Ngwujaꞌri ngwanni ngwullu je Bulij
Küründüj giꞌra geꞌte
Änï kitabanu
Dooꞌra dükäjäär dani Bulij dullu ngwujaꞌri ngwee ngwuje ükäcï giꞌdonga gidi Ngwaalu kündär gani Küründüj. Gwuca Ngwaalinga yäy ꞌtu gwani ngindenga, ngwuje be girinya gwani yiꞌral yonyadu yanni yiki yärrïnä ꞌdenggenanu.
Küründüj gwuru gündär gipa ngwaalu ngwani Akayiya. Gweneno gen nggee gani Gïrïg. Gwuru gündär gojema gidi goola gätï yumu yiꞌra rom yati gu ngwübälükä üllälü. Ngwüjï ngwonyadu ngwati ele kündär giyomon yooko aar be gatani. Bulij gwädäälü ndi enggaci ngwüjü ngwämrä ngwudi Ngwüyäwüd, a be anni ma Ngwüyäwüd ïnïjï, ngwube ele ngwuꞌdun ngwudi Tïtüj Yujituj gwuru Garany gwanni gwuma ru dïkïrïjïn didi Yicu (Yiiru 18.1–17).
Lonyadu liru ngwïkïrïjïn ngwudi Küründüjïng liru ngwuwayi anni ari loko ꞌdenggen lïnänü goola ge, na gweꞌte ꞌdenggen gwuru gwanni gwati määtä gola gidi gündär (1 Küründüj 1.26–29; Rumiya 16.23). Anni ju Bulij Küründüj, gwati ape yiiru yidi ugꞌri ngwurna ngweny guy ge güngün (Yiiru 18.3).
Ligor lïpïcä Bulijinganu gwece gwece ngwïkïrïjïn ngwudi Küründüjïng gay ge ganni gati aar gu garnati aar üꞌrïꞌtïdänü aar ji giꞌdu rung rung (1.10–17; 3.1–9), na gay ge ganni gaꞌti jaw gati aar ge apajidi (5.1—6.20). Bulij gwullu ꞌto ngwuje gwäꞌräcänü ngwujaꞌri ngwanni ngwutaar ngwalu ngwani agidi (7.1–40) na ngwani ngwong ngwudi eny ngwanni ngwati je ngwüjï ngwudi dïdlä gätïjï dïdülälü (8.1–13).
A je Bulij enggaci awa aar äpïjï Ngwaalinga yobo ma aar oꞌrajidalu (10.1—14.40) ngwuje orꞌtemaji aar mätïnälü ꞌdïꞌdäny ndi ämnï Ngwaalu gwegen gwanni gwuma je Ngwaalu ätädä aar dami yiꞌrany (15.1–58).
Yajang yidi ngwujaꞌri
1. Aganni na otaci Ngwaalingalu gwudi Bulij (1.1–9)
2. Urnidi ndi ari a gekajidi ji (1.10—4.21)
3. Dïrbä didi ji yengga (5.1—7.40)
4. Näjï Ngwaalinga na aaꞌti la äpïjï dïdülä yobo (8.1—11.1)
5. Elelle gwudi giꞌdoonga na äpïjï Ngwaalinga yobo (11.2—14.40)
6. ꞌDïꞌrï gwudi Kirictu na gwudi ngwïkïrïjïn (15.1–58)
7. Geꞌtajidi ngwuy gwani ngwïkïrïjïn ngwanni ngwuru ngwuwayi Yäwüdïyä (16.1–4)
8. Gegeꞌte gwudi ꞌdïꞌrï yiiru ye (16.5–12)
9. Mïꞌrä (16.13–24)
1
Aganni gwudi Bulij
1 Äny gwuru gwani Bulij, bupi gwe gwudi Ngwaalu gwurnidaar ngwuru dooꞌra dükäjäär didi Yicu Kirictu. Nyii liju diweengga de dani Jujitanuj.
