1 Te vagha na deer te liona na beti ni daidari,

mu ghanaghanagho, Ighoe God, na kene taoniamu.

2 Inau tu nia mamangaha God, na God te vola

E ghua nigha ku mai inau tughuru i naghona gaia?

3 Bongi mana dani, lolonga na kolobu

inau tu lavia na vatei vanga.

Ma gaia ghana na levunimate

tara tona haliu so na huatiagu

mara bosa, “Ivei gaia a nimua na God?”

4 Na tobagu te tarosi

te vagha tu ghanaghana olighi

na hava te ghaghua iga tana bona te padi

Inau tu sakusaku tua ighobudira na vure subo tara holohaba

mu ghidevira tana alaala alaala sule va tana valena God.

Linge rivurivu mana nia hevei na holouto

gaia na tangitangina te vagha na taba tu sule!

5 E ghua ge o dikalio?

Me ghua ge o dikalio ngangata?

Inau ku talu ngasilia nigua na ghanaghana tatana God!

Mu ku ghoi holoutoa so gaia nigua na God mana vavolagu

6 Nigua na dikalio itaeni te tabagu ngangata,

hauva mi nau tu ghanaghana olighi so nimua na veiarovi

te butu mai tana ghotu Hermon,

na vuravura ni Jordan,

te butu mai tana bona itatana ghotuna Mizar.

7 Inau tu rongovia na gumugumuna na tahi

te vagha nimua na lualua mana unuunu

tara tona vuleu inau.

8 Na pukuna na lei dani soko na Lord te mua mautu

na kovala horuana mai nina dolo i vuvungagu

mana pukuna na lei bongi soko

inau u lingei vania na lei nina na linge,

Mu kokoeliulivuti vania God

gaia te vaheu na vola.

9 “Ghe God, nigua na vatu ngasi,”

tu ngangaraha “E ghua ge o nia ponolio?

E ghua ge ku sakutua kolili itatana pungi,

ge kara gunaliu ga na ghaghua na lei levunimate?”

10 Didira na ghanaghana ni gunaliagu

te vagha ke togo potaa na volagu tana mate.

A gaira tara batobato,

“Ivei agaia nimua na God?”

11 E ghua ge u lio kihi ngangata?

E ghua ge o dikalio?

Inau ku varavaghinia nigua na ghanaghana kodo itatana God!

Inau ku ghoi holohaba so gaia nigua na God mana vavolagu!