1 Kau linge vania a Lord na linge vaolu,

maramana talighu, linge vania a Lord.

2 Linge vania a Lord ma kau holoutoa,

ladavaghinia tughu bongi gaia te volaghita.

3 Ladavaghinia na rongoraghana tadira na lei kema,

ma na volana te haeharegha tadira na lei vure.

4 A Lord te haba me ulaghana ka holohabaa,

gaia ka talumavaa vulera na lei God.

5 Didira god na balu kema na titinoni vamua,

mana Lord te gonighi na lei totobo tana parako.

6 Na rongoragha mana malei haba te saopoa a Lord,

na maana mana matakage te vonughia nina valetabu.

7 Kau holoutoa a Lord na maramana talighu,

kau holoutoa nina rongoragha mana laga.

8 Holoutoa na ahana a Lord, te rongoragha,

lavia nimiu heveilee ma kau nia mai ta nina valetabu.

9 Kau nia kikinima gaia te tabu tana bona ke mai,

na maramana ke tatata tana matana nia na ghanaghana mava.

10 Bosa vanira na lei kema,

“A Lord te vunaghi haba, me kabulaghi ngasilia na maramana tana malana,

me mua ghoi aleale tua me ke detera na vure nia na utuni.

11 Kau togotogo nimiu ghau na parako mana pari,

na tahi te karaha ma gaira tara vola i lokana.

12 Na pari ma na lei totobo totolo i lokana,

kau togotogo nimiu,

lei ghai tana leao kara linge rivurivu.

13 Mi tana bona ke mai a Lord,

ke mai haba pungisia na maramana

me ke hulira na vure nia na utuni mana maemane.