1 Õꞌacʉ̃ masãrẽ buꞌiri daꞌréca beꞌro Moisére aꞌtiro nicʉ niwĩ:

—Aꞌtore wijayá. Masã mʉꞌʉ Egiptopʉ miiwijaꞌcãrã meꞌrã waꞌagʉsaꞌa. Yʉꞌʉ Abrahãrẽ, Isaare, Jacore “Oꞌogʉti” níca diꞌtapʉ waꞌaya. Ti diꞌtare na pãrãmerãrẽ “Oꞌogʉti” nitojawʉ. 2 Yʉꞌʉre werecoꞌtegʉre mʉsã dʉporo oꞌógʉti. Yʉꞌʉ ti diꞌtapʉ nirã́ cananeo masã, amorreo masã, hitita masã, ferezeo masã, heveo masã, jebuseo masãrẽ cõꞌawĩrõgʉ̃ti. 3 Cabra õpẽcõ, mumiaco pajiro aco oꞌmabʉroro weronojõ nirĩ diꞌtapʉre waꞌarã weeꞌe. Yʉꞌʉ peꞌe mʉsã meꞌrã waꞌasome. Mʉsã yʉꞌrʉnʉꞌcãsepijarã niꞌi. Yʉꞌʉ waꞌagʉ pũrĩcã mʉsã ñaꞌarõ weecã, buꞌiri daꞌre bajuriodijobosaꞌa, nicʉ niwĩ Õꞌacʉ̃.

4 Masã te bʉjawetise quetire tʉꞌorã, dʉjasewãꞌarã weronojõ pũrõ bʉjaweticãrã niwã. Na ne niꞌcʉ̃pʉta bʉsa, oꞌmeperi yosaticãrã niwã. 5 Õꞌacʉ̃ Moisére aꞌtiro wereyutojacʉ niwĩ:

—Israe curuacjãrãrẽ aꞌtiro ni wereya: “Mʉsã yʉꞌrʉnʉꞌcãsepijarã niꞌi. Mʉsã waꞌteropʉre mʉsã meꞌrã yʉꞌʉ cãꞌrõ baꞌpatiquejogʉ, mʉsãrẽ buꞌiri daꞌre bajuriobosaꞌa. Tojo weerã mʉsã suꞌti añusere, mʉsã bʉsasere, tojo nicã yosasere tuweemiicãꞌña. Mʉsã tere tuweemiica beꞌro yʉꞌʉ mʉsãrẽ weeatjere wãcũgʉ̃saꞌa”, ni wereya, nicʉ niwĩ Õꞌacʉ̃.

6 Tojo weerã Israe curuacjãrã Horeb wãmeticjʉ ʉ̃rʉ̃gʉ̃pʉ wijáca beꞌro bʉsanemoti, oꞌmeperi yosanemoticãrã niwã.

7 Moisé Õꞌacʉ̃ suꞌti caseri meꞌrã wééca wiꞌiacãrẽ mia, masã na nirṍ yoacureropʉ cũucʉ niwĩ. Ti wiꞌiacãrẽ “Õꞌacʉ̃ meꞌrã bocaejari wiꞌi niꞌi”, nicʉ niwĩ. Noꞌo niꞌcʉ̃ Õꞌacʉ̃rẽ cʉ̃ weeatjere sẽrĩtiñaꞌsĩꞌrĩgʉ̃nojõ topʉ waꞌacʉ niwĩ. Ti wiꞌiacã na masã nirṍ yʉꞌrʉro nicaro niwʉ̃. 8 Moisé ti wiꞌiacãpʉ waꞌacã ĩꞌarã, masã nipeꞌtirã na ye wiꞌseri sope pʉꞌtopʉ nuꞌcũcãrã niwã. Téé ti wiꞌipʉ sãjãcãpʉ cʉ̃rẽ ĩꞌasirutuduꞌucãrã niwã. 9 Moisé ti wiꞌipʉ sãjãcãta, oꞌmepõꞌrã dijati, ti wiꞌi sãjãrĩ sopepʉ ejanʉꞌcãcaro niwʉ̃. Õꞌacʉ̃ Moisé meꞌrã ucũrĩ cura tojo tojanʉꞌcãcaro niwʉ̃. 10 Masã oꞌmepõꞌrã ti wiꞌi sopepʉ ejanʉꞌcãcã ĩꞌarã, nipeꞌtirã na ye wiꞌseri sope pʉꞌto paamuꞌrĩqueꞌacãrã niwã. Õꞌacʉ̃rẽ eꞌcatipeorã, tojo weecãrã niwã.

11 Õꞌacʉ̃ Moisé meꞌrã aꞌmerĩ ĩꞌapõtẽo, niꞌcʉ̃, cʉ̃ meꞌrãcjʉ̃rẽ ucũgʉ̃ weronojõ ucũcãrã niwã. Na ucṹca beꞌro Moisé masã tiropʉre dajatojaacʉ niwĩ. Cʉ̃rẽ weetamucoꞌtegʉ maꞌmʉ Josué, Nun macʉ̃ peꞌe pũrĩcã ti wiꞌiacã poꞌpeapʉ toja, ninuꞌcũcãꞌcʉ niwĩ.

