1 Mürin ei, üa rongorong och möngüngü mi wewe ngeni mwelien eu mwichen aramas mi watte seni lon läng, ra kökkö fän leüömong, “Ousipwe mwareiti Kot! Manau me ling me manaman a wor ren ach Kot! 2 An kewe kapwüng ra let o pwüng! A apwüngü ewe fin lisowu mi iteföüla, a angauala chon fanüfan ren an föförün lisowu. Kot a ngeni chappen an föför, pun a niela nöün kewe chon angang.” ✡ Tut 32.43; 2.King 9.7 3 Ra kökkösefäl fän leüömong, “Ousipwe mwareiti Kot! Ötüötün ewe ekkei mi kenala ewe telinimw mi watte a ötütä tori feilfeilachök.” ✡ Ais 34.10 4 Iwe, ekewe rüwe me föman souakom me ekewe föman mönümanau ra chapetiu o fel ngeni Kot, ewe mi mot won an lenien motun king. Ra apasa, “Amen! Ousipwe mwareiti Kot.”

5 Mürin mwelien eman a feito seni ewe lenien motun king, a apasa, “Ousipwe mwareiti ach Kot, ämi chon angang meinisin, ämi aramas meinisin, ämi aramas tekia me aramas kis meinisin mi meniniti Kot!” ✡ Kölf 115.13 6 Mürin üa rongorong eu möngüngü mi wewe ngeni möngüngün eu mwichen aramas mi fokun watte, a pwal wewe ngeni ngüngün chomong koluk me chopun chopulap mi leüömong a apasa, “Ousipwe mwareiti Kot! Pun ach Samol, ewe Kot mi Unusen Manaman a nemenem. ✡ Is 1.24; Kölf 93.1; 97.1; 99.1 7 Ousipwe mweireir o fokun pwapwa, ousipwe mwareiti an tekia! Pun a war fansoun apwüpwülüen ewe Lam, nge pwülüan we, ewe fin apwüpwülü söfö, a püsin amol ngeni ewe rän. 8 Kot a ngeni echö üf mi limöch, a pwechepwech o molupolup pwe epwe üföüf.” (Ewe üf mi pwechepwech iei än ekewe chon pin föför mi pwüng.)

9 Mürin ewe chon läng a üreniei, “Kopwe makkeetiu ekei kapas: Ra feiöch chokewe mi kö ngeni kametipen apwüpwülüen ewe Lam.” Iwe, ewe chon läng a pwal apasa, “Ikkei ekewe kapas mi let seni Kot.” ✡ Mat 22.2-3 10 Iwe, üa chapetiu arun pechen ewe chon läng pwe üpwe fel ngeni, nge i a üreniei, “Kosap föri iei usun! Ngang eman chiechiom chon angang me chiechien pwiüm kewe, chokewe meinisin mi kamwöchünük won ewe let Jesus a pwärätä. Kopwe fel ngeni Kot!”

Pun ewe let Jesus a pwärätä, iei met a amwelielia ekewe soufos.

11 Mürin üa küna pwe läng a suk, iwe, a wor eman oris mi pwechepwech. Ewe chon wawa a iteni Allükülük me Let, a eäni kapüng fän wenechar o maun fän pwüng. ✡ Is 11.1; Kölf 96.13; Ais 11.4 12 Mesan kana ra usun chök ngetengeten ekkei, nge a mwärämwär chomong mwärämwär won möküran. A wor eu it a mak won inisin, esap wor eman a silei pwe i chök. ✡ Tan 10.6 13 Üfan we a üföüf a kula ren cha. Itan “Ewe Kapasen Kot!” 14 Iwe, ekewe mwichen sounfiu seni läng ra tapwela mürin, ra wawa oris mi pwechepwech, ra pwal üföüf üf mi limöch o pwechepwech. 15 Seni lon awan a itiwu efoch ketilas mi ken, pwe epwe nöünöü le akufu chon ekewe mwü. Epwe nemeniir ren efoch wokomächä, epwe puri ekewe uän wain lon ewe lenien üchüch, wewen ei, än Kot, ewe mi Unusen Manaman, lingeringer mi fokun afeiengau. ✡ Kölf 2.9; Ais 63.3; Sow 3.13; Pwär 14.20 16 Won üfan pwal won wilan a mak ewe it, “Ewe King mi tekia seni ekewe king meinisin, me ewe Samol mi lap seni ekewe samol meinisin.”

17 Mürin üa küna eman chon läng a ütä won akkar. A kökkö fän mwelian mi leüömong ngeni ekewe machang meinisin mi äkkäsfeil fän läng, “Oupwe feito o chufengen fän iten än Kot we kametip mi watte. 18 Oupwe feito o ochoch fituken ekewe king, fituken ekewe meilapen sounfiu me fituken ekewe sounfiu, fituken ekewe oris me ekewe chon wäniir, fituken ekewe aramas meinisin: fituken ekewe amanau me ekewe chon ngas, fituken ekewe aramas tekia me ekewe aramas kis.” ✡ Is 39.17-20

19 Mürin üa küna ewe manmwacho me ekewe kingen fanüfan pwal nöür kewe mwichen sounfiu, ra chufengen pwe repwe maun ngeni ewe eman mi wawa ewe oris, pwal ngeni nöün mwichen sounfiu. 20 Iwe, ewe manmwacho a kuf o oola fitifengen me ewe soufos chofona, ewe mi afisätä manaman me mwen mesan. Ren ekei manaman a atupu chokewe mi eäni asisilen ewe manmwacho me chokewe mi fel ngeni uluulun we. Ewe manmwacho me ewe soufos chofona ra koturmanauolong lon ewe nomun ekkei a küü ren primston. ✡ Pwär 13.1-18 21 Nge nöür kewe sounfiu ra ninnila ren ewe ketilas mi itiwu seni lon awen ewe eman mi wawa ewe oris. Iwe, ekewe machang meinisin ra ocheela fituker tori ra mötüla.