1 आः जिं छिमिसं च्‍वया हःगु खँयागु लिसः बियाच्‍वना। ब्‍याहा मयासे च्‍वनेगु बांलाःगु खँ खः। 2 अथेसां व्‍यभिचार अप्‍वः जूगुलिं न्‍ह्याम्‍ह मिजंया नं थःम्‍ह हे कलाः दयेमा। अथे हे न्‍ह्याम्‍ह मिसाया नं थःम्‍ह हे भाःत दयेमा।

3 छम्‍ह मिजनं थः कलाः लिसे गुकथं हने माःगु खः उकथं हे हने माः। अथे हे छम्‍ह मिसानं थः भाःतयात गुकथं हने माःगु खः उकथं हे हने माः। 4 मिसायागु म्‍हयागु अधिकार मिसायाके मदु, भाःतयाके दइ। अथे हे मिजंयागु म्‍हयागु अधिकार मिजंयाके मदु, वया कलाःयाके दइ।

5 छम्‍हं मेम्‍हय्‌सित मयः धकाः धाये मते। सल्‍लाह यानाः छुं ईया लागि अलग च्‍वनाः प्रार्थना याये माःसां मेबलय्‌ नापं हे जु। छिमिसं थःत कःघाये मफुसा शैतानं छिमित स्‍यंकेत स्‍वइ। 6 थथे जिं धयाच्‍वनागु खँ छिमिसं याये हे माः धकाः धयागु मखु। थ्‍व ला छिमित सल्‍लाह बियाच्‍वनागु जक खः। 7 जितः फुक्‍क मनूत जि थें ब्याहा मयासे च्वंसा यः। फुक्‍कसिनं परमेश्वरपाखें थी थी वरदान कयातःगु दु। छम्‍हय्‌सिके छता वरदान दःसा मेम्‍हय्‌सिके मेगु हे वरदान दु।

8 आः जिं ब्‍याहा मयाःनिपिं मिजंतय्‌त व भाःत मदये धुंकूपिं मिसातय्‌त धयाच्‍वना -- जि थें ब्‍याहा मयासे च्‍वने फुसा छिमित तसकं बांलाइ। 9 थःत कःघाये मफुसा ब्याहा याये माः। छाय्‌धाःसा प्‍याःचाः सह याये मफय्‌का च्‍वनेगु स्‍वयाः ब्‍याहा यायेगु बांलाः।

10 ब्‍याहा याये धुंकूपिन्‍त प्रभुयापाखें जिगु आज्ञा दु -- भाःत दुम्‍ह मिसां थः भाःतयात त्‍वःते मज्‍यू। 11 छुं जुयाः भाःत नाप बाया च्‍वंसां व मिसां मेम्‍ह मिजं नाप ब्याहा याये मज्‍यू। मिलय्‌ जुयाः थः भाःत नाप च्‍वनेगु बांलाः। अथे हे भाःतं नं कलाःयात पारपाचुके मज्‍यू।* ७:१०-११ मत्ती ५:३२; मर्क १०:११-१२; लूक १६:१८

12 मेमेपिन्‍त जिं थथे धाये -- थ्‍व प्रभुयागु खँ मखु, जिगु थःगु हे खः। सुं विश्वासीया कलाः विश्वासी मखुसां भाःत लिसे बाया च्‍वने मखु धाल धाःसा वयात त्‍वःते मज्‍यू। 13 अथे हे सुं विश्वासी मिसाया भाःत विश्वासी मखुसां कलाःलिसे बाया च्‍वने मखु धाल धाःसा वयात त्‍वःते मज्‍यू। 14 छाय्‌धाःसा विश्वासी मखुम्‍ह भाःत विश्वासी कलातं यानाः पवित्र जुल। अथे हे विश्वासी मखुम्‍ह कलाः विश्वासी भाःतं यानाः पवित्र जुल। अथे मखुसा ला इपिं पाखें दुम्‍ह मचा पवित्र जुइ हे मखुत नि। तर इपिं ला पवित्र हे जुइ। 15 विश्वासी मखुम्‍ह कलातं विश्वासी भाःतयात, अथे हे विश्वासी मखुम्‍ह भाःतं विश्वासी कलाःयात त्‍वःते धाल धाःसा त्‍वःतके ब्‍यूसां ज्यू। परमेश्वरं झीत शान्‍ति बीत सःतादीगु खः। 16 विश्वासी कलातं थः भाःतयात विश्वासी याये फइ मखु धकाः मतिइ तयेगु बांमलाः। अथे हे विश्वासी भाःतं थः कलाःयात विश्वासी याये फइ मखु धकाः मतिइ तयेगु बांमलाः।

17 परमेश्वरं धयादी थें व सःतादी थें छिपिं जुइमा धकाः जिं फुक्‍क मण्‍डलीयात स्‍यना वयागु खः। 18 म्‍हय्‌ चिं तःम्‍ह मनूयात परमेश्वरं सःतादीगु खःसा वं उगु चिंयात लिकायेत स्वये मते। अथे हे म्‍हय्‌ चिं मतःम्‍ह मनूयात परमेश्वरं सःतादीगु खःसा वं नं म्हय्‌ चिं तयेत स्वये मते। 19 परमेश्वरया न्‍ह्यःने चिं तःसां मतःसां छुं मपाः। तःधंगु खँ ला परमेश्वरयागु आज्ञा मानय्‌ यायेगु खः।