2 Ngwükäcï nje giꞌdonga gidi Ngwaalu kündär gani Küründüj. Ngwüjï ngwudi Ngwaalu ngwanni ngwügäꞌrïnä ndi Yicu Kirictu ngwanni ngwurnidi je Ngwaalu nunnu aar juꞌri ngwüjïngä le ꞌdar ngwanni ngwurnidu ngwürïny ngwe ngwudi Deleny dege dani Yicu Kirictu ngwaalu ꞌdar gwuru Deleny degen ngwuru Deleny dege.
3 Ara je gu yïmïꞌrü ji ara je gu adatalu ji gwudi Ngwaalu ngwuru Papa gwege na Deleny dege dani Yicu Kirictu.
Ci Ngwaalinga yäy ꞌtu
4 Äny gwati ci Ngwaalinga yäy ꞌtu gwani nga nga yomon reny na gwani yïmïꞌrü yanni yima ara je Ngwaalu ätädä ndi Yicu Kirictu. 5 Ndi ari lima je nïyänü ꞌdünggüngün angidaji gwe ꞌdar, ndi ondaji gwalu ꞌdar, ndi lenge gwalu ꞌdar, 6 ndi ari ngwujaꞌri ngwanni ngwondaji nyii ngwe gwani Kirictu, ngwuma mätïnälü ꞌdanggalanu. 7 Yäy gu no, ngaa laꞌti amiꞌratu angidajing gwere gwudi Ngwaalu, anaku dünïcä gu Delenya dege dani Yicu Kirictu lïtï je yigoranu, nding ꞌtädïnälü.
8 Nginde gwuru gwa je rime ngaa mätïnälü ꞌdi a yomon medadi ngaa ji ngaa jayi nono komon gidi Deleny dege dani Yicu Kirictu. 9 Ngwaalu ngwuru ligor leꞌte pu ngwanni ngwurnida je ndi acajidi Gïjïngä le güngün giru Deleny dege dani Yicu Kirictu.
Üꞌrïꞌtïdänü kiꞌdoonga
10 Nggwüpäcä jälü lani ngweengga, ngwürïny ngwe ngwudi Deleny dege dani Yicu Kirictu ndi ari ngaa gekajidi ngwujaꞌri ngweꞌte pu nunnu aaꞌti üꞌrïꞌtïdänü gwa ji ꞌdanggalanu na ndi ari ngaa gekajidi limbutu liru yigor yeꞌte pu na yaꞌranya yeꞌte pu. 11 Ndi ari ngwüjï ngwoko ngwudi gubu gidi Galiwa ngwondaciny ndi ari ngaa gilo lati kadi lani ngwänggärï. 12 Yanni yadi nyi ye ari yiru giyee ndi ari, loko gilo ꞌdanggalanu lati ari, “Nyängä liru lidi Bulij.” A loko ari, “Nyängä liru lidi Abuluj.” A loko ari, “Nyängä liru lidi Butruj.” A loko ari, “Nyängä liru lidi Kirictu.”
13 Nggwutalu ndi ari, Kirictu gwüꞌrïꞌtïnäno? Bulij gwuru gwanni gwüpädäär küꞌrï gwani nga nga? Lïnyïnyä je ngwürïny ngwe ngwudi Bulije? 14 Äny gwucu Ngwaalinga yäy ꞌtu ndi ari nggwaꞌti nyïnyä dïjü dere ꞌdanggalanu a be Kirijibuj na Gayuj ru lanni lïnyïnyï nje. 15 No dïjï dere daꞌti da ari ngaa lïnyïnyïnä ngwürïny ngwe ngwüny. 16 Yäy na ꞌto, nggwünyïnyä ngwüjü ngwudi gubu gidi Ijitabanaj nyi ꞌti be diwayina ndi ari nggwünyïnyä dïjü dere diꞌter mana. 17 Ndi ari Kirictu gwaꞌtiny ükäjü ndi nyïnyï ngwüjü, aar nyi be ükäjï ndi ondaci ngwüjü ngwujaꞌri ngwanni ngwujaw. Nyi ꞌti gätädï ngwäy ndi bebere gwudi ngwujaꞌri ngwudi ngwüjï ngwümnä nunnu aaꞌti yiima yidi yiꞌrany yidi Kirictu küꞌrälä, ya ru ꞌtur.
