2 Petrus 3:13
✡21:2 Yesaya 52:1; Dae-bafok Mata Beuk 3:12; Yesaya 61:10
✡21:3 Yeskial 37:27; Malangga Anggama la Heti-heun 26:11, 12
✡21:4 Yesaya 25:8; 35:10; 65:19
*21:6 Tungga hataholi Yunani la, na, Alfa ndia huruf makasososak, ma Omega ndia na huruf mateꞌek.
✡21:6 Yesaya 55:1
✡21:7 2 Semuel 7:14; Sosoda Koa-kio kala 89:26-27
✡21:10 Yeskial 40:2
†21:12 Tungga hataholi malelak laꞌeneu Susula Malalaok, nomer kasanahulu duak ndia, na mana matudu nomer matetuk, laꞌeneu hataholi daebafok.
✡21:13 Yeskial 48:30-35
✡21:15 Yeskial 40:3
‡21:16 Susula Malalaok dedeꞌa Yunani nana sulak nae stadia lifun sanahulu dua.
§21:17 Susula Malalaok dedeꞌa Yunani nana sulak nai ia, nae, “peihon natun esa haa hulu haa (144)”. Peihon esa, na, sanahulu dua laꞌi sanahulu dua, fo ndia natun esa haa hulu haa (144). De mete ma sanahulu dua, na ndandaan, nae, manadaik. Ma natun esa haa hulu haa (144), ndandaan nae, matetuk.
✡21:21 Yesaya 54:11-12
✡21:23 Yesaya 60:19-20
✡21:24 Yesaya 60:3
✡21:26 Yesaya 60:11
✡21:27 Yesaya 52:1; Yeskial 44:9