Be ta mbin be apostol ten Jesucristo
Leꞌa libr Hechos mkeꞌa doctor Luc be ta mbin be xmen Jesús tsoꞌo na ngok be taꞌa nkea ndoꞌ libr nsaleaꞌ Luc. Leꞌa libr Hechos ndadiꞌizh xteꞌe ned myak kwaꞌad be xmen Cristo, cha dubtsa myakjunt bexa, no mbin bexa tiꞌin ten Dios. No nseꞌat‑a xteꞌe mkea Jesús gibeꞌa, cha ndab angel ilengal Jesús, no xteꞌe ulen Espíritu ten Dios wizh Pentecostés, no xteꞌe mbin Pedr tiꞌin ten Dios, no xteꞌe mlundoꞌ Jesús ndoꞌ Pabl, cha mbin Pabl tiꞌin ten Dios. Leꞌa idub Hechos ndadiꞌizh cuent ten Espíritu ten Dios, nluu Espíritu wa xteꞌe juert nak Jesucristo, xa nak Xin Dios.
1
Jesús ndab ilen Espíritu ten Dios
1 Leꞌa go Teófilo, leꞌa git ned mkeꞌa naꞌ ndoꞌ go wa, mkeꞌa naꞌ cuent ten itea be ta mbin Jesús no be ta mluu xa, 2 gast wizh mkea xa gibeꞌa. Leꞌa wizh wa mbidiꞌizh xa ndoꞌ bexa na mti xa, ndab xa xteꞌe nsabndoꞌ gun bexa, lak msaꞌa Espíritu ten Dios gab xa‑yá ndoꞌ bexa. 3 Tsoꞌo na ngut Jesús, dub top gaꞌal wizh mlundoꞌ xa ndoꞌ bexa wa sian biaj, ndontsa uniꞌíka bexa leꞌa xa mbanka ndoꞌ gealgut. No mbidiꞌizh xa ndoꞌ bexa wa ná xteꞌe nibeꞌe Dios be men.
4 Leꞌa dub wizh wa gor na nsoꞌno xa bexa wa, ndab xa ndoꞌ bexa:
—Lá ikaꞌan bega gezh Jerusalén ndee. Ndi kweas bega gast usaꞌa Tad Dios ta ndab xa usaꞌa xa, lakka mbidiꞌizh naꞌ gun xa. 5 Leꞌa Juan ulaleaꞌ be men no nits, parea yamer gal dub wizh leꞌa bega italeaꞌ nsea Espíritu ten Dios.
Jesús mkea gibeꞌa
6 Weꞌe leꞌa bexa nde wats Jesús cha unabdiꞌizh, ndab bexa:
—Señor, ¿nat zha gun ga gan leꞌa beuna xa Israel inibeꞌegal nacion ten beuna ndee?
7 Leꞌa Jesús cha ukaꞌab ndab:
—Leꞌa bego lá nsabndoꞌ iniꞌí pol yoo ta wa ni xá wizh na‑yá, ta na gun Dios zha nlad xa. 8 Ná leꞌa Dios usaꞌa Espíritu ten na ndoꞌ bega, cha gap bega juers gudiꞌizh bega ndoꞌ be men itea be ta mbin naꞌ. Li gudiꞌizh bega ndoꞌ be men Jerusalén ndee no idub Judea ndee no Samaria no gast idub ndoꞌ gizhliyo.
9 Tsoꞌo na li ndab Jesús ta wa, cha mkea xa gibeꞌa, myoꞌo xa lat xkaw ndalen ndewiꞌi bexa wa. Cha lá iniꞌíta bexa xa. 10 Leꞌa gor na bi li ndewiꞌi bexa gibeꞌa sa nseaꞌ Jesús wa, weꞌe leꞌa top xabgiꞌi nak lad nagud cha mlundoꞌ sa wa, 11 ndab bexa:
—Bego xa Galilea, ¿xtaꞌan lbaꞌata ndewiꞌi bego gibeꞌa baꞌ zha? Leꞌa Jesús xa mtoꞌo lat bego nseaꞌ gibeꞌa baꞌ wa, leꞌa xa baꞌ leꞌaka ilen stub biaj lakka uniꞌí bega nseaꞌ xa.
