1 Waniycha ixchint'ajun ixk'atan pan yu jantu ixliyawkan lhamaskajan, yu junkan Paxku. 2 Chi an xalaj'ajin sacerdotejnin chi an xamaestrojnin lhamap'a'sin ixtalhipuxkawniycha tani katalhima'nilhcha an Jesús, pero jantu lay ixta'ilhtuy mu ixtatalhanani li wa lay katalhitalh'amalh chux an lapanakni.

3 Wa chuncha an Satanás, lakpach'apalhcha an Judas, xapumatam an ixpumakawt'uyk'an ixt'alhtanan an Jesús, yu ixtajumpalay ma Iscariote, 4 alhcha jala'ts'ini an xalaj'ajin sacerdotejnin chi an xalaj'ajin an yu ixtajalhistaknan laka tajtan, jajuniycha tanischa kajalhima'axta'niya an Jesús. 5 Yu'uncha sawalhcha oxi talhiwilalh, chi tajuniy li kataxta'niyacha tumin. 6 An Judas jama'lhtayanalh chi a'taynilhcha lhipuxkawniy tani wanancha lay kama'axta'lhi an Jesús, akxni jantu xamati la'ts'in.

7 Chilhcha k'atan akxni ix'ukan pan yu jantu ixliyawkan lhamaskajan, akxni ixma'nikan jas'at'a borrego ixlakata Paxku. 8 An Jesús jamala'achalh an Pedro chi an Juan, jajuniy:

―K'ap'inchi'itcha la'oxinini an wayt ixlakata Paxku, kalakwaynawcha.

9 Chi talhisakmiy, tajuniy:

―¿T'anisch'a lak'ask'in ak'aw la'oxinini?

10 An Jesús jajuniy:

―Akxni k'at'anut'achi'it an la'acha'an, k'ap'axt'o'a'it pumatam lapanak yu lhi'anta xkan la ix'uyuli', k'ach'a'o'alhip'ina'it sta tan laka cha'a katanutachalh. 11 Chi k'a'una'it an yu jamacha'a: “An maestro najun: ¿tanischa laka cha'a tan ajkat'alakwayna an kint'alhtanan ixlakata Paxku?” 12 Yucha katamasuniyan pulaktam la ixcha'a tan talhman chi ay, mala'asijnikantacha, anchacha k'ala'oxiya'it yu katask'iniya'.

13 Yu'uncha ta'alhcha, walh chunchacha sawalhi tapasalh tacha an ixjajunita an Jesús, pus anchacha tamala'asijnilh ixlakata an Paxku.

14 Akxni cha'alhcha ixpaku, an Jesús jat'alaktawilhcha an ixt'alhtanan. 15 Chi jajuniy:

―¡Chunchacha xaklhi'achaniy li p'ulhnajcha aklat'alakwaynawi laka Paxku akxni jantuka' ikniy! 16 Mu klajunaw jantu chuni aktiwaycho'olh laka Paxku, sta akxni kajunacha tuchini jumputuncha ani Paxku an la ixlich'alhkat Dios.

17 Pus xa'a'ilhcha la'atam vaso yu ixputajun xaxkan uva chi xta'lhicha lhimala'puchajun, chi jajuniy:

―Ni'ijcha ani, k'alaxt'a'nitcha, k'alhawap'u'ott'itcha, 18 mu kit'in klajunaw jantu ali akti'otcho'olhi ani xaxkan uva sta akxni kaminacha an ixlich'alhkat Dios.

19 Chi xa'a'ipalhi an pan, wachucha lhixta'lhi lhimala'puchajun, chi la'ch'e'elhcha, chi jaxta'nilhcha, jajuniy:

―Ani kilakatunaj, yu kama'axta'kana milakatak'an, chunchacha wachu k'a'ilht'uya'it'it para li akilalhipastakwi.

20 Chi akxni talakway'olh, wanajcha chuni ilhtupalh an vaso yu ixputajun xaxkan uva, xa'a'ilh jajuniy:

―Ani vaso yu putajun xaxkan uva yucha yu sast'icha putamakawcho'oyaw li milakatak'ani aklhimaj'ana an kijak'alhni.

21 ’Pero chaway xapumatam yu uxitnan, yu akima'axt'a'a, an laka mesaja kint'amaj'o'slay. 22 Mu sawalhi li an isTs'alh Lapanak ts'ajwi ti'an, tacha an lhits'o'muk'akanta, pero an lapanak an yu kama'axt'a'a an isTs'alh Lapanak kapulhik'atsaya'.

