1 Ghe Lord, to kene taonia tua na tobagu,

mo ghilala utou tua.

2 Mo ghilala ghua na bona ni tapatughuruagu,

mana sopou horuagu,

mo ghilala ghua na lokana na liogu,

tu kabu sagauvigho.

3 Ighoe to padalaghinia tua na halautugu,

mo bosa vaniu ivei ku sopou ni ahevata,

mo ghilalai ghua na lei bona ni aho tu ghahau iga.

4 Lord, ighoe to ghilala dila tua na hava ku bosa,

inaghona ge u bosa horua na bosa.

5 Ighau ko ide, mo ko tumuriu,

ko haua mai na limamu vuvunga ni ulugu, mo ko vautou.

6 Na vata ni manaha eni te sule vuleu inau,

e sule vulea nigua na manaha ni ghilala.

7 Inau ku mua tangomana na ghogho keha sania nimua na tarunga,

mu ku mua tughuru polo ghua tana matamu.

8 Ke vagha ku dato i kokou ke, mi ghoe so iga,

mu ku horu i Betidalo ke, mi ghoe so iga,

9 Ke vagha ku nia lovo na ghata te labota,

mu ku ghahau levu na na horara,

10 Na limamu ke hagalo sodou so iga, me ke patupatu.

11 Ku nongia na pungi ge ke kuvihiu,

pana marara te talighutiu ge ke liliu ni pungi,

12 Mi lokana na pungi loloho,

ku mua tangomana na polo tana matamu.

Na bongi mana dani sakai na vata vamua i tamua.

Na bongi te marara vagha so na dani.

13 Ighoe to gonighi na lei ula vola soko lokana na huligu,

mo pasu kolu lokana na kutuna na tinagu.

14 Na malei limamu te haeharegha,

me vatei mamaromangana,

mu ghilala uto tua.

Holoutogho ighoe to goniu.

15 Ighoe to mata reireiu tana bona tu vuha lokana na pungi,

to talu kolu heghegu ga tana keigu.

16 Mo ghilalai na lei bongigu,

naghona ge u sivuragha,

na lei bongi ni volagu soko na gegereni

te ghahai tua lokana nimua na buka.

17 Na lei matakuni ni mata tu gonidila sokoi tua,

ge padi a sakai na dani,

18 mi tana bona tu rarai mai tana puipungi, ighoe so itagua.

19 Ghe God, ke vagha ko taghalaghiniana na lei tinoni dika ke,

ma kara righihoru keha ghua na lei tinoni [labu tabo]/[haga labu mate].

20 Gaira na ghamua levunimate,

tana bona tara bosa taboa na ahamu,

tara bosa dikalagho haia.

21 Lord, ku nia sika mughua ra hei tara nia sika ighoe.

Mu ku nia sika rahei tara hughuhughu kolugho.

22 Eo, ku nira sika haliu tua,

na pukuna na ghamua na kana,

gaira ghagua na levunimate.

23 Ghe God, kene taoniu, mo righia utoa na lokagu,

ko tabotabou mo ko ghilala na lokana na liogu.

24 Tuhu kalei mai itagua na hava te pungisigho,

mo ko uhuliu maemaneu gatu tara vola kasila.