1 Ighita ka linge vania a Lord,

Ighita ka linge togotogo vania God na vavolada.

2 Ka mai tatana nia na holouto,

ma ka linge togotogo nia na holohaba.

3 Gaia a Lord, God te haba,

na vunaghi haba tadira na lei god.

4 Gaia te vunaghina na maramana talighu,

na lei vatuluma mana ghotu datogha.

5 A nina te gonia na tahi,

na pari tina ghua te puputua heghena.

6 Ighita ka nia kikinima ka holohabaa,

taulaghi tuturu vania te gonighita.

7 Gaia dida God, te righitaonighita,

mi ghita nina lei sheep te vatoghaghita.

Itaeni, kau rongovia mughua na hava God te bosaa,

8 Kau rongovia na bosana itaeni te ghaghua,

“Kau bei kutuvatu vaghara kukuamiu i Meribah,

tana bongidira i Massah tana bona mamaha.

9 Rana kukuamiu tara tabotabou igaa,

tara righia maanagu ta na hava tu gonia.

10 E vati hangavulu na niulu tu rutu vanira,

keri ge u bosa,

“Gaira na vure tara loghoa na tobadira te ririu keha itagua haia.

Tara mua lioni na taoniana na hava tu bosai vanira.

11 Mi nau tu baubahu rutu vanira,

“Agaira kara mua tangomana tua na rughuhaghe ta nigua na malei aheahe igaa.”