Be xmen Jesús mti stub men yatsoꞌ sa usoꞌ Judas
12 Weꞌe leꞌa bexa cha mkaꞌan Bet Olivo wa, cha myach bexa Jerusalén. Leꞌa bet wa nde pa dub kilómetro gax wats Jerusalén. 13 Gor ulayaꞌ bexa Jerusalén, cha ukea bexa cuart nde gaꞌap gek niꞌi sa ndencho bexa. Leꞌa ta wa Pedr no Jacob no Juan no Ndres no Julip no Tomás no Bartol no Mateo no Jacob xin Alfeo no Simón xa partid Zelote no Judas wit Jacob. 14 Leꞌa bexa wa nsea pla be xagots nsea Marí xnaꞌa Jesús nsea be wit Jesús, sian biaj nzhealbe bexa ndadiꞌizhno bexa Dios.
15 Leꞌa dub wizh leꞌa dub gayoꞌo ncho gaꞌal bexa ndangea ladna Jesús wa nzhealbe. Weꞌe leꞌa Pedr cha ngwasoꞌ lat bexa, cha ndab xa:
16 —Bego nak beuna xmen Jesús, juerska ngok cumplir ta ndab diꞌizh ten Dios, ta uníꞌi David sakndoꞌ Espíritu ten Dios cuent ten Judas, xa usaned ndoꞌ be men usen Jesús. 17 Leꞌa Judas wa no uyoꞌo cuent be ltsaꞌa besa no mbin xa ltsaꞌa tiꞌin ndun besa.
18 (Leꞌa med na ukaꞌa Judas myun xa cuent Jesús wa usiꞌi bexa dub bleꞌa yo. Leꞌa sa wa cha msobgek Judas gast ngoch len xa. 19 Leꞌa be men ncho Jerusalén, gor na mbiꞌín bexa ta wa, cha msaleaꞌ bexa yo wa Acéldama diꞌizh ten bexa, dub diꞌizh gab Yo Ten.)
20 Cha no ndab Pedr:
—Leꞌa libr ten Salmos nkeaniꞌi ndab‑a:
Yaꞌan nab lid xa,
yá naꞌanta ton yoo len‑a.
No ndab‑a:
Stub xa gun tiꞌin ndun xa wa.
21 ’Nat leꞌa beuna nsabndoꞌ uti dub xabgiꞌi lat bexa na ukeseano besa idub ukeseano Jesús besa, 22 gast zha ulaleaꞌ Juan Jesús no gast zha nseaꞌ Jesús gibeꞌa. Leꞌa xa wa no yate lat besa, ndontsa no xa gudiꞌizh ndoꞌ be men leꞌa Jesús mbanka ndoꞌ gealgut.
23 Weꞌe cha mluu bexa top xabgiꞌi, dub xa nsaleaꞌ Kosé Barsabás no nsaleaꞌ xa Justo, no stub xa nsaleaꞌ Matí. 24 Cha mbidiꞌizhno bexa Dios ndab bexa:
—Tad Dios, leꞌa go nchandoꞌ ladoꞌo itea be men. Nat bluu go ndoꞌ besa ná ton ndoꞌ itop bexa ndee mti ga. 25 Leꞌa xa wa yak dub xa gun tiꞌin ten go lak ndun besa ndee, gak xa dub apostol ten ga. Leꞌa ta wa ta mlaꞌa Judas ke na mbin xa ta ugap wa, cha nchaꞌa Judas sa nsabndoꞌ yaꞌ xa castig wa.
26 Cha uloꞌo bexa suert, weꞌe leꞌa Matí leꞌa ngol uyote xa lat stibdub bexa nak apostol wa.