1 Ngol tsoꞌo wa leꞌa Jesús mlundoꞌgal ndoꞌ be xmen na toꞌo lagun Tiberias. Leꞌa xa lndeꞌe mlundoꞌ: 2 Leꞌa dub wizh leꞌa pla be xmen Jesús junt ndebe. Leꞌa ta wa Simón Pedr, no Tomás xa nsaleaꞌ Dídimo, no Natanael xa gezh Caná ten Galilea, no itop be xin Zebedeo, nsea stop be xmen Jesús. 3 Leꞌa Simón Pedr cha ndab ndoꞌ bexa wa:

—Leꞌa naꞌ ndasen mbeal.

Leꞌa bexa cha ndab:

—Leꞌa besa no isea.

Cha nchaꞌbe bexa, cha ukea bexa ndoꞌ dub barco. Parea leꞌa idub teꞌal wa ni dub mbeal lá isen bexa. 4 Leꞌa ngol gor na yá nsayat xeꞌa, leꞌa be xmen Jesús wa uniꞌí Jesús nsoꞌ toꞌo nits wa, parea leꞌa bexa lá iniꞌí ti leꞌa Jesús ta wa. 5 Leꞌa Jesús cha ndab ndoꞌ bexa:

—Bego usa byux, ¿lid usen bega mbeal zha?

Leꞌa bexa cha ukaꞌab ndab:

—Leꞌa besa ni dub mbeal lá isen.

6 Cha ndab Jesús:

—Btsaꞌab bega red baꞌ wats lad gaꞌal barco baꞌ, cha isen bega mbeal.

Weꞌe leꞌa bexa cha li mbin, cha uzheꞌeb sian mbeal usen red wa, gast lá uxik bexa koꞌo bexa red len nits wa. 7 Leꞌa dub xmen Jesús, xa na leꞌa Jesús uzheꞌeb nkweaꞌ ladna, cha ndab ndoꞌ Pedr:

—¡Leꞌa ta baꞌ Jesús!

Leꞌa gor na mbiꞌín Simón Pedr leꞌa ta wa Jesús, cha ngok xa xab xa, ta nbix xa, ta na ulate xa gor usen xa mbeal. Cha nchaꞌa xa len nits, nchaꞌa xa sa nsoꞌ Jesús. 8 Leꞌa stapla be xmen Jesús wa cha myoꞌo barco wa toꞌo nits. Litsa ngobxazh bexa red na lita sian mbeal ncho len na wa. Leꞌa ta wa pa dub gayoꞌotsa metr sit ndoꞌ nits wa. 9 Leꞌa gor na yá ulaꞌ bexa ndoꞌ barco toꞌo nits wa, leꞌa bexa uniꞌí leꞌa dub mbeal nchoꞌob ndoꞌ bkuꞌu, no dub pan nchoꞌob sa wa. 10 Leꞌa Jesús cha ndab ndoꞌ bexa:

—Utseano bega stapla be mbeal usen bega baꞌ.

11 Leꞌa Simón Pedr cha ukea ndoꞌ barco, cha udobxazh xa red gast ndoꞌ yo bid. Leꞌa len red wa ncho dub gayoꞌo itol ncho chon mbeal, bema ubiꞌi, parea ni lá isaw‑a mas lita sian mbeal ncho len‑a. 12 Leꞌa Jesús cha ndab:

—Utseadaw bega.

Leꞌa ni dub bexa lá inabdiꞌizh ndoꞌ xa ná ton xa, leꞌa bexa uniꞌí leꞌa‑yá Jesús. 13 Weꞌe leꞌa Jesús cha usen pan wa, cha mtseꞌa xa‑yá ndoꞌ bexa. No liga mtseꞌa xa mbeal wa. 14 Leꞌa ta ndee biaj yon mlundoꞌ Jesús ndoꞌ be xmen na, tsoꞌo na li mban xa ndoꞌ gealgut.