12 Moisé Õꞌacʉ̃rẽ aꞌtiro nicʉ niwĩ:

—Mʉꞌʉ yʉꞌʉre “Ãꞌrã masãrẽ sʉꞌori miaña”, niapʉ. Tojo nimigʉ̃, yʉꞌʉ meꞌrã waꞌacjʉre weretiapʉ. Tojo nicã “Mʉꞌʉrẽ añurõ masĩꞌi. Mʉꞌʉ weesere ĩꞌagʉ̃, eꞌcatiꞌi”, niapʉ. 13 Diacjʉ̃ta yʉꞌʉ meꞌrã eꞌcatigʉ pũrĩcã, mʉꞌʉ weeatjere yʉꞌʉre wereya. Mʉꞌʉ tojo weecã, mʉꞌʉrẽ masĩnemogʉ̃saꞌa. Tojo nicã, mʉꞌʉ tʉꞌsasere weenuꞌcũgʉ̃saꞌa. Wãcũña. Ãꞌrã masã, mʉꞌʉ yarã nima, nicʉ niwĩ.

14 Moisé tojo nicã tʉꞌogʉ, Õꞌacʉ̃ cʉ̃rẽ nicʉ niwĩ:

—Yʉꞌʉ basuta mʉsãrẽ baꞌpatigʉti. Baꞌpati, mʉꞌʉrẽ soose oꞌogʉti, nicʉ niwĩ.

15 Moisé peꞌe cʉ̃rẽ yʉꞌticʉ niwĩ:

—Mʉꞌʉ basu ʉ̃sãrẽ sʉꞌori waꞌatigʉ pũrĩcã, ʉ̃sãrẽ aꞌtore wijacã weeticãꞌña. 16 Mʉꞌʉ ʉ̃sã meꞌrã baꞌpatiwãꞌcãticãma, apeye diꞌtacjãrã masã “Õꞌacʉ̃ Moisé meꞌrã, Israe curuacjãrã meꞌrã eꞌcatimi”, ni masĩsome. Ʉ̃sã meꞌrã waꞌacã pũrĩcãrẽ, “Õꞌacʉ̃ Moisé, Israe curuacjãrã meꞌrã diaꞌcʉ̃ nimi”, ni masĩrãsama, nicʉ niwĩ Moisé.

17 Õꞌacʉ̃ Moisére apaturi ucũapocʉ niwĩ:

—Mʉꞌʉrẽ añurõ masĩꞌi. Mʉꞌʉ meꞌrã eꞌcatiꞌi. Tojo weegʉ mʉꞌʉ sẽrĩꞌcaronojõta weegʉsaꞌa, nicʉ niwĩ Õꞌacʉ̃.

18 Cʉ̃ tojo nicã tʉꞌogʉ, Moisé aꞌtiro ni sẽrĩnemocʉ niwĩ:

—Mʉꞌʉ asistesere yʉꞌʉre ĩꞌoña.

19 Õꞌacʉ̃ cʉ̃rẽ yʉꞌticʉ niwĩ:

—Nipeꞌtise yʉꞌʉ asistesere mʉꞌʉ dʉporo yʉꞌrʉacã weegʉti. Tojo yʉꞌrʉacã, nipeꞌtise yʉꞌʉ añubutiase nisere ĩꞌagʉ̃saꞌa. Tojo nicã mʉꞌʉ ĩꞌorõpʉ yʉꞌʉ wãmerẽ weregʉti. Noꞌo yʉꞌʉ pajañaꞌsĩꞌrĩgʉ̃rẽ pajañaꞌgʉ̃ti. 20 Tojo nimicã, ya diapoama ne ĩꞌasome. Ne niꞌcʉ̃ yʉꞌʉre ĩꞌáca beꞌro catisome majã.

21 Õꞌacʉ̃ apeye quẽꞌrãrẽ nicʉ niwĩ:

—Aꞌto yʉꞌʉ tiro ʉ̃tãgãpʉ nuꞌcũña. 22-23 Yʉꞌʉ asistese meꞌrã yʉꞌrʉagʉ, niꞌcã cope tigapʉ nirĩ copepʉ mʉꞌʉrẽ cũugʉ̃ti. Yʉꞌʉre ĩꞌarĩ nígʉ̃, ya omocã meꞌrã mʉꞌʉ ya diapoare cãꞌmotaꞌagʉti. Téé yʉꞌʉ yʉꞌrʉagʉpʉ cãꞌmotaꞌatʉogʉti. Yʉꞌʉ sẽꞌema waroma ĩꞌagʉ̃saꞌa, ĩꞌagʉ̃ peꞌe. Yʉꞌʉ diapoa peꞌema, ne ĩꞌanoꞌña marĩrõsaꞌa, nicʉ niwĩ Õꞌacʉ̃.