2
Ngwujaꞌri ngwani pä Yicung küꞌrï
1 Lani ngweengga, anni ïndïny ꞌdanggalu, nggwaꞌti ïndï gwubu kinene gwondaja ngwujaꞌri ngwe gwudi yibegeng yipa anaku urnidiny gu ꞌdanggalanu inggidi gwe gwudi Ngwaalu. 2 Nyi be ari nggwaꞌti gwa lenge gonyalu gere nggwuju ꞌdanggalu nyi be geꞌte lengeng gwüny ꞌdogo gwani Yicu Kirictu na gwani yiꞌrany yüngün küꞌrälä. 3 Gaji ganni gijar ge, nggwamiꞌratu aar nyi yedeny eny nyi didiꞌri gwulleny. 4 A anni ondaca je ngaa je enggaci ngwujaꞌri, nggwaꞌti ondaja bebere gwe na rimalu gwe, nyi be ondaji inggidi gwe gwani yiima yidi Lïgïꞌrïm. 5 Nunnu a ämnï Ngwaalu gwalu odani giyiima yidi Ngwaalu aaꞌti gwodani ndi bebere gwudi dïjï dümnä.
Bebere gwïndï Gïlïgïꞌrïm lidi Ngwaalu
6 A be ꞌto nyii lati ondaji bebere gwe nyii ondaci ngwüjü ngwanni ngwuru ngwubegeng gïlïgïꞌrïm. Aar be ꞌti rüdï bebere gwudi dïdlä ndee aar ꞌti rüdï bebere gwudi ngweleny ngwudi dïdlä ndee ngwanni ngwadi ele ndi medadi. 7 Nyii be ondaji bebere gwe gwuru yujimid yidi Ngwaalu yanni yändälü yaꞌti je ngwüjï lïngïdï yigeꞌta je Ngwaalu ꞌtuꞌtu gwerre gaji gaꞌtina ju nunnu aar nje ye näjï. 8 Yaꞌti je deleny dere ngwelenyanu ngwudi dïdlä ndee lïngïdï, ndi ari adinari aar je lenge, laꞌti ladi pä Delenya didi näjï küꞌrälä. 9 A be alanga londaja ngwujaꞌri ngwe ngwaru ngwe gitab ndi ari,
“Yiꞌral yaꞌti je ngwüjï änggädï ngwäy ngwe,
aar je ꞌti ꞌdingina ngwänï ngwe,
aar je ꞌti lïngïdï yaꞌrany ye yidi dïjï dümnä
yiru yanni yïgïꞌtïjä je Ngwaalu ngwüjü ngwanni ngwämnä ngindeng.” 2.9 Ajaya 64.4
10 Yima aar nje be Ngwaalu ꞌtäcälü Lïgïꞌrïm le lüngün.
Ndi ari Lïgïꞌrïm lidi Ngwaalu lati inggidi yiꞌralalu pipiꞌriꞌti ꞌdi ngwulenge ligor lidi Ngwaalu ngïnäꞌdänü. 11 Ndi ari lïgïꞌrïm lidi dïjï dümnä ꞌdünggüngün, liru lanni lati lenge ligor lidi dïjï. No ꞌto Lïgïꞌrïm lidi Ngwaalu jücü liru ꞌto lanni lati lenge ligor lidi Ngwaalu. 12 A laꞌti apu lïgïꞌrïmä lidi dïdlä ndee ar be ape Lïgïꞌrïmä lïndï Ngwaalu nunnu ar le lenge yiꞌral yanni yangidacaar nje Ngwaalu. 13 Yiru giyee yati ar ye ondajalu ngwujaꞌri ngwe ngwanni ngwati nje Lïgïꞌrïm lanni Lijuꞌru enggaci, yäꞌtüdï enggaci gwudi bebere gwudi dïjï dümnä. Aar be ru enggaci gwudi Lïgïꞌrïm, ar inggidi ꞌdidaning gwudi lïgïꞌrïm ngwujaꞌri ngwe ngwudi lïgïꞌrïm. 14 A be dïjï diru lingeno dati ꞌti ämnä yiꞌral yidi Lïgïꞌrïm lidi Ngwaalu ndi ari yating je engga ꞌdünggüngün yiru yeꞌrr. Yating je ꞌti burna ndi lenge ndi ari yati linginni Lïgïꞌrïmä le lidi Ngwaalu. 15 Dïjï danni dätï Lïgïꞌrïmä lidi Ngwaalu, da burni ndi engga ꞌdidaning gwudi yiꞌral ꞌdar a be gwere gwaꞌti gwa lenge yiꞌral yidi dïjü didi Lïgïꞌrïm. Ndi ari gitab garu nu,
16 “Yärü gwanni gwülïngïdï ligor lidi Deleny
nunnu ngwenggaci?” 2.16 Ajaya 40.13
A be alanga lätï ligor lidi Kirictu.