1 Pus ixchuxk'an an yu ancha ixta'ayxto'nun laka junta talaktaya'olh chi talhi'anilhcha an Jesús an Pilato. 2 Chi tsukulhcha ta'alhtasuy, tanajun:

―Ani lapanak ik'a'taymaw li wa jalaktilha an lapanakni yu ani jamacha'an, chi najun li jantu kamapalhlhi'anikalhi an ay xajamach'alhkat Roma, najun li ma Cristojo yucha, ma Rey.

3 Pus an Pilato lhisakmiy, juniy:

―¿Uxint'i ixrejk'an judiojnin?

Yucha ja'alhtayanalh, najun:

―Uxint'ich'a na'un.

4 Wa chuncha an Pilato, jajuniy an xalaj'ajin sacerdotejnin chi an lapanakni:

―Jantu tu'u tala'alhini ikla'cha'aniniy ani lapanak.

5 Pero yu'uncha palay p'as ixtanajun:

―Wa japulaktilhiya an lapanakni tacha an masuy, an xalakaat'un Galileaja pu'a'taynichalh chi chaway anicha xalakaat'un Judeaja taylhi'anta.

6 Pus an Pilato akxni asmatlhi nawkalh Galilea, lhasakminilhi li an Jesús sna jamacha'a Galilea. 7 Akxni k'ats'aalhi an Pilato li an Jesús jamacha'a tan ixch'alhkatnan an Herodes, ancha mala'achanilh, chi mu akxni an Herodes wachu Jerusaleni ixt'ajun. 8 An Herodes akxni la'ts'ilhcha an Jesús, sawalhcha achalh, mu ma'anchacha sawalhcha ixla'ts'imputun. Mu lhuwcha tanlhuni ixlaj'asmatta ixlichiwinkan yu ixlak'ilhtuy, chi ixla'ts'imputuncha li tu'ucha lhi'a'nini kax'ilhtulh. 9 Tipalhuwcha tu'u ixlisakmiy, pero yucha jantu tu'u alhtaylh. 10 An xalaj'ajin sacerdotejnin chi an xamaestrojnin lhamap'a'sin wachu ancha ixtayanalh, p'ascha ixta'alhtasuy ixtalhimuk'ay tanlhun. 11 Pus wa chuncha an Herodes ali an isoldadojnin jantucha tu'u ixtalhiwilay an Jesús, tamala'ch'inilhcha yu k'usi la'ch'it, wa ixtapumamaxaniycha chi an Herodes mala'achanipalhi an Pilato. 12 Pus akxni, oxicha talalhi'alh an Pilato ali an Herodes, mu ixlip'ulhnaj wa ixtalaxkajiy.

13 Wa chuncha an Pilato, jama'ayxto'olhi an xalaj'ajin sacerdotejnin chi an jamach'alhkatni chi ta ixchuxk'an tawilanalh an lapanakni, 14 jajuniy:

―Ani lapanak kilalhiminitaw kilajunaw li wa jalaktilhiya an lapanakni. Pero la mi'ukxlakapuchak'ani iklhisakmilh, chi jantu tu'u ikla'cha'aninilh tala'alhin t'ach'a an lhimuk'ayat'it. 15 Chi an Herodes, wanajcha chun kintamala'achanicho'ochin. La'ts'inat'itcha, jantu tu'u ilhtuta yu laycha kalhima'nikalh. 16 Akxta'niyacha la'atam lhima'alh'ajna chi akmakawcho'oyacha.

[ 17 Chuncha jajunilh mu akxni k'atan ixjun an Pilato ixjamakawniy pumatam tach'ini an lapanakni.] 18 Pero ixchuxk'an wa ayxtami talakt'asa'olh, tanajun:

―¡Ani Jesús jantu! ¡Yu akilamakawniw yucha an Barrabás!