15 Leꞌa gor na mtayaw bexa, leꞌa Jesús cha unabdiꞌizh ndoꞌ Simón Pedr, ndab xa:

—Simón xin Jonás, ¿ndankea lu naꞌ mas ndoꞌ lak ndankea bexa ndee naꞌ zha?

Leꞌa Pedr cha ukaꞌab ndab:

—Señor, go uniꞌíka leꞌa naꞌ ndankeaka go.

Leꞌa Jesús cha ndab:

—Blaꞌach be borreg ten naꞌ.

16 Cha ndabgal Jesús biaj itop:

—Simón xin Jonás, ¿ndankeaka lu naꞌ zha?

Leꞌa Pedr cha ndabgal:

—Señor, go uniꞌíka leꞌa naꞌ ndankeaka go.

Cha ndab Jesús:

—Blaꞌach be borreg ten naꞌ.

17 Cha ndabgal Jesús biaj yon:

—Simón xin Jonás, ¿ndankeaka lu naꞌ zha?

Leꞌa Pedr cha uban myoꞌo ladna geal biaj yon li unabdiꞌizh Jesús naga ndankeaka Pedr Jesús. Cha ndab Pedr:

—Señor, leꞌa go uniꞌí itea taꞌa. Uniꞌíka go leꞌa naꞌ ndankeaka go.

Cha ndab Jesús:

—Blaꞌach be borreg ten naꞌ zhaga. 18 Leꞌa naꞌ gáp leꞌa zha ben lu, leꞌa lu ndak xab na no nchaꞌa lu tal pa nlad lu. Parea leꞌa zha gak gox lu, leꞌa lu ndi utiꞌil be yaꞌa lu no xaꞌaga men ugak xab la. Cha goꞌo xa lu sa na lá nlad lu yaꞌ lu.

19 Leꞌa ta li ndab Jesús wa gab ná xteꞌe mod na gat Pedr, ta uluu xteꞌe juert nak Dios. Cha ndab Jesús ndoꞌ Pedr:

—Usankea tsoꞌo naꞌ.

20 Leꞌa Pedr cha mgeaksoꞌ mwiꞌi, leꞌa stub xmen Jesús nchankea tsoꞌo Pedr no tsoꞌo Jesús. Leꞌa ta wa xa na leꞌa Jesús uzheꞌeb nkweaꞌ ladna, xa na li nsob wats Jesús zha na lult udaw xcheꞌe bexa, gor unabdiꞌizh xa ndoꞌ Jesús ná ton yun cuent Jesús. 21 Leꞌa gor uniꞌí Pedr xa wa, cha unabdiꞌizh Pedr ndoꞌ Jesús, ndab xa:

—Señor, ¿leꞌa xa baꞌ zha xtaꞌan itid?

22 Leꞌa Jesús cha ndab:

—Tal leꞌa naꞌ nlad leꞌa xa baꞌ lbaꞌatsa nban gast zha ilengal naꞌ, naꞌanpa yuꞌ ladna lu ta wa. Lu usankeatsa tsoꞌo naꞌ.

23 Leꞌa ta na li ndab Jesús, leꞌa ta wa mgen lat be xmen Jesús leꞌa xmen Jesús wa lá gat. Parea leꞌa Jesús naꞌanpa ngab leꞌa xa wa lá gat. Leꞌa Jesús ndi ndab: “Tal leꞌa naꞌ nlad leꞌa xa baꞌ lbaꞌatsa nban gast zha ilengal naꞌ, naꞌanpa yuꞌ ladna lu ta wa.”

24 Leꞌa xmen Jesús wa xa ndadiꞌizh be ta ndee ndoꞌ be men, no mkeꞌa xa‑yá ndoꞌ git. Leꞌa besa uniꞌíka leꞌa ta ndadiꞌizh xa ta ugeaka.

25 No uzhebpa sianta be taꞌa mbin Jesús. Leꞌa naꞌ nsak tal leꞌa be men ukeꞌa itea be ta wa, leꞌa idub ndoꞌ gizhliyo lá ugal yoo be libr wa.