23 Wa chuncha tsukulhcha talalhisakmipaxay, tichini yuchacha yu kama'axt'a'a'.

24 Chi atumpaj wachu tsukulh talalhixtukupalay tichini yuchacha yu palay kalhitapala'. 25 Pero an Jesús jajuniy:

―An xarejnin an laj'ay la'acha'anaxni tach'alhkatnancha wa tani tach'alhkatnamputuncha, chi an yu wa talhinajuncha anchunu la'acha'anaxni ma oxicha ja'a'tayjununi jajunkan. 26 Pero uxitnan jantu chun, yu palay lhitapalay yu uxitnan, tacha yu palayka ts'alhi kalalh, chi yu wa lhinajuncha, yucha yu kalak'ilhtulhcha an tanlhun. 27 ¿Tisapiyuchacha yu palay lhitapalay, yucha an yu wa tawlaycha wajin, u yucha an yu iy pulatoj? Yu palay lhitapalay yucha an yu wa tawlaycha wajin. Pero kit'in ani iklat'a'aklat'awnaw tachanu yu wa talak'iniyan mimpulatojk'an.

28 ’Uxitnan akxni lhima'anxkay lhilhiji kilat'a'aklat'awnaw, 29 xliyu aklalhixta'niyaw la'atam lhich'alhkat, tacha an kimPay kixta'nilh wachu'. 30 Uxitnan k'alakwayna'it'it ch'i k'alaj'ot'a'it'iti tu'u la kimesa tan akch'alhkatnana', ch'i k'alakt'awla'it'iti t'an k'anawna'it li oxi u jantu yu ta'ilhtulh an kilhmakkawt'uy xalapanakni Israel.

31 Chi nawpalh an Jamach'alhkat:

―Simón, Simón, an Satanás task'inani li ma katalaktilhan tacha trigo. 32 Pero uxint'i iklhitapayniyani para li jant'u k'ama'ats'an'at'i an mijakiklaka'inti. Chi akxni ak'ink'iklak'a'ich'o'oya'acha, k'aja'a't'ay'uya'a amijat'ala'awnin para li ixlisawalhi katajakiklaka'inilh.

33 An Simón juniy:

―Jamach'alhkat, kit'in akt'a'anani masi laka pulach'in, chi sta masi akintama'nikan.

34 An Jesús alhtaylh, juniy:

―Pedro, chaway ijkunan akxni jantuka' t'asay puyux, a't'utucha k'anawna'a li jant'u k'imisp'ay.

35 Chi ixchuxk'an jalhisakmilh, jajuniy:

―Akxni iklamala'achaw li jant'u k'alhip'it mintumink'an chi mibolsajk'an chi miwarachijk'an, ¿tu'u tats'an'atayanin?

Yu'uncha tajuniy:

―Jantu.

36 Pus jajuniy:

―Pus chaway chun, yu lhit'ajuni ixtumin kalhi'alh, chi ixbolsa wachu'. Chi yu jantu tu'u ix'espada, kast'alh ix'aytanut chi kalhi'ilhcha ma'atam. 37 Mu klajunaw, kajuna la kijatsukunti tacha an najunta an tan ts'o'muk'akanta, tan najunta: “Jat'aput'e'ekalhi an yu wa ay tajunita.” Mu chux tacha an kilhits'o'muk'akanta katapasa'oya'.

38 Yu'uncha tajuniy:

―Jamach'alhkat, ani iklhit'awnaw ma'at'uy espada.

Yucha ja'alhtaylh:

―¡Wachunchacha kawalhcha!

39 Wa chuncha taxtulhcha, alhcha tan a'tajcha ix'an a'stitawk'a tan junkan Laka Olivojnin, chi an ixt'alhtanan tach'a'o'alhcha. 40 Akxni cha'alhcha, jajuniy:

―K'at'ap'aynit'it, para li jant'u k'a'ilht'up'ut'ut'iti yu jantu oxi.

41 Chi jamakawyawlhcha, alhcha tacha ixlima'at lay akmakat'alh'alh laka chiwx, tatso'ottatawlhchalhcha chi tsukulhcha tapayniy, 42 najun:

―KimPay, li lay, ak'imala'xt'inunini ani ay lhima'alh'ajna, pero jantu yu wa tacha kit'incha iknajuni kawalh, yu t'ach'a na'un uxint'i kawalh.

43 Wa chuncha talakasunilh pumatam xa'angelh an lakt'iyani an Jesús, chi lak'ut'ililh. 44 Pero mu akxni sawalhcha ixma'alh'ajnant'ajun, pus palay p'as ixtapayniy, an ixchanit wa tacha wa laj'aya jak'alhnicha xt'amj xt'amj ixtamayachalh an lakaat'un.

45 Akxni tapayni'olhcha tayalhcha, jala'alhcha an ixt'alhtanan, walh ixtalaklhtatanani jala'cha'alh, mu sawalhcha ixtala'ta'oxila'alhiy, 46 pus jajuniy:

―¿T'asu li laklht'at'ayatcha? K'alaj'ost'ayat'it, k'at'ap'aynit'it, para li jant'u k'a'ilht'ut'iti yu jantu oxi.

47 Chunchaka ixchiwint'ajun an Jesús, walh lhilhuwcha cha'ankalh, an yu ixjunkan Judas, xapumatam an ixpumakawt'uyk'an ixt'alhtanan an Jesús, ixjap'ulhnitacha an lapanakni, chi la'cha'alhcha an Jesús, la'xtikilhtastuklhicha. 48 Pus an Jesús juniy:

―Judas, ¿la'xt'ik'ilht'ast'ukma'axt'a'acha an yu isTs'alh Lapanak?

