7
Stepanus isavia yes Yuda gabuazi: Yes tizorzoor Maaron aliiŋa ta muuŋ ve ilam
1 Ra daaba to watooŋrau ighason Stepanus ighe: “Laak, saveeŋ tau tisavia ne, ene onoon?”
Muuŋ, Maaron ivot to Abaram izi taan sirivu to Mesopotamia
“Yam tamaŋŋa ve toŋvetaz tsiau, alooŋ saveeŋ tsiau tane ve agham ŋgar pani poi. Muuŋ kat, saawe tau timbuun Abaram ila ileep izi nugh Aran soone, ve ilepleep izi taan sirivu to Mesopotamia na, Maaron toit tau eeza tiina pa tapiri ve poia tooni na ivot tooni, * Gnp 11:31
3 ve isaav pani ighe:
‘Uburig, upul taan tsio tomania ziiri waaro tsio, ve ula pa taan tau yau naghe natotoia payo na.’ * Gnp 12:1
4 “Tauvene Abaram ipul Mesopotamia tau taan to yes Kaldia na, ve ila ivot nugh Aran, ve ighur niia to lepoogh ta sewe. Taama Tera imaat, ve murei ra, Maaron ipaburigin Abaram muul gha ilaagh ilam ivot taan tau aazne iit talepleep pani ne. * Gnp 12:4+
5 Maaron igham taan rigta imin Abaram le motot ne mako. Eemon saawe tau Abaram le naatu eta soone, Maaron imbu saveeŋ tomania ighe i pale igham taan tane pani ve paaghu tooni tau pale tivot murei na paam. Leso imin lezi motot. * Gnp 12:7, 17:8; Hib 11:13
6 Ve Maaron ipaghazoŋai Abaram pa gabua siriv tau pale ivot murei na ighe:
‘Paaghu tsio pale tila tileep timin loom izi taan ite. Ve taan tawe tamtamona pale tigham zi timin besooŋa sorok, ve tigham saghatin zi irau ndaman ndiŋndiŋ paaŋ (400). * Gnp 15:13+; Igham 12:40
7 Eemon murei, yau aat naghur atuya iŋarui taan tawe tamtamona pa ŋgar toozi saghati, ve nagham paaghu tsio tipul taan tawe, ve timuul tilam. Leso tisuŋ ve tibees payau izi ta sene.’ * Igham 3:12
8 “Ra Maaron isaav pa Abaram ighe ŋgar to ravuuŋ zitamoot warozi pale imin ilaal pa saveeŋ mbuaaŋ to yesuru. Tauvene saawe tau Abaram azaawa ipoop Isak, ve mbooŋi imin liim ve tol, ra taama irav waaro. Murei ra, Isak yesuru azaawa tipoop Yakop, ve Yakop tomania azauŋa tipoop natuzŋa saŋavul ve ru tau iit Israela tavot ila toozi na. * Gnp 17:10, 35:18
Maaron ileep tomania Yosep izi Isip
9 “Yakop natŋa tighita tamazi loolo pa tazizi Yosep kat, le ireu lolozi. Tauta tigholia ila to tamtamon siriv, ve anazi tighamu ila Isip, ve imin besooŋa sorok izi ta sewe. Eemon Maaron ileep tomania, * Gnp 39:2, 21+
10 ve igham mulini pa pataŋani tooni naol isov. Saawe tau tigham Yosep ila iyooz ila kinik to Isip naagho, Maaron igham kinik loolo pani, ve ighilaalo ighe i le ŋgar tiina. Tauta ighuru to igham pooz pa ruum tooni tomania gabua tooni naol isov, ve taan dodoli to Isip paam. * Gnp 41:37+
11 “Malau mako ve pitool tiina ivot irau taan isov to Isip ve Kanaan, ve igham zi tileep saghat kat. Iit Israela timbuunŋa paam, tiil lezi aniiŋ le mako. * Gnp 41:54, 42:1+
12 Eemon saawe tau Yakop ilooŋ tighe aniiŋ wit ighengheen izi Isip, i imbaaŋ natŋa tila tighol lezi aniiŋ, ve timuul tilam pa tamazi. Ene laghooŋ tau tighamu imin maata. 13 Tilepleep le aniiŋ toozi isov, ra tizila Isip muul imin pai ru. Saawe tana, Yosep ivotia tauu pa tooghŋa ve taazi. Ve kinik to Isip paam ilooŋ tighe, Yosep ziiri waaro tooni siriv ta tilam tilepleep. * Gnp 42:1, 45:1+