Kirictu gwuru yiima na bebere gwudi Ngwaalu
18 Ndi ari ondaji gwudi ngwujaꞌri ngwudi yiꞌrany küꞌrälä gimamindanu, gwuru yeꞌrr ngwüjï ngwanni ngwo ndi ayi a be ꞌdengge lanni gilo ndi gïlängïdïnï, ngwube ru yiima yidi Ngwaalu. 19 Ndi ari yüllïnä yaru nu,
“Nggwa äbrï bebereng gwudi ngwüjï ngwanni ngwaru ngwubebera
nyi äbrï lengeng gwudi ngwüjï ngwanni ngwaru ngwülïngïdï!” 1.19 Ajaya 29.14
20 Yäy gu no, gwanna gwe gwanni gwubebera? Na gwanna gwe gwanni gwuru doorta didi yobo? Gwanna gwe gwudi dïdlä ndee gwanni gwati garnati? Ngwaalu ngwuma ꞌti gwürlü bebereng gwudi dïdlä ndee gwuma ru yeꞌrre? 21 A be anni rar ndi ari bebere gwudi Ngwaalu gwaꞌti ngwüjï ngwudi dïdlä lïngïdï bebere gwe gwegen, Ngwaalu ngwüjädï je yeꞌrranu yidi ngwujaꞌri ngwanni ngwujaw ngwündäjïnä, ngwungwe gïlängïdïyï ngwüjü ngwanni ngwämnï ꞌdünggün. 22 Ngwüyäwüd ngwati mïnï ndi engga yiꞌremna yiru yiima a Ngwügïrïg ngwati mïnï bebereng, 23 a be alanga londaja Kirictu gwe gwüpädäär küꞌrï, gwuru gimle gidi obalu Ngwüyäwüd, ngwuru yeꞌrr ngwüjï ngwuru Garany, 24 a be ngwüjï ngwanni ngwuma je Ngwaalu urnidi, ngwuru Ngwüyäwüd aar ru Garany, a be Kirictu ru ꞌdenggen yiima yidi Ngwaalu ngwuru bebere gwudi Ngwaalu. 25 Ndi ari yeꞌrr yidi Ngwaalu yibeberana ndi bebere gwudi dïjï dümnä na amiꞌrati gwudi Ngwaalu gwojemana giyiima yidi dïjï dümnä.
26 Ngweengga, ïrïyär ngwäyälü ngaa lenge ndi ari ngaa liruꞌtaa gwele anni urnidara je Ngwaalu. Ngaa laꞌti onyadu libebera bebereng gwudi dïdlä ngaa laꞌti onyadu lïꞌtüdï ngwüjï ngwätï yiima. Ngaa laꞌti onyadu lïlïngïnä ngwüjï ngwünänü. 27 A be Ngwaalu äbrï yiꞌral yanni yiru yeꞌrr ngwüjï gïdïdlä ngwuye apiyi ngwüjü yaaru ngwanni ngwaru ngwubebera. A Ngwaalu äbrï yiꞌral yanni yamiꞌratu ngwüjï gïdïdlä ngwuye apiyi ngwüjü yaaru ngwanni ngwaru ngwätï yiima. 28 Nginde gwäbrä yiꞌral yanni yooko guꞌru gïdïdlä ndee na yanni yica je ngwüjälü mireny na yanni yäꞌtüdï guꞌru, ngwuye dudiyi yiꞌral yanni yiru guꞌru ngwüjï, 29 nunnu aaꞌti dïjï dïrïngïnï ngwäyänü Ngwaalu. 30 Yiru ndi ari yanni yima je Ngwaalu ärrï, ngaa lima ji ndi Yicu Kirictu gwanni gwuma ru bebere gwudi Ngwaalu ꞌdengge, dünälü, juꞌri na üꞌrälü gwege. 31 Yäy gu no, anaku üllïnäär gu ndi ari, “Gäbïcär ngindeng gwanni gwadi ïrïngïnï, ngwïrïngïnï Gideleny.” 1.31 Ärmïyä 9.24