20 परमेश्वरं सःता दीबलय्‌ गथे खः अथे हे च्‍वना च्‍वँ। 21 दास जुया च्‍वंबलय्‌ परमेश्वरं छिमित सःतादीगु खःसा छिमिसं दुःख ताये मते, बरु स्‍वतन्‍त्र जुइगु मौका वल धाःसा त्‍वःफिके मते। 22 दास जुया च्‍वंपिन्‍त प्रभुं सःतादीगु खःसा थुपिं दास थें मजुसे प्रभुया मनूत जुइ, अथे हे दास मखुपिं मनूतय्‌त प्रभुं सःतादीगु खःसा थुपिं प्रभुया दास जुइ। 23 छिमित परमेश्वरं मू पुलाः न्‍यानादीगु खः, उकिं छिपिं मनूतय्‌ दास जुइ मते। 24 यःपिं दाजुकिजापिं, प्रभुं छिमित सःतादीबलय्‌ छिपिं गथे खः अथे हे जुयाः परमेश्वर नाप च्‍वना च्‍वँ।

25 ब्याहा मजुनिपिनिगु लागि प्रभुं जितः छुं धयादीगु मदु। बरु प्रभुयागु दया मायां विश्वास याये बहःम्‍ह जुयाः जिं छिमित धयाच्‍वना -- 26 थौंकन्‍हय्‌ जुयाच्‍वंगु दुःखकष्‍ट स्‍वयेबलय्‌ ला ब्‍याहा मयासे च्‍वनेगु हे भिं जुइ। 27 ब्‍याहा याये धुंकूपिं मिजंतय्‌सं थः कलाःयात त्‍वःता छ्वयेगु मतिइ तये मते। ब्‍याहा मयानानिसा ब्‍याहा यायेगु स्वये मते। 28 तर ब्‍याहा यात धकाः छिमित पाप लाइ मखु। ब्याहा मजुनिम्‍ह मिसां ब्‍याहा यात धाःसा वयात पाप लाइ मखु। ब्‍याहा यानाच्‍वना च्‍वंपिं मनूतय्‌त जुयाच्‍वंगु दुःखकष्‍ट छिमित मजुइमा धकाः जिं थ्‍व खँ च्‍वयाच्‍वनागु खः।

29 यःपिं दाजुकिजापिं, जिं धायेत्‍यनागु खँ थ्‍व खः -- ई अप्वः मदये धुंकल, आवंनिसें ब्‍याहा याये धुंकूम्‍ह मनू नं ब्‍याहा मयानिम्‍ह थें च्‍वना च्‍वँ। 30 ख्‍वया जूपिं मनूत आः दुःख मताःपिं मनूत थें च्‍वना च्‍वँ। न्‍हिला जूपिं लय्‌ताःपिं थें मच्‍वंक च्‍वँ। न्‍यानाः हयागु नं थःगु मखु थें याना च्‍वँ। 31 संसारयागु ज्‍याखँ याना च्‍वंपिन्‍सं याना मच्‍वंपिं थें जुया च्‍वँ, छाय्‌धाःसा थ्‍व संसार याकनं हे मदया वनी।

32 छिमित दुःखकष्‍ट मजुइमा धकाः जिं थ्‍व खँ धयाच्‍वनागु खः। ब्‍याहा मयाःम्‍ह मनुखं प्रभुयात गय्‌ यानाः लय्‌ताय्‌केगु धकाः प्रभुयागु ज्‍या मन तयाः यायेगु कुतः याइ। 33 ब्‍याहा याये धुंकूम्‍ह मनुखं संसारयागु ज्‍याखँय्‌ मन तयाच्‍वनी, छाय्‌धाःसा वं थः कलाःयात लय्‌ताय्‌केगु कुतः यानाच्‍वनी। 34 अय्‌जूगुलिं थज्‍याःम्‍ह मनूयागु मन निखे लानाच्‍वनी। अथे हे ब्याहा मजुनिम्ह मिसां नं प्रभुयागु ज्‍या मन तयाः याइ, छाय्‌धाःसा वं थःगु म्‍हं व आत्‍मां नं पवित्र जुइगु कुतः याइ। अले ब्याहा जुइ धुंकूम्‍ह मिसां संसारयागु ज्‍याखँय्‌ मन तयाच्‍वनी, छाय्‌धाःसा वं थः भाःतयात लय्‌ताय्‌केगु कुतः यानाच्‍वनी।

35 थ्‍व खँ जिं छिमित हे भिं यायेत धयाच्‍वनागु खः। छिमित पनेत मखु बरु छिमिसं पंगः मवय्‌क दुनुगलंनिसें प्रभुयात लय्‌ताय्‌के फयेमा धकाः धयागु खः।

36 सु मनुखं थः नापं ब्याहा क्वःछिनातःम्ह मिसा नाप बामलाःगु व्यवहार याःगु ताय्‌कूसा अले उम्ह मिसाया उमेर नं अप्वःया वनाच्वंगु दुसा वं ब्याहा याये मास्ति वय्‌कूसा ब्याहा याये ज्यू। थुकिं पाप मदु। इमिगु ब्याहा जुइ हे माः। 37 थःगु मनयात बल्‍लाकाः मिसायात ब्याहा मयायेगु क्‍वःछित धाःसां ठीक हे जू। 38 सुनां थः क्वःछिना तःम्ह मिसा नाप ब्याहा याइ वं बांलाःगु हे याइ। तर ब्‍याहा मयाःसा झन बांलाः।

39 ब्‍याहा जुइ धुंकूम्‍ह मिसां थः भाःत दतले हानं ब्‍याहा याये मज्‍यू। भाःत सी धुंकाः धाःसा थःत यःम्‍ह मेम्‍ह मिजं नाप ब्याहा याःसां ज्‍यू। बरु विश्वासी नाप हे जक याये माः। 40 जिगु बिचाःकथं भाःत मदये धुंकूम्ह मिसां ब्‍याहा मयासे च्‍वनाच्‍वने फुसा सुख जुइ। अथेसां जिं स्‍वयेबलय्‌ ला जिके नं पवित्र आत्‍मा दी।