1 Tolanoo susue nggalei! Ia, au susula kaduang fee ei. Nai susula kadua nggala ia, au asanenedak ei, fo ei bisa duduꞌa laꞌeneu dedeꞌa ndoo sala. 2 Masaneda Manetualain mana kokola malalaon, kokolan lele uluk ele. Masaneda Yesus nadedenu nala boe. Lamatuak palenda sala, fo suek lafada Ndia kokolan. De, duduꞌa neulalau laꞌeneu hata fo ala lafadan neu ei. Yesus ndia, tao nasoda ei mima ei sala-singgo mala mai! 3 Masaneda leoiak dei: mae daebafok bei ta basan, tehuu hambu mana haumemee kala kada tao ladabak tungga sila hihii-nanau nala. Ala kokolak tao lakalulutu basa dedeꞌa ndoos.✡ Yudas 1:18 4 Ala kokolak lae, “Aweꞌek! Yesus helu, nae, Ana sangga fali main do? Mete ma leondiak, na, Ndia nai bee? Huu, mulai neme ita bei-baꞌi nala mate sala, losa hatematak ia boe oo, taa hambu mana dadik leondiak. Basan laꞌok nahele nakandoo, mulai neme Lamatuak nakadadadik lalai ma daebafok.”

5-7 Tehuu, hambu dedeꞌak esa, fo hataholi masapepeko kala sila taa nau lasanedan. Fo ndia, neme sososan mai kada Lamatuak kokolak, boe ma lalai dadi memak. Boe ma Lamatuak nakadadadik oe. Basa de Ana tao kofeꞌe oe neme madak lain mai, boe ma madak lain sadu neme oe dale mai. Lamatuak kokolak leobeek so, na, ndia dadi memak.✡ Tutuik laꞌeneu Sososan 1:6-9 Doo-doo, boe ma Lamatuak pake faa, fo tao nakalulutu heni basa hataholi malai daebafok ia, fo neu lelek Noh nasoda ndia.✡ Tutuik laꞌeneu Sososan 7:11 Tehuu hatematak ia, Lamatuak nafada memak fo Ana sangga tao hata neu lalai ma daebafok. Hatematak ia Ana bei nakatataak, tehuu dei fo nandaa no ndia fain, Ana sangga hotu heni sala. Huu dei fo Lamatuak fee huhukuk, fo tao nakalulutu heni hataholi fo taa mana nau mbali Ndia. Mae leondiak, tehuu hataholi masapepeko kala sila, taa nau lasaneda lae, neu ko Manetualain tao tungga hata fo Ana kokolan ndia so.

8 Tolanoo susue nggalei! Boso mafalende heni dedeꞌak ia. Ita Lamatuan, taa hingga faik sama leo ita. Huu tungga Ndia, na, faik esa sama leo teuk lifun esa. Ma teuk lifun esa, sama leo kada faik esa boe.✡ Sosoda Koa-kio kala 90:5 9 Mete ma Lamatuak helu tao hata esa, na neu ko Ana taon. Mete ma fain nandaa, bei fo Ana taon. Hambu hataholi luma duduꞌa lae, “Manetualain tao ues nggeꞌan seli.” Naa te taa! Ndia nggaleloan fo fee lelak soaneu basa hataholi hondak ma fali leni Ndia leu. Huu Ana taa nau fo hataholi esa boe laelak dook lo Ndia.

10 Tehuu dei fo mete ma ita Lamatuan fafali main ndia, taa hambu hataholi bubuluk mema kana. Huu, Ndia mamain ndia, kada nggengge neuk, sama leo naꞌo esa maso neni uma dale neu. Faik ndia, basa hata malai lalai, haꞌi naꞌa heni sala, sama leo ledo, bulak, ma nduu kala. Basan basa sala! Leondiak boe, daebafok no basa isi nala. Kade heni sala!✡ Mateos 24:43; Lukas 12:39; 1 Tesalonika 5:2; Dae-bafok Mata Beuk 16:15

11 De, mete ma dei fo haꞌi naꞌa heni basa sala leondiak, na, ei musi dadik neu hataholi matak leobeek? Ei musi mbalak eik, fo masoda tungga Lamatuak hihii-nanaun. Ei musi masoda malalaok! 12 Ei boe oo, mahani mbea-mbea Lamatuak mamain. De, ei musi mbalak eik, fo tao faik ndia mai lai-lai. Faik ndia boe, haꞌi naꞌa heni lalai. Ma basa hata malai lalai haꞌi naꞌa sala, de noe heni sala.

13 Tehuu, dei fo hambu lalai mata beuk ma daebafo mata beuk. Manetualain helu leondiak so, boe ma ndia fo ita tahani mbea-mbea. Nai ndia, kada hambu hataholi soda ndoo sala.✡ Yesaya 65:17; 66:22; Dae-bafok Mata Beuk 21:1

14 De, tolanoo susue nggalei! Ledoeik fo ei mambue mahani dedeꞌa kala ia, ei musi mbalak eik, fo dadik hataholi malole tungga Lamatuak hihii-nanaun. No leondiak, na, taa hambu hataholi bisa soli salak neu ei. Mbalak eik fo masoda mole boe.

15a Huu ita Lamatuan ndia, kada nggaleloan, suek Ana bisa nasalaꞌe nala ei mima ei sala-singgo mala mai.

15b Ita tolanoon Paulus sulak fee ei so, laꞌeneu dedeꞌa noꞌu kala fo sama leo manai au susulang ia. Lamatuak ndia feen ana bubuluk leondiak, huu ndia de, ana sulak leondiak. 16 Laꞌi-laꞌik Paulus sulak susulak, na, ndia boe oo kokolak dedeꞌa kala ia. Neme ndia susula nala mai, memak hambu dedeꞌak fo ita taa duꞌa laꞌe ndia hihiin. Hambu hataholi boe tao naeok Paulus hihiin. Sila boe oo, tao laeok dedeꞌa feꞌe kala lai Lamatuak Susula Malalaon. Sila ndia, na ndia mbelatua, ma hataholi la fo namahehelen taa matea. Hataholi mata leondia kala, dei fo lakalulutuk heni sala.

17 Tolanoo susue nggalei! Ei bubuluk mese masapepeko kala sila dala soda nala. De, mata neuk bou! Huu tala nau lamanene heti-heuk esa boe. Ala soba-soba fo pepeko ei, fo suek ei heok mima dala ndoos mai. Tehuu boso mboꞌi sala senggi ei leondiak. Huu, ei musi mahele mini tean. 18 Malolenak, ei namahehele mala moli lakandoo. Huu ei bubuluk ita Lamatuan Yesus Karistus so, fo nasalaꞌe nala ita teme ita sala-singgo nala mai. Ana nau natudu Ndia dale malolen neu ei. Ma Ndia boe oo, nau ei malelak neulalau Ndia bali.

Au nau fo basa hataholi soꞌu dema-demak Ndia, neme hatematak ia mai, losa dodoon neu!* Susula dedeꞌa Yunani luma tamba “Amin” nai ia.