44
1 Ghe God, Ighai tai rongovighi nia tua na lei kulimami
te vagha tara bosai vanighai na lei kukuamami
tana hava to gonia itatana balu bongi te padi
tana tualani mai.
2 Te vagha to nira ga na ghuru horua dira rana voo
tana lei sopa kemadira mo vahera na pari rana lei kukuamami
Ighoe to vahaghitailira ta ghadira na levunimate,
mo nira na lei kukuamami mara tatavahale.
3 A gaira tara mua manangi vulea na pari nia didira na isi
Me mua didira na laga heghedira te nera ge ra nia laga vule.
Hauva ma nimua na puku ni maana ge ra nia tangomana.
nia na pukuna to lio uto vanira mo tatea nimua na dolo itadira.
4 Ighoe nigua na God mana vunaghigu.
mo vahera na laga vule vanira nimua na vure.
5 nimua na maana oli vamua ghe ighai tai turi bitara na ghamami na levunimate.
itatana ahamu oli heghemu vamua ge kai turi bitara ghamami na kana
6 Nigua na baghe heghegu tu mua taluutunia.
Inau tu mua idumia siki nigua na isi ge ke vavolau
7 Ighoe to vaheghai mai na laga vule itadira na ghamami na levunimate.
Mi ghoe to nira ge ra kubolu horu gaira tara nighai sika.
8 Tana lei dani soko ge God,
Ighai kai holohabagho ma kai holoutoana ahamu kasila.
9 Mi taeni ighoe to kabu sagauvighai.
Mo mua ghoi ghidevira nimami na ovu ni vure ni sura tana veitotoghoni
10 Ighoe to nighami ge ai sama pulohi itadira ghamami na levu i mate me talana vanira ge kara dikalai nimami na lei hegohego tana pari.
11 Ighoe to tangomanaghai te vagha na sheep te gonidila ge kara pusia.
mi ghoe to neghai ghai havukaghi kolili tana lei sopa kema
12 To nighai hunulu, ighai nimura na lei vure uto tana malumu.
Mo nighai ghai taho vaho tua ta nimami na lei sopa uto itamami.
13 Ighoe to neghai ge ra batobatoghai na lei ghamami na komu kolu.
Ighai tara kiakia kiahaghinighai mara mua liomami,
mana lei kema soko tara kililighai tara batobatoghai mara koengeleghai.
14 Ighoe to neghai ge ra batobato ghai na lei tinoni;
Ighai tara bosa batobatoghai na maramana udolu.
15 Ighita udolu ka mua tangomana ge ka sogha poloa nina lio ni talumuri mana kikinima;
na maa tara gegere pungisighi nia na lei matamami.
16 Na hava vamua tai rongovia na koepasa itadira tara nighai ghighirou.
17 Ma raeni soko te kale tua me hauva ma mua nigho ponolio,
Ighai tai mua diudiua nimua na vetena.
18 Na lei tobamami tara mua tona sanigho.
Ighai tai mua sivi tana halautumu.
19 Hauva mi ghoe to neghai ge ai vahaghitaili mai tona sanigho.
Mi ghoe to kuvihighai nia na ungaunga ni pungi mana mate.
20 Ge ke vagha ighai kai ririukeha na holohabana dida na God
pa ka vurehighi na lei limamami itatana kokoeliulivutiani na lei god keha,
21 God ke ghilala utunia sughua,
na pukuna gaia oli heghena te pukui
me ghilala udolui na lei ghanaghana te kabu polo tana [lei sopa toba]/[tobamami].
22 Na pukuna ighoe, ge kakale ighai tana lei dani soko.
mi ghai tara pahepaheghai vagha na sheep.
23 Ko sakeraghi dato, Ighoe, Lord,
E ghua ge o maturu?
Tughuru dato! Mo ko bei neghai sika kasila.
24 E ghua ge o vaevane keha?
E ghua ge o nighi ponolio nimami na lei vahaghitaili mana gunaguna?
25 Ighai tai tumu taghoti horu itatana ravu,
ma kolitao horu tana ravu te meto.
26 Tughuru dato! Hangaghai!
Ko vavolaghai nia nimua na dolo ke mua mautu haia.