1 छिमि सुयां थःथवय्‌ ल्‍वापु जुल धाःसा न्‍याय यायेत परमेश्वरया मनूतय्‌थाय्‌ मवँसे परमेश्वरयात म्‍हमस्‍यूपिनिगु अदालतय्‌ वनेगु ला? 2 परमेश्वरया मनूतय्‌सं हे संसारया न्‍याय याइतिनि धकाः छिमिसं मस्‍यू ला? छिमिसं हे थ्‍व संसारया न्‍याय याइतिनि धासेंलि थज्‍याःगु चिधंगु ल्‍वापु छिने मफु ला? 3 स्‍वर्गदूततय्‌त नं झीसं न्‍याय याये मानि धकाः छिमिसं मस्‍यू ला? थ्‍व जीवनयागु थज्‍याःगु ज्‍याखँ ला छिमिसं अःपुक हे छिने फये माःगु खः। 4 थथे ल्‍वापु जुल धायेवं छिनेत छिपिं परमेश्वरयात म्‍हमस्‍यूपिं मण्‍डलीया पिनेयापिं मनूतय्‌ थाय्‌ वनेगु बांलाःगु खँ मखु। 5 छिमित मछाः नं मजू ला? छिमिगु पुचलय्‌ थ्‍व ल्‍वापु छिने फुम्‍ह छम्‍ह हे बुद्धि दुम्‍ह मदु ला? 6 परमेश्वरयात म्‍हमस्‍यूपिन्‍त दाजुकिजापिनिगु ल्‍वापु छिंके बीगु बांमलाः।

7 थःथवय्‌ ल्‍वानाः अदालतय्‌ वनेगु हे छिपिं बूगु खः। बरु अन्‍याय हे सह याना च्‍वनेगु बांमलाः ला? थगय्‌ याका च्‍वनेगु हे बांमलाः ला? 8 छिपिं थःपिन्सं हे अन्‍याय याइगु। थः हे दाजुकिजापिन्त थगय्‌ याइगु।

9 मभिंपिं मनूतय्‌त परमेश्वरयागु राज्‍यय्‌ दुकाइ मखु धकाः छिमिसं मस्‍यू ला? थःम्‍हं थःत थगय्‌ याये मते, छाय्‌धाःसा व्‍यभिचार याना जुइपिं, मूर्ति पुजा याना जुइपिं, थः कलाः दय्‌कं कर्पिनि कलाःलिसे व्‍यभिचार याना जुइपिं, मिजं मिजं हे व्‍यभिचार याना जुइपिं, 10 खुँत, लोभीत, अय्‌लाः त्‍वना जुइपिं, कर्पिन्‍त मभिंका जुइपिं, अले थगय्‌ याना जुइपिं -- थज्‍याःपिं मनूतय्‌त परमेश्वरयागु राज्‍यय्‌ दुकाइ मखु। 11 छिपिं मध्‍ये नं गुम्‍हं गुम्‍हं न्‍हापा थथे हे याना जुइ धुंकूपिं खः। आः ला छिमिगु पाप सिले धुंकूगु दु। छिपिं परमेश्वरयात देछाये धुंकूपिं मनूत खः। झी परमेश्वरया आत्‍मां प्रभु येशू ख्रीष्‍टयागु नामं छिमित परमेश्वर नाप मिलय्‌ यानादीगु दु।

12 “जि यःथें याये दु” धकाः छिपिं मध्‍ये सुनानं धाये फु। थ्‍व खँ ला खः, अय्‌सां फुक्‍क ज्‍यां म्‍हयात भिंकी मखु। “जितः यःथें जिं नं याना जुइ दु” धकाः जिं नं धाये फु। अय्‌सां जिं छुकियात नं जितः अधीन याके बी मखु।* ६:१२ १ कोर १०:२३ 13 सुनानं थथे नं धाये फु -- “नयेगु प्‍वाःयागु लागि खः, अले प्‍वाः नयेगु लागि खः।” थ्‍व ला खः, अय्‌नं थ्‍व नितां परमेश्वरं मदय्‌का छ्वयादी। मनूयागु म्‍ह व्‍यभिचार याना जुइत मखु, बरु प्रभुयात तःधंकेत खः। उकिं म्‍हयात माःगु फुक्‍कं प्रभुं बियादी। 14 सी धुंकूम्‍ह प्रभुयात परमेश्वरं हानं म्‍वाकादिल। थथे हे वय्‌कःयागु शक्तिं झीत नं म्‍वाकादी।

15 छिमिगु म्‍ह ख्रीष्‍टयागु म्‍हब्‍व खः धकाः छिमिसं मस्यू ला? थथे खः धयागु जूसा ख्रीष्‍टयागु म्‍हब्‍वयात वेश्‍यायागु म्‍हब्‍व यायेगु ला? थथे ला जुइ हे मफइगु खँ खः। 16 धर्मशास्‍त्रय्‌ “थुपिं निम्‍हं छम्‍ह हे जुइ” धकाः च्‍वयातःथें वेश्‍यानाप द्यनिम्‍ह मनूयागु म्‍ह वेश्यायागु म्‍ह नाप छम्‍ह हे जुइ धकाः छिमिसं मस्‍यू ला?* ६:१६ उत २:२४ 17 अथे हे प्रभु नाप मिलय्‌ जूम्‍ह मनू नं वय्‌कः नाप छगू हे आत्मा जुइ।

18 व्‍यभिचार पाखें तापाक च्‍वँ। मेमेगु पाप याःसां म्‍हयात छुं नं जुइ मखु। व्‍यभिचार यात धाःसा थःगु हे म्‍ह लिसे पाप याःगु जुइ। 19 छिमिगु म्‍ह पवित्र आत्‍मा च्‍वनादीगु देगः खः धकाः मस्‍यू ला? उकिं छिमिगु म्‍हय्‌ परमेश्वरं छ्वयाहयादीम्‍ह पवित्र आत्‍मा च्‍वनादी। अय्‌जूगुलिं छिमिगु म्‍ह छिमिगु थःगु मखु।* ६:१९ १ कोर ३:१६; २ कोर ६:१६ 20 छिपिं मू पुलाः न्‍याना तःपिं खः। अय्‌जूगुलिं छिमिगु म्‍हं परमेश्वरयात तःधंके माः।