49 Mu tala'ts'incha tuchini katapasayacha an yu ancha ixtat'ayanalh an Jesús, pus tajuniy:

―Jamach'alhkat, ¿akmak'atsaniyaw laka espada?

50 Wa chuncha xapumatam yu yu'uncha, mak'atsaninilh xapumatam ixma'tsuku an xa'ay sacerdote, xtalh akatuch'uk'up'uxli an oxi ix'a'ax'olh. 51 Chi an Jesús jajuniy an yu ixtat'a'anta:

―Wa sa'ch'a k'at'awlat'it, k'ajamak'a'unt'itcha.

Chi akatuch'apalhi an yu akatuch'uk'up'uxkalh, akatuk'uch'ulh. 52 Ixli'astan an Jesús jajuniy an xalaj'ajin sacerdotejnin chi an xalaj'ajin an yu ixtajalhistaknan laka tajtan chi an laktatanincha, li ma wa ta'antacha ch'apayawnin, jajuniy:

―¡Wa t'ach'a wa ch'a'o'ayatcha ja'alhawna laklhit'ant'at mi'espadajk'an chi mink'iwk'an! 53 Pero mu lhilhiji xaklapaxt'o'aw an laka tajtan, walh chi akxni jantu kilach'apayajuw. Pero chaway chilhcha mimpanch'e'exk'an para li k'a'ilht'ut'it, chi yucha an jatats'isnicha ch'alhkatnan.

54 Pus tach'apayawlhcha an Jesús, talhi'alhcha la ixcha'a an xa'ay sacerdote. An Pedro wa ma'atcha ixch'a'o'alhi'anta. 55 Chi an tan jalhi'ay jatalakxtut, ixtan'ajni, ta'ulalhcha jikmi chi tala'atanchanulhcha, an Pedro anchacha japujatawilh wachu'. 56 Pero pumatam t'aku, ma'tsuku, la'ts'ilhi li ancha ixma'wilh tan an ixla's'onkan, pus najun:

―Ani wachu ancha ixt'a'aklat'ajun an Jesús.

57 Pero an Pedro najun ma jantu, najun:

―¡T'aku', jantu ikmispay!

58 Panch'e'excha lakats'uniya jumpalh, pumatamcha la'ts'impalh, juniy:

―Uxint'i wachu ixt'alhtanak'at'i an Jesús.

An Pedro najun:

―¡Lapanak, jantu kit'in!

59 Katacha tamcha horaja jumpalh, pumatamcha nawpalay, najun:

―Chun sawalh, ani wachu ani ixt'a'aklat'ajun, chi wachu jamacha'a Galilea.

60 An Pedro najun:

―Jantu ijk'atsay t'uch'ini uniycha, lapanak.

Walh wa akxni, chunchaka ixnawt'ajun, t'asalhcha an puyux. 61 Pus wa chuncha an Jamach'alhkat Jesús tala'asp'itlaka'alhi tan ixyalh an Pedro. Pus pastaklhicha an Pedro li an Jamach'alhkat ixjunita: “Jantuka' katit'asalhi an puyux, a't'utucha k'anawna'a li jant'u k'imisp'ay.” 62 Pus an Pedro taxtulh ma'spa, chi wa stakcha alhulh.

63 An lapanakni an yu ixtalhist'ak'a an Jesús, ixtamamaxaniycha chi ixtamuk'aniycha. 64 Tala'puch'ilhcha chi ixtalakpusaycha, ixtajuniy:

―¿Tisiyuchacha muk'anini? K'anawcha.

65 Chi tachalayjcha aliy ixtalhimamaxaniy.

66 Akxni tunkulhcha, tata'ayxto'lhicha an xalaktatanin lapanakni, chi an xalaj'ajin sacerdotejnin chi an xamaestrojnin lhamap'a'sin. Talhi'alhcha an Jesús laka ay junta, tajuniy:

67 ―¿Uxint'i Cristojk'at'i? Akilajuniw.

Yucha jajuniy:

―Li aklajuniw, jantu akintilakiklaka'iw, 68 chi li aklalhisakmiw tu'u, jantu akintilajuniw chi jantu akintilamakajuw. 69 Pero chaway ati'anta kit'in yu ikwalh isTs'alh Lapanak akpiktutawlantacha tan oxi ixpa'xti an Dios, yu lay ilhtu'ojoy wa tuchicha.

70 Pus wa ayxtami ixchuxk'an talhisakmilh, tajuniy:

―¿Uxint'i isTs'alh Dios?

Yucha jajuniy:

―Uxitnanch'a nawnat li kit'in.

71 Wa chuncha talajuniy:

―¿Ali ma'lhtask'iniyawi yu akintajunin? Wanajcha kitnani alha'asmat'aw.