19 An Barrabás ixmalaklhchawkanta mu ixjama'nininta chi wa ixt'alaxtukuy an xajamach'alhkat an la'acha'an. 20 An Pilato a'tam jalhisakmipalhi mu ixmakawputuni an Jesús, 21 pero yu'uncha a'tam palay p'as talakt'asapalh, ixtalaknajun:

―¡K'amakxt'ukmuk'acha, k'amakxt'ukmuk'acha!

22 Pero an Pilato, ixlipu'a't'utucha, a'tam jajumpalh:

―¿Tisuncha tala'alhini ilhtuta? Jantu tu'u tala'alhini ikla'cha'anini para li kama'nikalhcha. Akmama'alh'ajniyacha pero akmakawcho'oya'.

23 Pero yu'uncha palay p'as ixtalakt'asay, ixtalhisk'in li ma kamakxtukmuk'akalhcha. Pus tacha an ixtalakt'asay an lapanakni chi an xalaj'ajin sacerdotejnin, tamatapujunilhcha. 24 Pus an Pilato ilhtulhcha yu an ixtalakask'in yu'uncha. 25 Jama'axta'nilhcha an Jesús an lapanakni para li kata'ilhtulhcha wa tani ta'ilhtuputuncha chi an yu ixlimalaklhchawkanta ixjama'ninti chi ixlakata li wa ixt'ala'ajiy an xajamach'alhkat la'acha'an, yucha makawlhcha, mu chunchacha ixtajuniy.

26 Akxni ixtitalhi'ancha an Jesús, tach'apayawlh pumatam lapanak ixjunkan Simón, jamacha'a Cirene, la ixlima'spa la'acha'ani minchalh, tamak'uk'alhcha an cruz para li ma kach'a'o'alhi'alhcha an Jesús.

27 Wanajcha lhilhuwi ixch'a'o'akanta chi lhuw t'akunini ixtama'anta, sawalhcha ixtalhita'oxila'alhiy chi ixtalhilaj'alhuncha. 28 Pero an Jesús tala'asp'itlhi chi sa'cha ixjala'ts'in, ixjajuniy:

―Ixjatsi'in la'acha'an Jerusalén, jantu akilalhi'alhuw. Mijas'at'ank'ani k'ajalhi'alhunt'it chi milakatak'an, 29 mu kamina wilhchani akxni kanawkana: “Oxi para yu'uncha an t'akunin an yu jantu lay tajamas'at'analh, chi an yu jantu a'tam tajamas'at'analh chi an yu jantu a'tam tajamats'ik'inilh.” 30 Akxni katajuna an laj'a'stitawk'a: “Akila'a'lhtants'iwcha”. Chi an tan laklakatitawk'a katajuna: “Akilamats'ewi”, 31 mu li kit'in tacha kinta'ilhtuy, walh chi tacha ikst'a'aw k'iw, pus uxitnan, ¿t'asu li jant'uch'a ch'uni k'at'i'ilht'uk'ant'it li tachanu xaxixni k'iwi unt'at'it'i?

32 Ixjat'alhi'ampalhkanta ixt'uyunk'an lapanakni an Jesús, para li kajat'ama'nikalhcha. Yu'uncha ixta'ilhtuta ixtala'alhink'an. 33 Akxni tacha'alhcha tan junkan la Ixla'pa'axi Swe'elukut, anchacha makxtukmuk'akalh an Jesús chi an ixt'uyunk'an lapanakni yu ixta'ilhtuta tala'alhin, ixtapiktutamincha, lhilaxjama'xi chi tan oxi ixmaka'. 34 An Jesús nawlh:

―KimPay, k'ajamala'mixinin, mu wa jantu tak'atsay tuchini ta'ilhtuycha.

Chi talamala'pitsilhcha an ixla'ch'it an Jesús, wa ta'amanalh suerte. 35 Chi chux an lapanakni sa'cha ixtala'ts'in, chi masi an jamach'alhkatni ixtamamaxaniycha, ixtalajuniy:

―Ali'in jama'alhtaxtulh, kama'alhtaxtukalhcha ix'akstu li Cristo sawalh yu sakxtuta Dios.