14 Ra Yosep imbaaŋ ila pa taama Yakop ighe yesŋa tamtamon tooni tisov tiyauyau, ve tizilam tooni. Tamtamon tau tiburig gha tizila Isip na, yes irau tamoot tol saŋavul ve liim (75). * Gnp 45:9, 46:26+
15 Tauvene Yakop tomania tamtamon tooni tizila Isip, ve yesŋa natŋa tisov timataar izi ta sewe. * Gnp 46:1, 49:33
16 Eemon titavi zi izi Isip mako. Tigham patazi, ve timuul tila pa nugh Sekem, ra tighur zi tiloŋ tila maet puura to Amor natŋa tau Abaram igholi pa maet silva siriv na. * Gnp 23:3, 33:18, 50:7+
Maaron ileep tomania Mose izi Isip ve Midian
17 “Saveeŋ tau Maaron imbua tomania Abaram na, saawe ilam igharau pa anooŋa ivot. Ve saawe tana, timbuunŋa tau tileep izi Isip na, timasa timin eval le eval kat. * Igham 1:7
18 Ra kinik paaghu aana igham pooz pa Isip. Kinik tawe ilooŋ Yosep vaaru pa uraat tooni rigta mako. 19 I ivatombanoi timbuunŋa, ve igham saghatin zi kat. Ve isaav ariaaŋ pazi ighe natuzŋa paghpaaghu tau ŋgarig gha tipoop zi na, yes aat tipul zi tileplez. Leso timatmaat. * Igham 1:9+
20 “Saawe tana, Mose tiina ipoopa. Maaron ighita i paghuuna kat ve loolo pani. Tiina gha taama tigham payamyam pani izi ruum toozi irau kaiyo tol, * Igham 2:2
21 le ŋeer marani imin olman rig ve irau tiŋgooza muul mako. Ra tighamu tila ve tipuli izi yaa Nil ziige. Eemon kinik natliva ilaagh ila le ighita. Tauta ighamu imin le, ve iŋgini imin i tauu naatu. 22 Mose itum le imin olman, ve tipaghazoŋaini pa ŋgar naol isov to yes Isipa. I ŋeer ariaaŋa ee. Ve saveeŋ tooni paam, toman tapiri.
23 “I ilepleep le ndaman tooni irau tamoot ru (40), ra loolo ipaburigini ighe ila igig yes Israela tau siŋ tooni na. * Igham 2:11+; Hib 11:24+
24 Eemon saawe tau ila ivot toozi, i ighita Isip ee igham saghatin ŋeer ee to Israel. Tauvene ilaan ila ivool to ŋeer tawe, ve irav Isip tamazi tawe gha imaat imin yatuuŋ sosor tooni. 25 Mose maata iŋgal ighe tamtamon tooni Israel aat tighilaal tighe Maaron ighuru to igham mulin zi pa pataŋani toozi. Eemon ŋgar toozi ivot pa gabua tana soone.
26 “Mboŋ le nughizau, ra Mose imuul ila le ighita Israela ru anazi tiparav. Tauvene itoova to irav motin malmal ve ilup zi. Ve isaav pazi ighe: ‘Wai, yamru toŋvetaz! Avaghamun gham pasaa?’
27 “Eemon ŋeer tau ipaburigin malmal na, iburig gha isipiir Mose ighau, ve isaav pani ighe: ‘Ai, yo sei ighur ghom ighe umin ŋginiiŋ payei, ta ughe ugharaat saveeŋ tsiei? 28 Mindai, yo ughe urav ghau namaat imin Isip tamazi tau noor uravu imaat na?’ 29 Mose ilooŋ saveeŋ tane, ve iburig gha ighau ila ivot taan sirivu to yes Midiana. I ileep imin loom ta sewe le ivai, ve yesuru azaawa tipoop natuzŋa zitamoot ru.
30 “Ndaman tamoot ru (40) paam ilam ila, ra aŋela ee ila ivot tooni izi nugh ŋginaaŋa tau igheen igharau loloz Sinai na. Ivot pani imin yav tau ighanghan izala ai marani ee.
