1 Lord, ko volau itadira na lei tinoni dika,

mo ko pilupungisiu itadira gaira tara ruturutu.

2 Gaira tara padalaghinia na dika

tughu bongi tana tobadira,

mara gunaguna.

3 Na ghidudira te ghinighini vagha na poli,

mana maomao ni torokoe te tudutudu horu mai tana ghidudira.

4 Ghe Lord, Ko lavi kehau tana limadira na lei tinoni dika,

mo ko pilupungisiu itadira tara ruturutu,

na pukuna gaira tara padalaghinia na hughuhughu koluagu.

5 Gaira tara talunagho tana liona na tari pitiagu,

mana talahia na vugho ni hoghotiagu,

mana talui dilai na gilu tana lei halautugu.

6 Inau tu bosa vania Lord,

Ighoe nigua na God,

Ko varongohiu mai Lord,

ta nigua na ngangaraha,

mo ko aroviu!

7 Ghe Lord, nigua na malaghai laga,

ta nimua na malei haba,

Ko pilupungisiu tana bongi ni veitotoghoni.

8 Lord, ko bei lubatighi vanira gea didira na ghanaghana dika,

Ghe God, didira na ghanaghana dika ke bei tangomana vanira gea.

9 Lubatira na ghagua na kana, ge kara mate,

na pukuna tara gonighi vaniu na lei totobo dika.

10 Ko havukaghinia na gougovu ni lake bera tana uludira,

po ko sonighi tana lake pi tana lokana na gilu valo,

iga kara mua tangomana na rughuhoru keha.

11 Bei lubatira na vure sorisori,

ge kara sepalaghi tana komuda,

na pukuna tara gonighi na lei totobo dika,

mara liona vamua na hughuhughu.

12 Inau tu ghilala gaia Lord,

ke tangomana na hangadira gaira tara kanahaghinira,

me ke pangoti haliura ta didira na maana rana bona.

13 E utuni, gaira nina vure God,

kara holoutoa na ahamu,

ma gaira kara ghahara haia tana matamu.