36 An soldadojnin wachucha ixtamamaxaniy, waniycha ixtala'an ixtama'ot'uycha vinagre 37 chi ixtajuniy:

―Li ixrejk'at'i judiojnin, k'at'a'alht'axt'ucha mi'akstu.

38 An la ix'akpuxni ists'o'nikanta tan ixnajunta: “Ani ixRejk'an judiojnin.”

39 Pumatam an yu ixjat'amakxtukmuk'akanta an Jesús, ixlilakajuniycha, ixjuniy:

―Li Cristojk'at'i, k'ama'alht'axt'uk'acha chi akilama'alhtaxtuw.

40 An pumatam la'a'aymalh juniy:

―Masi wanajch'a ch'uni ma'alh'ajnant'a'un jant'u t'alhamniya an Dios. 41 Kitnan t'acha'anawi li chuncha kama'alh'ajnaw, mu mapalht'awnawi yu ilhtutaw tala'alhin, pero ani lapanak jantu tu'u tala'alhini ilhtuta.

42 Chi juniy an Jesús:

―Jesús, ak'imp'ast'ak'a'a akxni k'ach'alhk'atnana'acha.

43 Pus an Jesús alhtaylh juniy:

―Uxint'i chaway ak'int'ap'ina'acha tan lhi'acha alin jatsukunti, sawalhi ani yu ijkunan.

44 Ka tacha atunkujuncha sta las tres yu ta'oxaycha, chux an lakaat'un taputs'isilh. 45 An wilhchan taputs'isilh, chi an la'ch'it an ix'uk'alh laka tajtan lht'it'in tapu'exli, tukan ixpaytat, aklht'uyi walh. 46 Akxni an Jesús, p'ascha t'asalh, najun:

―KimPay, an kintakuwin la mimaka ikma'axta'niyan.

Chi akxni chunchacha naw'olh, nilhcha.

47 An capitán akxni la'ts'ilhcha li chunchacha tapasalh oxicha lhipastaklhi an Dios, najun:

―Chun sawalh, ani lapanak jantu tu'u ixtala'alhin.

48 Ixchuxk'an an yu chunchacha tala'ts'ilh tacha an tapasalh, ta'ancho'olhcha, jalaktankilhaksalhi'ankalhcha. 49 Ixchuxk'an an yu ixjamispay an Jesús chi an t'akunin yu ixtat'amintachalh sta xalakaat'un Galilea wa ma'atcha ixtalakaminachalh tacha an ixtapasay.

50 Ixt'ajun pumatam lapanak ixjunkan José, jamacha'a Arimatea, xala'acha'an an Judea. Yucha wachu ixma'ta'ayxt'o'a an laka ay junta yu ixta'ilhtuy an judiojnin, 51 pero mu yucha oxi lapanak chi ixkiklaka'iy Dios, yucha jantu oxi ixliwilay tacha an tatamakawlh laka junta, mu yucha wachu ixpakxan'iya an ixlich'alhkat Dios. 52 Yucha la'alhi an Pilato chi sk'inilhi an ixlakatunaj an Jesús. 53 Akxni ma'alhtajulhcha an laka cruz, la'apamililhcha laka sábana, chi maknulhcha tan ixtantipujkanta a'stitawka la'stu chiwx, jantuka' k'is xamati ancha ixmaknukan. 54 Akxni chuncha tapasalh sawalhcha ixtala'asijt'ajuni an lapanakni, mu katunkunanta xawilhchan jastaknat.

55 An t'akunin an yu ixtat'amintachalh an Jesús sta xalakaat'un Galilea tat'a'alh, tala'ts'ilhi tan kimaknukalh chi tani lhimamakalhcha an ixlakatunaj. 56 Akxni ta'ancho'olhcha ixcha'ak'an, tamala'asijnilhcha laklhaklhi perjume yu lay lakatawk'akan. Chi tajastaknalhcha akxni xawilhchan jastaknat, tacha najunta laka lhamap'a'sin.