1 Nya mínyǝ se Lesamubi nǝmǝ dífǝ sitǝ eto etinsa tutɛ nyamǝ ɔ́sini kukue komǝ nya mínnɔ se asa ana nnya nsi nkpǝ eto ani léto ɔkɔɛ íkumi fe ofamfa seka ɛtɛyi nkǝ, “Bǝ!” 2 Mbe, nya mínyǝ ɔtɔmli flubia utsyuǝ. Nwǝ nsi lǝ wǝ lɛ sifie lǝ kɔni nya bǝtǝ wǝ lekankpakpa ditsyuǝ. Úsiǝ lǝ wǝ nya ɔ́bɔ fe omamanyǝ wǝ lǝǝtǝkǝ kato ntɔ kato kǝtǝkǝkɔ.

3 Nnya kamaa, Lesamubi nǝmǝ ǝfǝ lɛsini sitǝ eto etinsa eto etinsa nuǝfǝ nyamǝ nya mínnɔ asa ana nnya nsi nkpǝ eto unuǝfǝ lɛtɛyi nkǝ, “Bǝ!” 4 Nya ɔtɔmini bamba wǝ lɛsɛ lɛbɔ úbǝ. Bǝtǝ nwǝ lǝǝsiǝ wǝ ǝsuǝale bǝ unǝ lema oboko kawunsiǝ eto betidi lǝ balo mǝ bǝtsyuǝ. Bǝtǝ wǝ lesiabi nyɛ nuǝ nǝ lɛmɔ.

5 Nyamfo eto kamaa, Lesamubi nǝmǝ ǝfǝ sitǝ eto etinsa tsyǝfǝ nyamǝ nti lǝ wǝ kukue komǝ eto kɛnyɛ. Mfó mínɔ se asa ana nnya nsi nkpǝ eto ǝtsyǝfǝ lɛtɛyi nkǝ, “Bǝ!” Nya se mímbee, nnyǝ ɔtɔmini naa bamba nya nwǝ nsi lǝ wǝ lɛ nseni lǝ kɔni. 6 Nnɔ ɔkɔɛ utsyuǝ wǝ nte fe bɔbɔ ɔ́bɔ utsyi lǝ asa nnya nsi nkpǝ ɔflɔ wǝ lɛtɛyi nkǝ, “Kamɔ eto ɔkpɛ tɔ itǝ diyi lɔni eto kayofofo nya antabi eto ɛkpɛ itsyǝ ńyǝ itǝ diyi eto kayofofo. Fɛɛ mambiasǝ nnuǝbi ku wain eto eyi nnya ńyǝ mfó!”

7 Nya kama nnya Lesamubi nǝmǝ dífǝ sitǝ eto etinsa nale. Nya mínɔ asa nnya nsi nkpǝ eto anale didi etiki ɛtɛyi nkǝ, “Bǝ!” 8 Lǝ mbe mfó, nnyǝ miǝ ɔtɔmini wǝ nte fe ntɔ eto ditsyǝbi nńyǝ. Baakpo nwǝ lǝǝsiǝ lǝ wǝ bǝ ukpe. Nya utidi bamba tsya tǝkǝko wǝ kama baakpo ɔkɔmǝ. Bǝtǝ mǝ ǝsuǝale bǝ balo kawunsiǝ eto betidi eto lekpa nale, ɛyɛ lǝ lema, kukpɛnsɛ, bufi ku ɛyɛ lǝ bebutubuki ba lǝǝmuǝ betidi ǝsuǝ.

9 Se Lesamubi nǝmǝ dífǝ sitǝ eto etinsa nɔnde, ńyǝ awɔnɔ ǝtsyuǝ lǝ kedikǝtǝkɔ eto lǝba nǝmǝ kalɔ, mba bálo eto awɔnɔ, se bǝbǝ Onanto eto leba nǝmǝ kalɔ, mǝ ni mba bálo se bábé Onanto eto Ditiki Sɛɛ nǝmǝ letsya nya bédi ni ɔnukualɛ eso. 10 Awɔnɔ nyamǝ áfã bembebe ɛtɛyi nkǝ, “Bonamute, eni ǝsuǝalenyǝ kenke, ɔkɛnkɛnyǝ ku ɔnukualɛnyǝ. Nte lefe nǝ eto lefe ko, fookponko kawunsiǝ eto betidi lekpo, ǝnǝ mba lélo bo koto?” 11 Bǝtǝ mǝ utsyuǝ saa awu flubia kɛntsyɛ ókpe, nya bátɛyi mǝ bǝnkǝ besi babe mǝ kusu sɛkɛ isu ese lefe nǝ eto lefe bálo mǝ beyifotsyuǝ ku mǝ bayimi eto sitiditu kenke balosǝ fe kase bálo mǝ tsya.

12 Lǝ nyamfo eto kamaa, nnyǝ se Lesamubi nǝmǝ difǝ sitǝ eto etinsa lǝ lekpa kuande ǝsuǝ, kawunsiǝ kenke étinkǝ kekleke, nya kofe lɛyɛ bofa nya lesa saa lena sũũ fe kafia na, nya kofande lɛsɛ hǝǝ fe kɔtɔ. 13 Befandebi, álo bitsyi kato bibǝ bɛsɔ kasɔ fe kase eyibibi mambemambe laalo kakpo lǝ kasɔ lǝ ufiebi asɔ kekleke. 14 Difule ánya lamfolamfo fe kase bǝǝkǝnǝ kukue seka nya kɔtini saa ku kasɔ ka ntu letsyilama lɛnyi lǝ nyǝnkɔ.

15 Mfó nya kawunsiǝ eto baka, Aba bamamanyǝ ninǝ, batabinyǝ ku bǝsuǝalenyǝ, ku betidi ba kenke, ndomufɔ ku mba nsi lǝ mǝ ǝsuǝ ǝsuǝ, difi mǝ ǝsuǝ bákula lǝ ǝbiǝku ku abanse kalɔ ku lǝ atini ǝsuǝ. 16 Báfa bákpadi atini ku abanse bǝ, “Beba bekpo bo lǝ ǝsuǝ biti bo bekpe itsyi lǝ nwǝ nsi lǝ lekankpomɛ eto ǝnǝmi ku lǝ Lesamubi nǝmǝ eto lɛblɔfi eto ǝnǝmi. 17 Itsyise Onanto ku Lesamubi bamǝ eto lǝblɔfi eto diyi nǝmǝ eboyo! Nya owoe loofo bunyǝ lǝ nnya ǝnǝmi?”