31 Mose maata ila ighita gabua tana, le irur ve igham ŋgar naol. Tauvene ila igharau ai tawe ighe ighit poghania. Eemon ilooŋ Ŋeer Tiina aliiŋa ivot ila yav tawe ighe:
32 ‘Yau Maaron to timbumŋa. Yau Maaron to Abaram, Isak, ve Yakop.’ * Igham 3:6
Mose ilooŋ saveeŋ tane, le irur ve iŋgooz naagho. Pasaa, iroi pa ghitooŋ Maaron.
33 “Maaron isaav pani muul ighe:
‘Upas zuzuuŋa to aghem izi. Pa taan tau uyozyooz ila ne, ene patabuyaaŋ. 34 Ulooŋ. Tamtamon tsiau Israel tau tileep Isip we, yau naghita pataŋani toozi wa. Yes Isipa tighamgham saghatin zi, le matazi siŋ izaa ve titaŋ tiina. Eemon taŋiiz toozi, yau nalooŋa wa. Tauta nazilam to napas zi tivot pa pataŋani toozi tawe. Aazne, yau naghe nambaaŋ ghom umuul ula pa Isip. Tauvene uburig ve ula.’ * Igham 3:5+
Saawe tau yes Israela tileep izi nugh ŋginaaŋa, tizorzoor Maaron aliiŋa
35 “Aghita. Mose tau muuŋ tizori ve tighe: ‘Ai, sei ighur ghom umin ŋginiiŋ to ugabiiz ghei ve ugharaat saveeŋ tsiei?’ Ŋeer eemon tana, ta Maaron imbaaŋ aŋela ila ivot tooni imin yav tau ighan izala ai marani na. Ve ighuru to iŋgin yes Israela, ve ipas zi tivot pa pataŋani toozi. 36 Ve i ta igherev zi gha tipul taan to yes Isipa, ve igham gabua ŋgeretazi tintiina imin ilaal pazi izi Isip, Te Siŋsiŋai, ve izi nugh ŋginaaŋa paam irau ndaman tamoot ru (40). * Igham 7:11, 14:17; Mbo 105:27
37 Mose tane, tauta isaav pa yes Israela ighe:
‘Maaron pale ipaburigin tamtamon tsiam eta, ve ighuru imin propet, leso ivotia Maaron aliiŋa payam imin yau.’ * Lo 18:15; Mbaŋ 3:22
38 “Mose tomania eval tiina to Israel, ta timin lupuuŋ to Maaron izi nugh ŋginaaŋa. I ta isavsaav tomania aŋela izi loloz Sinai, ve igham saveeŋ maata yaryaare ila to Maaron, ve ipaesia pa timbuunŋa. Saveeŋ tawe, tauta iit Israela takiskisi gha ilam aazne. * Igham 19:1–20:17
39 “Eemon timbuunŋa tighur murizi pani ve lolozi pa loŋaaŋ saveeŋ tooni mako. Ve tipasawal muul ila pa lepoogh toozi tau muuŋ tileep izi Isip na. 40 Tauvene tiburig ve tisaav pa Aron tighe:
‘Ugharaat leen maaron siriv! Leso timuuŋ pait ve tiŋgin ghiit. Pa ŋeer tau igham gherev pait gha tapul taan to Isip ve talam na, yei nikankaan pani. Aat gabua eta ivot pani wa.’ * Igham 32:1, 32:23
41 “Tauta tigharaat maaron karom ee tau taghita imin makau naatu, ve tigham watooŋrau pani. Tauvene gabua tau tauzi tigharaata pa nimazi, yes tipaiti toman tintinizi. * Mbo 106:19
42 Tauvene murei, Maaron ighur muuri pazi, ve ipul zi titaghon tauzi ŋgar toozi. Tauta tibees pa gabua tau tigheen ila sambam saamba imin aaz, kaiyo, ve pitum siriv. Saveeŋa igheen ila rau to yes propet. Ighe:
‘O yam Israela, ndaman tamoot ru (40) tau alaghlaagh izi nugh ŋginaaŋa, yam aghamgham watooŋrau pa makau ve sipsip. Watooŋrau naol tana, agham eta payau? Mako kat! * Mbo 81:12; Yer 19:13
43 Ve saawe tana, yam abaad balbaal to Molek
tomania pitum Repan anunu tau maaron karom tsiam na, ve alaghlaagh tomania. † Molek ve Repan, ene pitum tintiina ru tau muuŋ tamtamon tighur zi timin maaron pazi. Molek, ene pitum Birawe. Ve Repan, ene pitum tau pughuun tiwaato tighe ‘Saturn’.
