7
Únyǝ Israel Eto Betidi Kɔkpi Lofa Betidi Fosi Ana Betidi Ena.
1 Lǝ nyamfo eto kamaa, ńnyǝ Onanto eto batɔnkpe ena bǝtsyuǝ ba nyǝ lǝ kawunsiǝ eto esi ana nyamǝ ba lɛkɔbe kefiebi ǝna kamǝ banlɛ, beti kefiebi kamǝ bǝ kayɛ bɔsɔ lǝ kasɔ, lǝ lekpo nye lǝ eyi ǝsuǝ.
2 Nya minsi minyǝ Onanto eto ɔtɔnkpe bamba wǝ lɛbɔ utsyi lǝ kofekatokɔ ɔnlɛ kato bobe, nya Onanto wǝ nsi nkpǝ eto lekpotsyǝsa ntǝkǝ lǝ wǝ. Onanto ditǝ ǝsuǝale nkǝ beyifo lesafimfi kasɔ ku lekpo, 3 nya ɔ́tɛyi nkǝ, “Bienyifo lesafimfi kasɔ, lekpo nye eyi saa, isu eyo lefe nǝ buufi sitǝ eto etinsa butsyǝ Onanto eto beyifoyifo eto nto lekpo.” 4 Nya bátɛyi mɛ bǝnkǝ betidi ba béfi Onanto eto sitǝ eto etinsa bǝtsyǝ lekpo lǝ mǝ nto eto leklabi ebuyifo betidi akpi kolofa awosi ana ana (144,000). Betidi bamfo étsyi Israel eto lefosi mfo nuǝ kafo.
5-8 Betidi lefosi akpi ǝnuǝ étsyi Israel eto kafo ǝsuǝ. Mǝ ni
Yuda, Ruben, Gad, Aser, Naftali,
Manase, Simeon, Lewi, Isakar,
Sebulon, Yosef ku Benyamin.
9 Lǝ nyamfo eto kamaa, ńyǝ sitiditu kplɛ ditsyuǝ nǝ eto betidi kuutsyuǝ lembofo bokla! Betsyi kasɔ saa, ese saa, bele tɛyi tɛyi saa, betidi betidi saa eto okle, nya bǝnyǝ lǝ lekankpomɛ nǝmǝ ku Lesamubi nǝmǝ eto ǝnǝmi, nya bankpe awuflubia, nya banlɛ bekabe lǝ ani. 10 Nya báfa ku ɔkɔɛ bembembe bátɛyi bǝnkǝ,
“Bofokǝtǝ etsyi Boanto Onanto
wǝ nsi lǝ lekankpomɛ ǝsuǝ
ku Lesamubi nǝmǝ ɔflɔ!”
11 Onanto eto batɔnkpe kenke bǝńyǝ batsyilama lekankpomɛ nǝmǝ ku beninǝ bamǝ ku asa ana nyamǝ, nya batɔnkpe bǝmǝ difusǝ ǝnǝmii kasɔ lǝ lekankpomɛ nǝmǝ eto ǝnǝmi, besumu Onanto, 12 katɛyi nkǝ,
“Ibǝ itǝ! Atɛsǝ, diyǝnde, kobe,
lɛninsɔ, dibu, ǝsuǝale ku kakplɛkɔ
lǝ idi bo Onanto ǝmǝ eto ale
idu manlo isu manlo!
Ibǝ itǝ!”
13 Beninǝ bamǝ eto ɔni átɔ mɛ nkǝ, “Bawoe ni betidi ba nkpe awu flubia kɛntsyɛ mfo? Nya se bétsyi?”
14 Mfó nya mintɛyi mǝ miǝ, “Bonamute, minnyi. Fǝ nyi.”
Mfo nya ɔ́tɛyi mɛ nkǝ, “Mba mfó ni betidi ba dínyǝ kanyi kekleke fɛ bábɔ báfe. Bǝflǝ mǝ awu éle futufutu lǝ Lesamubi nǝmǝ eto kɔtɔ ǝsuǝ. 15 Nyasoo,
bǝǝńyǝ lǝ Onanto eto lekakpomɛ nǝmǝ eto ǝnǝmi
kesumu wǝ ketsye ku kakɔmi lǝ wǝ Disumuyo.
Itsyise nwǝ nsi lǝ lekankpomɛ nǝmǝ ǝsuǝ ebota mǝ disi lǝ wǝ ǝnǝmi.
16 Kukpɛnsɛ nye utukuɛ
esi ǝmbɔlɛ mǝ kulefe.
Nya kofe nye utefofo saa ensiembufi mǝ.
17 Itsyise Lesamubi nǝ nkpe lǝ lekankpomɛ nǝmǝ eto ntinti mfóo, ebɔlɛ mǝ ola, obe mǝ.
Wookpa mǝ ɔyɛnko usuko kaka nkpǝ eto ntu bo laayifǝ lefe saa nkpe.
Nya Onanto tsya lɔɔsi mǝ binǝntu saa lǝ ǝnǝmi.”