Maaron karomŋa tana, taumim agharaat zi to aput aghemim pazi ve apakur zi.
Tauvene yau aat nareu gham, ve naziir gham malmalimim ala aleep izi Babilon ziige ite.’ * Amos 5:26-27
Muuŋ, yes Israela lezi rumei tauu mako
44 “Saawe tau timbuunŋa tilaghlaagh izi nugh ŋginaaŋa, yes tilaghlaagh tomania balbaal patabuyaaŋ. Balbaal tawe, saveeŋ mbuaaŋ toozi tomania Maaron igheen iloŋ ila. ‡ Muuŋ, Maaron isaav pa Mose gha ighur maet babaŋazi ru iloŋ ila bokis to saveeŋ mbuaaŋ tau igheen balbaal patabuyaaŋ loolo. Leso yes Israela matazi kisin saveeŋ mbuaaŋ toozi tomania Maaron. Ŋgara tauvene: Isaav ighe titaghon duduŋai tutuuŋ tawe, ene pale Maaron ileep tomani zi, ve yesŋa tivalupu zi timin eemon.
Saawe tau tirau balbaal tana, Maaron aavo iyaryaaŋ pa Mose ighe i aat itaghon duduŋai balbaal ŋgereeta tau ighita izala loloz Sinai na. * Igham 25:9, 40; Hib 8:5
45 Timbuunŋa tilaagh tomania balbaal tana ila ila le tighuru ivool to paaghu toozi. Ra anazi tilaagh tomania tila tila le tivot taan Kanaan. Saawe tana, Maaron ireu yes nugh nugh tau tileep izi Kanaan na tighawaar, ve Yosua igham yes Israela tiloŋ tilam tigham taan tane imin lezi. Balbaal patabuyaaŋ tana ighengheen le saawe to kinik David. * Yos 3:14, 18:1
46 David, Maaron loolo pani kat. Tauvene i ighason Maaron ighe iyok pani, o irau Maaron to Yakop le rumei duduuŋ. Leso imin niia to lepoogh. * 2Sam 7:1+; Mbo 132:1+
47 Eemon David irau rumei eta mako. Naatu Solomon ta irau rumei. * 1King 6:1+
48 “Ve Maaron Tiina Tau Iliiv Zimaronŋa Tisov na, i ileep iloŋ ila rumei eta tau tamtamon tirao pa nimazi ne mako. Pasaa, propet ee ivotia Maaron aliiŋa ighe: * Mbaŋ 17:24
49 ‘Sambam, ene yau niag to ghamuuŋ pooz.
Ve taan, ene nugh tau naghur agheg izala.
Tauvene ruum savaaŋa muul ta aghe arao payau?
Ve saa nugh muul ta aghe aghuru payau to naleep pani? * Is 66:1-2; Mt 5:34+
50 Mako. Pasaa, taug nagharaat gabua isov tana pa nimag.’ ”
Stepanus isaav ghazooŋa pa yes Yuda pa sosor toozi
51 Ra Stepanus isaav pa yes tau tipayooze pa savsaveeŋ na ighe: “Yam zeran to zoraaŋ saveeŋ. Ŋgar tsiam iyaryaaŋ kat imin yes tau tiwatagh Maaron mako! Ŋgar saghati tau igheen ila lolomim na, Maaron irav motini soone. Ve taliŋamim ivool kat. Saawe isov, yam azorzoor Avuvu Patabuyaaŋ ŋgar tooni, imin muuŋ timbumimŋa tighamghamu. * Igham 32:9; Lo 10:16; Is 63:10
52 Aghita. Muuŋ, timbumimŋa tipul propet eta ileep? Mako. Saawe isov, tighamgham saghatin zi. Ve yes tau muuŋ tivotia Maaron aliiŋa tighe i pale imbaaŋ Mesia ilam na, timbumimŋa tirav zi tisov timataar. Ve saawe tau ŋeer duduuŋa tawe tauu ilam, yam ataghon ŋgar raraate. Azi gha aghuru ila koiŋa nimazi, ve tiravu imaat. * Mt 23:31+; Lu 13:34; 1Tes 2:15
53 Onoon, tutuuŋ to Maaron tau aŋela timin eez pani gha izilam na, yam aghamu wa. Eemon ataghoni mako.” * Mbaŋ 7:38; Ga 3:19
Tirav Stepanus imaat
54 Tilooŋ Stepanus saveeŋ tooni tawe, le atezi yavyav kat, ve tiŋaaŋ maripazi pani tighe le tiravu imaat. 55 Eemon Stepanus, Avuvu Patabuyaaŋ ipavon katini, ve maata izala pa sambam le ighita Maaron mbonari, ve ighita Yesu iyozyooz ila Taama Maaron niima tapir. * Mk 16:19; Lu 22:69
56 Tauvene isaav pazi ighe: “Alooŋ. Yau naghita sambam ikaak, ve Tamtamon Naatu iyozyooz ila Maaron niima tapir!” * Mbo 110:1; Ro 8:34; Kol 3:1
57 Tilooŋ saveeŋ ziiri rig tane, le bobaaŋ tomania siriiŋ tiina izaa, ve tipoon taliŋazi, ve tilaan tiŋarui Stepanus tila, 58 gha tighamu, ve tisasaara ivot ila nugh tiina ziige, ra tiburig gha tiravu pa maet. Yes tau tipariaaŋ saveeŋ tighe Stepanus igham sosor na, tizuzuum nonoghiiŋa toozi to ŋgoaaŋ izi, ve tila tighur zi ila ŋeer paaghu ee aaghe puughu, eeza Saul. * Mbaŋ 22:20; Hib 11:37
59 Tiravrav Stepanus pa maet, ve i isuŋ ighe: “O Tiina Yesu, ugham anunug.” * Mbo 31:5; Lu 23:46
60 Ra aaghe daaba izi taan, ve isaav aliiŋa tiina ighe: “O Tiina, sosor tau tigham payau ne, uyatu sov. Ureua pazi.” Isaav tauvene, ve itap izi gha imaat. * Mt 5:44; Lu 23:34
*7:2: Saveeŋ to Stepanus maata ru. Ee, ene yes Yuda tigham ŋgar tiina kat pa taan toozi ve rumei toozi tau iyooz izi Yerusalem. Yes tighe nugh tawe, ene Maaron niia duduuŋ. Eemon Stepanus isaav tauvene: Maaron ileep nugh tawe mon mako. Nugh sindei tau tamtamon tooni tileep pani na, i ileep tomani zi. Ve saveeŋ tooni maata ite, ene vene: Muuŋ ve ilam, yes Yuda tizorzoor Maaron aliiŋa.
*7:5: Gnp 12:7, 17:8; Hib 11:13
*7:8: Gnp 17:10, 35:18
*7:11: Gnp 41:54, 42:1+
*7:13: Gnp 42:1, 45:1+
*7:14: Gnp 45:9, 46:26+
*7:15: Gnp 46:1, 49:33
*7:16: Gnp 23:3, 33:18, 50:7+
*7:23: Igham 2:11+; Hib 11:24+
*7:36: Igham 7:11, 14:17; Mbo 105:27
*7:40: Igham 32:1, 32:23
†7:43: Molek ve Repan, ene pitum tintiina ru tau muuŋ tamtamon tighur zi timin maaron pazi. Molek, ene pitum Birawe. Ve Repan, ene pitum tau pughuun tiwaato tighe ‘Saturn’.
*7:43: Amos 5:26-27
‡7:44: Muuŋ, Maaron isaav pa Mose gha ighur maet babaŋazi ru iloŋ ila bokis to saveeŋ mbuaaŋ tau igheen balbaal patabuyaaŋ loolo. Leso yes Israela matazi kisin saveeŋ mbuaaŋ toozi tomania Maaron. Ŋgara tauvene: Isaav ighe titaghon duduŋai tutuuŋ tawe, ene pale Maaron ileep tomani zi, ve yesŋa tivalupu zi timin eemon.
*7:44: Igham 25:9, 40; Hib 8:5
*7:45: Yos 3:14, 18:1
*7:47: 1King 6:1+
*7:51: Igham 32:9; Lo 10:16; Is 63:10
*7:52: Mt 23:31+; Lu 13:34; 1Tes 2:15
*7:56: Mbo 110:1; Ro 8:34; Kol 3:1